काठमाडौं (हाम्रो खेलकुद) – इन्डोनेसियामा जारी १८औं संस्करणको एसियन गेम्स (एसियाड) को तेस्रो दिनको खेल सकिदा नेपालले निराशजनक प्रदर्शनलाई निरन्तरता दिएका छन् । एसियाडको तेस्रो दिन ८ खेलमा प्रतिस्पर्धा गर्दा नेपाल सहभागितामै सीमित बन्यो ।

पुरुष ब्याडमिन्टन टोली चाइनिज तोइपेइसँग क्वार्टरफाइनलमा निराश बन्यो । पदकको अपेक्षा गरिएको तेक्वान्दो प्रदर्शन झन बिर्सनलायक नै बन्यो । संगीता बस्यालले विपक्षीसँग डटेर प्रतिस्पर्धा गर्दा निमा गुरुङ र साग गुभाजु प्रतिद्धन्द्धीसामु निरिह नै बन्यो । सुटिङमा नेपालले सहभागिता जनाएको तीनै जना खेलाडीले अपेक्षाकृत प्रदर्शन गर्न सकेन ।

पौडीतर्फ ओलम्पियन गौरिका सिंह र टीसा शाक्य दुवै हिट चरणबाट बाहिरिए । टीसाले आफ्नो प्रदर्शनमा सुधार गरेपनि आफ्नो हिटमा पुछारमा रहिन् ।

उसुकी निमा घर्तीमगरले राष्ट्रिय कीर्तिमान बनाएपनि उनी १२ खेलाडी सहभागी महिलाको नान् ताउमा ११औं स्थान हासिल गरेकी छन् । निमाले ९.१७ अंक जोडिन् । पुरुष छान् छ्वानमा नेपालका युवराज थापा मगर २१औं स्थानमा तथा सान्सौंतर्फ पुरुष ५६ केजीमा पदम ठकुल्ला लाओसका खेलाडीसँग पराजित भए ।

साइक्लिङको डाउनहिलतर्फ नेपालका राजेश मगर सातौं स्थानमा रहे । नेपाल च्याम्पियन राजेश ९ खेलाडी रहेको यो स्पर्धामा सातौं स्थानमा रहेका हुन् । साइक्लिङको क्रस कन्ट्री रेस मंगलबार हुनेछ । यो विधामा महिलातर्फ लक्ष्मी राई र पुरुषतर्फ बुद्धिबहादुर तामाङले प्रतिस्पर्धा गर्दैछन् ।

लन टेनिसको महिला डबल्समा नेपालकी मायांका राणा र माहिका राणाको जोडी प्रिक्वाटरफाइनलमा पुग्नु नेपालको लागि ठुलो सफलता बन्यो । मायांका र माहिकाको जोडीले माल्दिभ्सका जोडीलाई ६–४ र ६–१ को सोझो सेटमा पराजित गरे । प्रिक्वाटरफाइनलमा उक्त जोडीले जापानसँग मंगलबार खेल्नेछिन् ।

पदकको आशा गरेको प्याराग्लाइडिङमा नेपालको सम्भावना कायम राखेको छ । व्यक्तिगत एक्युरेसीको पहिलो २ राउन्डको खेल सकिँदा नेपालका विजय गौतम तेस्रो स्थानमा छन् । मंगलबार तेस्रो राउन्डबाट खेल शुरु हुनेछ । छैटौ राउन्डसम्म यसैलाई निरन्तरता दिन सके नेपालले पदक जित्नेछ । पहिलो स्थानमा इन्डोनेसियाका मेगावान्तो जाफ्रो छन् । यस्तै दोस्रो स्थानमा थाइल्यान्डका विटेहाम जिरासाक छन् ।

एसियन गेम्सको तेस्रो दिन सकिदा १५ स्वर्णसहित कुल ३६ पदकसहित चीन शीर्ष स्थानमा रहेको छ । दोस्रो स्थानमा रहेको जापानले ८ स्वर्णसहित कुल ३० पदक जितेको छ । ५ स्वर्णसहित कुल २४ पदक जितेको दक्षिण कोरिया तेस्रो स्थानमा रहेको छ ।