काठमाडौं (हाम्रो खेलकुद) – नेपाली ओलम्पियनहरुको छाता संगठन नेपाल ओलम्पियन एसोसिएसन (एनओए) ले ओलम्पिक दिवस २०२२ को अवसरमा हालसम्म नेपालबाट ओलम्पिक खेलेका खेलाडीहरुको पुनर्मिलनसँगै ५ विशेष कार्यक्रम आयोजना गर्ने भएको छ ।

एसोसिएसनले शुक्रबार राजधानीमा पत्रकार सम्मेलनको आयोजना गर्दै ओलम्पिक दिवसको अवसरमा असार ५ गतेदेखि ९ गतेसम्म विविध ५ कार्यक्रम हुने जानकारी गराएको छ ।

जसअन्तरगत ५ गते आइतबार एभीएम स्कुल ललितपुरमा एसोसिएसन र नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) बीच मैत्रीपूर्ण टेवल टेनिस हुनेछ । ६ गते सोमबार सातदोबाटोस्थित एन्फा कम्प्लेक्समा एसोसिएन, एनएनआइपिए र नेपाल खेलकुद पत्रकार मञ्चबीच मैत्रीपूर्ण फुटबल हुनेछ ।

७ गते मंगलबार ओलम्पियन पुनर्मिलन कार्यक्रम हुनेछ । एसोसिएसनका अध्यक्ष दीपक विष्टले ओलपिम्पयन पुनर्मिलन कार्यक्रममा सन् १९६४ को टोकियो ओलम्पिकदेखि २०२० को टोकियो ओलम्पिकसम्मका ओलम्पियनहरुलाई एउटै थलोमा उपस्थित गराउने लक्ष्यसहित कार्यक्रम गर्न लागेको बताए ।

‘स्वदेश तथा विदेशमा रहेका ओलम्पियनहरुलाई पनि समेट्ने प्रयास गर्नेछौैं । ओलम्पियनहरु प्रायः अमेरिका, बेलायत, अष्ट्रेलिया र क्यानडा लगायतका देशमा रहेका छन् । हामीले सबैलाई समेट्ने प्रयास गरेका छौं । समय के हुन्छ, त्यसले पनि प्रभाव पार्नेछ । हामी कार्यक्रमलाई प्रत्यक्ष प्रसारण पनि गर्नेछौं । ओलम्पियनसँग अनलाइन अथवा समूहमार्फत जोड्नेछौं ।’ अध्यक्ष विष्टले भने, ‘धेरै ओलम्पियनलाई हामीले पनि देखेका छैनौ । त्यसैले हाम्रो परिवार सबै भेटेर सेयर ग¥यौं । पुरानालाई सम्मान र नयाँलाई प्रोत्साहन हो ।यो नयाँ र ऐतिकासिक कार्यक्रम आँटेका छौँ । अब हरेक वर्ष यो कार्यक्रम गर्ने सोच राखेका छौँ ।’

ओलम्पिनहरुबीच भाइचारा अभिवृद्धि, ओलम्पिक मुभमेन्टका बारेमा समाजलाई जागृत र सुसूचित गर्ने अनि मुलुकभित्रको खेल विकासमा ओलम्पिनहरुको पनि भूमिका र जिम्मेवारीको बारेमा छलफल गरिने अध्यक्ष विष्टले बताए ।

पुनर्मिलन कार्यक्रम दौरान अग्रज ओलम्पियनलाई सम्मान र भौतिक उपस्थिति नरहने ओलम्पियनलाई पनि विशेष सम्मान रहने संघले जनाएको छ । नेपालमा हालसम्म विभिन्न खेलबाट ८८ ओलम्पियन रहेका छन् । जसमध्ये १० जना ओलम्पियनको निधन भइसकेको छ ।

८ गते बुधबार स्कुल टु ओलम्पिक कार्यक्रम हुनेछ । काठमाडौंमा जेम्स स्कुलमा विद्यार्थी र ओलम्पियनबीच अन्र्तक्रिया कार्यक्रम हुनेछ । देशैभरका स्कुलमा यो कार्यक्रम गरिनेछ । ९ गते बिहीबार नेपाल ओलम्पिक कमिटिसँगै ओलम्पिक दिवस संयुक्त रुपमा मनाइने एसोसिएसनले जनाएको छ ।