काठमाडौं (हाम्रो खेलकुद) – त्रिभुवन आर्मी क्लब सातौं एनएसए कप पौडी प्रतियोगिताको खुलातर्फ टिम च्याम्पियन बनेको छ । स्वर्ण, रजत र कास्य पदकबाट प्राप्त समग्र अंकका आधारमा विजेताको घोषणा हुने आयोजक नेपाल पौडी संघले जनाएको छ । आर्मी (७४) च्याम्पियन बनेको खुलातर्फ नेपाल एपिएफ क्लब (२७) दोस्रो तथा प्याराडाइज स्कुल (२) तेस्रो बन्यो । खुलामा ४ क्लबको सहभागिता थियो ।

तस्बिरहरु : विवेक सुवेदी/ हाम्रो खेलकुद

च्याम्पियन उपाधिका साथ आर्मी टिम ।

एनएसए कप पौडीका उत्कृष्ट खेलाडी शिरिष गुरुङ र टिशा शाक्य ।

त्यस्तै उमेर समूहतर्फ भने लिंकन स्कुल च्याम्पियन बन्यो । लिंकनले ६३ , दोस्रो निर्सग बाटिकाले ४७ र तेस्रो प्रिमियर स्कुलले ४१ अंक बटुलेका थिए । उमेर समूहमा ३५ विद्यालयको सहभागिता थियो । आज सम्पन्न दुई दिने प्रतियोगितामा ओलम्पियन समेत रहेका आर्मीका शिरिष गुरुङ पुरुषतर्फ र लिंकनकी टिसा शाक्य उत्कृष्ट खेलाडी घोषित भईन् ।

शिरिषले अन्तिम दिन आज दुई राष्ट्रिय कीर्तिमान राखेका छन् । सिजनको अन्तिम पौडी प्रतियोगिताको रुपमा रहेको सातौ एनएसए कप पौडी च्याम्पियनसिपको शिरिषले ५० मिटर ब्याकस्ट्रोक र ५० मिटर फ्रिस्टाइलमा नयाँ राष्ट्रिय कीर्तिमान बनाएका हुन् । अघिल्लो दिन उनले १ सय मिटर फ्रिस्टाइलमा ५७.६९ सेकेण्डको नयाँ कीर्तिमान राखेका थिए ।

आज ५० मिटर ब्याकस्ट्रोकमा शिरिषले हिट चरणमा ३१.७८ सेकेण्डको समय निकाल्दै कीर्तिमान बनाए । यसअघि यो कीर्तिमान शिरिषको आफ्नै नाममा थियो । शिरिषले सन् २०१६ मा २१ औं राष्ट्रिय पौडी च्याम्पियसिपमा ३१.९८ सेकेण्डको समय कीर्तिमान थियो ।

फाइनल चरणका भने यो स्पर्धामा लिंकन कलेजका एलेक्सजेण्डर शाह ३२.२८ सेकेण्डका साथ पहिलो, आर्मीका अनुभव सुब्बा ३३.६० सेकेण्डका साथ दोस्रो, आर्मीकै दिलिप थापामगर ३५.८८ सेकेण्डका साथ तेस्रो भए । फाइनल चरणमा शिरिष ४३.७२ सेकेण्डका साथ छैटौ स्थानमा रहे ।
यस्तै शिरिषले ५० मिटर फ्रिस्टाइलमा एलेक्सजेण्डर शाहले सन् २०१७ मा छैटौ फिना जुनियर च्याम्पियनसिपमा राखेको कीर्तिमान आफ्नो नाममा लेखाए । ५० मिटर फ्रिस्टाइलको हिट चरणमा शिरिषले २५.२५ सेकेण्डका साथ नयाँ कीर्तिमा बनाए । एलेक्सजेण्डरले २६.१८ सेकेण्डको समय निकालेका थिए ।

लिंकन स्कुलका एलेक्सजेण्डर शाह र टिशा शाक्य उपाधिका साथ ।

प्रतियोगिताको पहिलो दिन पाँच राष्ट्रिय कीर्तिमान बनेको थियो । आर्मीाका शिरिष गुरुङ र अनुभव सुब्बा, नेपाल एपिएएफका शुभम श्रेष्ठ र लिंकन स्कुलका एलेक्सजेण्डर शाहले नयाँ राष्ट्रिय कीर्तिमान कायम गरेका हुन् । यस्तै महिलातर्फ लिंकन स्कुलकै टिसा शाक्यले नयाँ राष्ट्रिय कीर्तिमान कायम गरेकी थिईन् ।
राष्ट्रिय कीर्तिमान कायम गरेका ४ खेलाडीहरुले जनही ५–५ हजार प्राप्त गरे । तीन राष्ट्रिय कीर्तिमान बनाएको शिरिषले १५ हजार प्राप्त गरे । नयाँ खेलाडीहरुको प्रतिभा प्रस्फुटन गर्ने उदेश्य राखिएको प्रतियोगितामा खुल्ला तर्फ २६ र उमेर समुहमा ३३ गरी कुल ५९ वटा इभेन्ट्स समावेश गरिएको छ । यि सबै खेलमा पुरुषतर्पm १ सय १२ र महिला खेलाडीको संख्या ७२ गरी कुल १ सय ८४ खेलाडीहरुले प्रतिस्पर्धा गरेका थिए ।