पोखरा (हाम्रो खेलकुद )- सन्तोषी श्रेष्ठले सफल पोखरा म्याराथनमा महिला हाफ म्याराथनको उपाधि जितेकी छिन्।

पोखरामा शनिबार बिहान भएको १८ औं संस्करणमा निर्धारित दूरी (२१ किलोमिटर) १ घण्टा १८ मिनेट ३९ सकेण्डमा पार गर्दै सन्तोषीले हाफ म्याराथनको उपाधि जितेकी हुन्।

सन्तोषीले गत महिना बंगलादेशमा भएको बंगबन्धुमा दक्षिण एसियालीतर्फ म्याराथनको उपाधि जितेकी थिइन्। उनको त्यो म्याराथनमा डेब्यू थियो। ४ वर्ष अघि स्वदेशमा‌ भएको १३ औं दक्षिण एसियाली खेलकुदमा‌ सन्तोषीले १० हजार मिटर दौडमा स्वर्ण पदक जितेकी थिइन्।

केन्याली अवीजल जेरोप १ घन्टा १९ मिनेट ०२ सेकेण्डमा दूरी पूरा गर्दै दोस्रो भएकी छिन् । राममाया बुढा तेस्रो तथा फुलमती राना चौथो भएकी छिन्। फुलमतीले निर्धारित दूरी १ घण्टा १९ मिनेट २२ सेकेण्डमा पार गरिन्। उनी २० सेकेण्डले दोस्रो हुनबाट चुकेकी हुन्। तेस्रो भएकी राम माया बुढाले निर्धारित दूरी १ घण्टा २१ मिनेट ०७ सेकेण्डमा पार गरिन्।

म्याराथनको शीर्ष ३ मा केन्याली खेलाडी
केन्याका जुलियस मिरुकी वाहोमले सफल पोखरा म्याराथनको १८ औँ संस्करणको उपाधि जितेका छन्।

मिरुकीले निर्धारित ( ४२.१९५ किमी) दुरी २ घण्टा १९ मिनेट ३६ सेकेण्डमा पार गर्दै पहिलो स्थान हासिल गरेका हुन् । उपाधिसँगै उनले ५ लाख रुपैयाँ प्राप्त गरेका छन्।

दोस्रो र तेस्रो स्थान पनि केन्याका धावकले नै जितेका छन्। चौथो स्थानमा भने नेपालका किरणसिंह बोगटी बनेका छन्।

केन्याका स्कास किहारा कामीनी दोस्रो भए। उनले निर्धारित दुरी २ घण्टा, २० मिनेट ०५ सेकेण्डमा पार गरे।
तेस्रो भएका एडविन किप्लागट तेस्रो भए। उनले २ घण्टा २० मिनेट ४५ सेकेण्डमा पार गरे।

१३ औं सागमा म्याराथनका स्वर्ण पदक विजेता किरणले निर्धारित दुरी २ घण्टा २९ मिनेट ३७ सकेण्डमा पूरा गरेका थिए।

भुतपूर्व खेलाडी मन्च पोखराको आयोजनामा‌ भएको प्रतियोगिताको पुरुष म्याराथनमा १ सय २१ खेलाडीले प्रतिस्पर्धा गरेका थिए।