धनगढी (हाम्रो खेलकुद) – धनगढी जेसिजले नयाँ बर्षको अवसरमा आयोजना गर्ने धनगढी हाफ म्याराथनको तयारी अन्तिम चरणमा पुगेको बताइएको छ ।

अब धनगढी दौडिन्छ भन्ने नाराका साथ आयोजना हुने धनगढी हाफ म्याराथनको दसौं संस्करणको तयारी अन्तिम चरणमा पुगेको बुधबार पत्रकार सम्मेलनमार्फत संयोजक आशिष शाहले जानकारी दिए । हाफ म्याराथन २०८१ वैशाख १ गते हुनेछ ।

हाफ म्याराथनलाई नेपाल एथलेटिक्स संघले मान्यता दिएको जनाइएको छ ।धनगढी हाफ म्याराथनको विजेताले ६६ हजार ६ सय ६६, दोस्रोले ४४ हजार ४ सय ४४ र तेस्रो हुनेले ३३ हजार ३ सय ३३ रुपैयाँ प्राप्त गर्नेछन् ।

विजेता पुरस्कार धनगढीको निसर्ग हस्पिटल, दोस्रोको कैलाली उद्योग वाणिज्य संघ र तेस्रोको माया मेट्रो हस्पिटलले प्रायोजन गरेको बताइएको छ । हाफ म्याराथन धनगढी रंगशालाबाट सुरु भएर सहिद गेट हुदैं गेटा मेडिकल कलेजको मनेहरा पुलको मोड भएर पुनः धनगढी रंगशालामा पुगेर टुंगिने धनगढी जेसिजका अध्यक्ष अरुण सिंहले जानकारी दिए ।

प्रतियोगितामा महिला, कर्पोरेट विधामा ५ किलो मिटरको दौड हुनेछ । दुई विधाका विजेताले ६ हजार ६ सय ६६, दोस्रोले ४ हजार ४ सय ४४ र तेस्रो हुनेले ३ हजार ३ सय ३३ प्राप्त गर्नेछन् ।

मुख्य प्रबद्र्धकमा जेसिज एभरेष्ट स्कुल रहेको प्रतियोगितालाई चैतन्य पाठशालाले प्रायोजन गरेको छ । धनगढी उपमहानगरपालिका , नवजीवन को अपरेटिभ्स लिमिटेड,विभिन्न व्यवसायिक प्रतिष्ठान, संघ संस्था, सुदूरपश्चिम प्रदेश खेलकुद परिषद, सुदूरपश्चिम प्रदेश युवा परिषद, धनगढीलगायतको सहयोग रहेको बताइएको छ ।