प्रकाश तिमल्सिना, नेपालगन्ज

सानै उमेरमा नेपालका लागि ओलम्पिक खेलिसकेकी गौरिका सिंहले पहिलो पटक राष्ट्रिय प्रतियोगिता खेलेकी छिन् । परिवारका साथ बेलायतमा बस्दै आएकी गौरिका आठौं राष्ट्रिय खेलकुदअन्तर्गत पौडी खेल्नका लागि यति बेला नेपालगन्जमा छिन् ।

पहिलो दिन नै दुई स्वर्ण पदक जित्दै आफ्नो पहिलो राष्ट्रिय खेलकुद सहभागितालाई उनले यादगार बनाउने संकेत देखाएकी छिन् । यसअघि पूर्वाञ्चलमा आयोजना भएको सातौं राष्ट्रिय खेलकुदमा पनि उनी सहभागी हुने तयारीमा थिइन् । तर, पटक पटक पौडी प्रतियोगिताको मिति सरेपछि उनले भाग लिइनन् । देशका विभिन्न क्षेत्रमा राष्ट्रिय खेलकुद आयोजना हुँदा पूर्वाधार कमीका कारण पौडी भने राजधानीमै हुने गर्थ्यो । यसपाली पहिलो पटक पौडी राजधानी बाहिर आयोजना भएको हो ।

विगतझैं यसपाली पनि पटक-पटक मिति तोकिएर राष्ट्रिय खेलकुद सर्यो । तर, उनलाई त्यसले प्रभाव पारेन । आठौंमा भाग लिन उनी बेलायतदेखि नेपालगन्ज आइपुगेकी हुन् । तर, राष्ट्रिय खेलकुद परिषद् (राखेप) ले प्रतियोगिता आयोजना गर्ने लक्ष्यसहित तयार गर्न खोजेको नेपालगन्ज पौडी पोखरी पूर्ण रुपमा तयार नहुँदा अन्तिम समयमा सिग्नेट होटलको २५ मिटर पौडी पोखरीमा २१ औं राष्ट्रिय च्याम्पियनसिप आयोजना भयो ।

गौरिकाले ८ सय मिटर फ्रि स्टाइलमा विहान स्वर्ण पदक जितेकी उनले साँझ भने ५० मिटर ब्याकस्ट्रोकमा स्वर्ण पदक मात्र जितिनन् , नयाँ राष्ट्रिय कीर्तिमानसमेत बनाइन् । उनले ३०.८५ सेकेन्डको नयाँ कीर्तिमान बनाइकी थिइन् । यसअघि उनकै नाममा ३१.३१ को कीर्तिमान थियो ।

नेपालगन्जमा प्रतिस्पर्धा गरिरहेका ११ टिमका १ सय ३२ खेलाडीमा गौरिका सबैभन्दा सफल खेलाडी हुन् । नेपाललाई दक्षिण एसियाली खेलकुद (साग) मा पौडीको व्यक्तिगत स्पर्धामा पदक जिताउने उनी एक्ली खेलाडी हुन् ।

सन् २०१६ मा भारतमा भएको १२ औं सागमा उनले एक रजत र तीन कास्य पदक जितेकी थिइन् । सोहि वर्ष उनले रियो ओलम्पिकमा नेपालको प्रतिनिधित्व गर्दा त्यो ओलम्पिककै सबैभन्दा कम उमेरकी खेलाडी थिइन् । त्यस्तै एसियन र विश्व च्याम्पियनसिपमा पनि उनले अनुभव बटुलिसकेकी छिन् । गौरिका नेपाल आर्मीबाट आठौं राष्ट्रियमा भाग लिइरहेकी छिन् ।

आइतबार दोस्रो पदक जितेपछि गौरिकाले भनिन्, ‘यहाँका साथीहरुले पनि पौडीमा निकै प्रगति गरिसकेका छन् । त्यो देख्दा खुसी लाग्छ । आउने दिनमा अझै राम्रो गर्न सक्छन् ।’

घरेलु खेलाडीमाझ उनलाई प्रतिस्पर्धा दिने खेलाडी नै छैनन् । उनले खेलेका इभेन्ट्समा स्वर्ण पदक पक्का जस्तै हो । तर , पनि उनी अन्य सँग तुलाना गर्नु भन्दा पनि आफ्नो प्रतिस्पर्धा आफैसँग हुनुपर्ने बताउँछिन् ।

१२ औं सागमा स्वर्ण पदक जित्नबाट चुकेकी उनले नेपालमा आयोजना हुने भनिएको १३ औं सागमा आफु स्वर्णका लागि प्रयत्न गर्ने बताइन् । उनले भनिन्, ‘म दाबी त गर्दिन तर, घरेलु समर्थकका माझमा स्वर्ण पदक जित्ने कोशिस म गर्नेछु । ‘

यसपटक आठौंमा भने उनको लक्ष्य राष्ट्रिय कीर्तिमान बनाउने रहेको छ । त्यसका लागि गौरिकाले सुरुवात पनि राम्रो गरेकी छिन् । पहिलो दिन दुई स्वर्ण जित्दा एक कीर्तिमान कायम गरेकी उनले बाँकी दिन पनि प्रतिस्पर्धा गर्नेछिन् ।

भिडियोमा हेर्नुहोस :