काठमाडौं (हाम्रो खेलकुद) ओलम्पियन गौरिका सिंहले २० औं राष्ट्रिय पौडी च्याम्पियनसिपको अन्तिम दिन तीन नयाँ राष्ट्रिय कीर्तिमान बनाएकी छिन् ।

५० मिटर फ्रिस्टाइल फाइनल चरणमा अग्रतामा गौरिका ।

बिहिबार दुई इभेन्टमा नयाँ राष्ट्रिय कीर्तिमान बनाएकी गौरिकाले प्रतियोगिताको अन्तिम दिन अर्थात शुक्रबार १०० मिटर फ्रिस्टाइल, १०० मिटर बटरफ्लाईं र ५० मिटर फ्रिस्टाइलमा नयाँ राष्ट्रिय कीर्तिमान कायम गर्दै प्रतियोगितामा पाँच राष्ट्रिय कीर्तिमान बनाईन् ।

१०० मिटर फ्रिस्टाइलमा गौरिकाले हिट चरणमा १ मिनेट ० दशमलव ७९ सेकेण्डको नयाँ कीर्तिमान कायम गरेकी हुन् । फाइनल चरणमा भने गौरिकाले १ मिनेट २ दशमलव ३ सेकेण्डको समय निकाल्दै स्वर्ण जितिन् । यसअघि यो कीर्तिमान दुवईंमा सन् २०१६ मा भएको आइरिस ओपन च्याम्पियनसिपमा १ मिनेट १ दशमलव ७८ सेकेण्डका साथ गौरिकाको नाममा थियो ।

यस्तै कान्छी ओलम्पियन गौरिकाले १०० मिटर बटरफ्लाईमा १२ औं सागमा आफैंले राखेको कीर्तिमान भंग गरिन् । उनले १ मिनेट ७ दशमलव ६९ सेकेण्डको समय निकालिन् । १२ औं सागमा गौरिकाकै नाममा १ मिनेट १० दशमलव ९४ सेकेण्डको समय थियो ।

५० मिटर फ्रिस्टाइलमा गौरिकाले १२ औं सागमा सोफिया शाहले राखेको कीर्तिमान भंग गरिन् । उनले हिट चरणमा २८ दशमलव ९ सेकेण्डका साथ कीर्तिमान बनाएकी हुन् ।
फाइनल चरणमा गौरिकाले २८ दशमलव ५० सेकेण्डको समय निकालिन् । यसअघि सोफियाले १२ औं सागमा २८ दशमलव ८५ सेकेण्डका साथ कीर्तिमान बनाएकी थिइन् ।

पुरुषतर्फ नेपाल एपिएफ क्लबका शुभम श्रेष्ठले प्रतियोगिताको अन्तिम दिन १०० मिटर ब्रिष्ट स्ट्रोक र ५० मिटर ब्रिष्टस्ट्रोकमा नयाँ कीर्तिमान बनाए । शुभमले आफैले हंगेरीको बुढापेष्टमा भएको १७ औं फिना च्याम्पियनसिपमा राखेको १ मिनेट ११ दशमलव ३४ सेकेण्डको कीर्तिमान भंग गर्दै नयाँ कीर्तिमान बनाएका हुन् । नयाँ कीर्तिमान बनाउने क्रममा शुभमले १ मिनेट ११ दशमल २४ सेकेण्डको समय निकाले ।

उस्तै शुभमले ५० मिटर ब्रिष्टस्ट्रोकमा मध्यमाञ्चलका किरण कार्कीले सन २०१६ मा भएको २१ औं राष्ट्रिय पौडी च्याम्पियनसिपमा राखेको कीर्तिमान भंग गरेका हुन् । शुभमले हिटर चरणमा ३२ दशमलव ४० सेकेण्डका साथ कीर्तिमान बनाए । यसअघि किरणले ३३ दशमलव ४५ सेकेण्डका साथ कीर्तिमान बनाएको थियो ।