काठमाडौं (हाम्रो खेलकुद)– अन्तर्राष्ट्रिय प्रतियोगितामा नेपाललाई सर्वाधिक पदक दिलाउने खेल मध्येको एक करातेको अभिभावक संस्था नेपाल कराते महासंघको निर्वाचन अर्को महिना हुने तय भएको छ ।

विगतमा लामो समयको विवाद र अन्य कारणले एक दशक भन्दा लामो समयदेखि निर्वाचन हुन नसकेको महासंघले राष्ट्रिय खेलकुद विकास ऐन २०७७ लागू भएयता नयाँ नेतृत्व पाउने भएको छ । पूर्नगठित महासंघलाई वैशाख १२ गते भित्र विधान मस्यौदा तयार गरि राखेपको स्वीकृतीमा साधारण सभा एवं निर्वाचन गर्ने जिम्मेवारी दिएको थियो ।

लामाको नेतृत्वमा रहेको तदर्थ समितिले राखेपबाट विधान स्वकृती गराएर निर्वाचन प्रक्रिया अघि बढाएको हो । राखेपले दिएको ३ महिनाको समय सिमाको १ महिना अघि नै निर्वाचन हुने भएको छ । महासंघले चितवनमा चैत ११ गते साधारण सभा तथा त्यसअघि र पछि अन्य दुई कार्यक्रम गर्ने तयारी गरेको अध्यक्ष लामाले जानकारी दिए । चैतको ७ देखि १३ गते सम्म साधारण सभासहित अन्य कार्यक्रम हुनेछन् ।

जस अनुसार चैत ७ देखि ११ गते सम्म बागमती प्रदेशका झण्डै २ सय प्रशिक्षकलाई विद्यालय शिक्षक प्रशिक्षण कोर्ष सन्चालन हुनेछ । त्यस्तै चैत ११ गते साधारण सभा र कराते प्रशिक्षकको मास्टर मिटको उद्घाटन हुनेछ । मास्टर मिट १३ गते सम्म चल्ने छ । साधारण सभा र मास्ट मिटको उद्घाटन प्रधानमन्त्री पुष्पकमल दाहालले गर्ने तय भएको अध्यक्ष लामाले जानकारी दिए । राखेपका सदस्य सचिव टंकलाल घिसिङका साथ लामाले आइतबार प्रधानमन्त्री दहाललाई साधारण सभा उद्घाटन लागि निमन्त्रणा गरेका थिए ।

विगतमा नेपाल कराते महासंघको दुई वटा कार्यसमिति सक्रिय थियो । जसमा एउटालाई नेपाल ओलम्पिक कमिटी (एनओसी) ले र अर्कोलाई राखेपले मान्यता दिएको थियो । पछि दुवैलाई महासंघलाई एक बनाएपनि त्यसले गति लिन सकेन । त्यो समितिले निर्वाचन पनि गर्न सकेन । पछिल्लो समय पूर्नगठित महासंघले एसियाली खेलकुदका लागि फागुन ५ र ६ गते खेलाडी छनोट प्रतियोगिता पनि सम्पन्न गरिसकेको छ ।

२५ सदस्यीय कार्यसमितिको चयन हुने

महासंघको नयाँ विधान अनुसार साधारण सभाले २५ सदस्यीय कार्यसमितिको निर्वाचन गर्नेछ । यद्दपी त्यसलाई साधारण सभाले थपघट गर्न भने सक्नेछ । महासंघको निर्वाचनमा केन्द्रिय कार्यसमिति, प्रदेश र अफिसियल ४ कराते संघ (सितोरिया, सोतोकान, गोजुरियो र वादोरियो) का प्रतिनिधिले भाग लिन पाउनेछन् ।

अध्यक्ष लामाका अनुसार हाल केन्द्रिय समितिमा रहेका २१, ७ प्रदेशबाट समान ५ र ४ करातेबाट समान ५ प्रतिनिधि गरि कुल ७६ जनाले साधारण सभामा भाग लिन पाउनेछन् । जिल्लाबाट चयन भई आएका प्रतिनिधिले प्रदेश प्रतिनिधिको चयन गर्नेछन् ।

नयाँ विधानको मस्यौदा अनुसार हरेक प्रदेशबाट एक जना केन्द्रिय सदस्य निर्वाचित हुनेछन् । केन्द्रिय साधारण सभा अघि नै हरेक प्रदेशले आफ्नो केन्द्रिय सदस्यको चयन गर्नेछ । ती निर्वाचित केन्द्रिय सदस्यबाहेक साधारण सभाका सबै प्रतिनिधिले निर्वाचनमा प्रतिस्पर्धा गर्न लामाले बताए । महासंघको साधारण सभासहित विभिन्न कार्यक्रम आयोजनाका लागि अध्यक्ष लामाले केहि दिनअघि चितवनको सम्भावित कार्यक्रमस्थलको निरीक्षण गरेका थिए ।

त्यसक्रममा लामा बागमती प्रदेश कराते प्रमुख एवंम् चितवन कराते संघका अध्यक्ष गगन लामा र बागमती प्रदेश खेलकुद विकास परिषद्का सदस्य एवंम चितवन खेलकुद विकास समितिका अध्यक्ष उत्तम जोशीलगायतका प्रशिक्षकहरुका साथमा नारायणी किनार, सौरहा, पटिहानी स्टेडियम पुगेका थिए । सोही क्रममा टोलीले भरतपुर महानगरपालिकाकी मेयर रेनु दहालसँग भेटी कार्यक्रमको बारेमा जानकारी गराएको थियो ।