काठमाडौं (हाम्रो खेलकुद)– ओलम्पियन पौडी खेलाडी शीरिष गुरुङको अध्यक्षतामा स्थापना भएको शिरिष फाउन्डेसनले पहिलो चरणमा केही किशोर खेलाडीलाई दीर्घकालिन खेलकुद छात्रवृत्ति प्रदान गर्ने भएको छ । दर्ता प्रक्रिया पुरा भएपनि औपचारिक उद्घाटनमार्फत फाउन्डेसन स्थापनाको जानकारी दिने तयारी गरिरहेको फाउन्डेनसले छात्रवृतिका लागि प्रक्रिया भने थालिसकेको छ ।

फाउन्डेसनले आफ्ना योजनावारे छलफल गरी सुझाव संकलन तथा खेलाडी छनोटको आह्वानका लागि आज विभिन्न १५ खेलका संघका अध्यक्ष तथा मुख्य प्रशिक्षकहरुसँग छुट्टाछुट्टै छलफल गरेको छ । छलफलमा एथलेटिक्स, आर्चरी, तेक्वान्दो, जुडो, टेबल टेनिस, ब्याडमिन्टन, कराते, उसु, साइक्लिङ, भारोत्तोलन, ट्रायथलन, सुटिङ, लन टेनिस, बक्सिङ र पौडीका प्रतिनिधिहरुको उपस्थिति थियो ।

फाउन्डेसनले पहिलो पटक छनोट गरिएका खेलाडीको संख्या, नाम र थप विवरण फाउन्डेसन उद्घाटनका अवसरमा सार्वजनिक गर्ने फाउन्डेसनका सदस्य जगतमान श्रेष्ठले जानकारी दिएका छन् । नेपालमा संस्थागत रुपमा खेलिने ओलम्पिक खेलमध्ये १५ खेलका राष्ट्रिय संघ र मुख्य प्रशिक्षक तथा खेल विज्ञहरुले छानेका खेलाडीलाई यस्तो छात्रवृत्ति प्रदान गरिनेछ फाउन्डेसनको योजना रहेको बताइएको छ ।

छात्रवृत्तिका लागि खेलाडी चयन गर्दा सकेसम्म १० देखि १४ वर्ष उमेरकालाई प्राथमिकता दिइनेछ । असाधारण प्रतिभा भएमात्र छनोटका हकमा भने उमेर हद नलाग्ने बताइएको छ । खेलाडीमा भएको क्षमता, उसको पारिवारिक अवस्था हेरेर शारिरिक विकासको अनुमान समेत लगाएर खेलाडी छनोटको आधार तयार गरिने जनाइएको छ । छनोट गरिएका खेलाडीलाई नियमित रुपमा उच्चस्तरको प्रशिक्षण दिइनुका साथै वसोवास, यातायात, खेलसामाग्री, नियमित स्वास्थ्यउपचार र अध्ययनको प्रबन्ध फाउन्डेसनले मिलाउने जनाइएको छ ।