सुर्खेत (हाम्रो खेलकुद) – यसै साता आयोजना हुने ज्ञान प्रथम कर्णाली हाफ म्याराथनमा खुल्लातर्फ महिला तथा पुरुष विजेता खेलाडीले समान ५५ हजार रुपैयाँले प्राप्त गर्ने भएका छन् ।

शनिबार आयोजना हुने हाफ म्याराथनका विजेताको पुरस्कार घोषणा गर्ने क्रममा आयोजक रेस नेपालले दोस्रोले ३० हजार र तेस्राले २० हजार रुपैयाँ पाउने घोषणा गरेको छ ।

कर्णाली प्रदेशको राजधानी सुर्खेतको वीरेन्द्रनगरमा हुने हाफ म्याराथनमा पुरुष ४५ बर्षमाथि उमेर समूहको विजेताले १५ हजार, दोस्रोले १० हजार र तेस्रोले ५ हजार रुपैयाँ गरिनेछ ।

त्यस्तै विद्यालय तहका छात्र एवं छात्रातर्फका विजेताले १० हजार, दोस्रोले ५ हजार र तेस्रोले ३ हजार रुपैयाँ पाउनेछन् । कर्पोरेटतर्फ विजेतालाई बिशेष प्याकेजद्वारा पुरस्कृत गरिने जनाएको छ । रेस नेपाल एवं क्रियटिभ गन्ज मिडिया एण्ड इभेन्ट म्यानेजमेन्टको संयुक्त बैठकले सोमबार नगद पुरस्कार घोषणा गरेको हो ।

कर्णाली हाफ म्याराथनलाई क्रमिक रुपमा दौड संस्कृतिको विकाससँगै पर्यटन प्रवद्र्धन गराउने इभेन्टका रुपमा स्थापित गराउने आयोजकको तयारी छ । यस वर्ष आयोजना हुने दसौं राष्ट्रिय खेलकुदलाई प्रवद्र्धन गर्नेगरी कर्णाली हाफ म्याराथन आयोजना गर्न लागिएको बताइएको छ ।

पहिलो संस्करणको सफलतासँगै हरेक बर्ष उपयुक्त समयमा कर्णाली हाफ म्याराथन आयोजना गरिने जनाइएको छ।
कर्णाली हाफ म्याराथनको संयोजन वीरेन्द्रनगर नगरपालिकाका निवर्तमान मेयर देवकुमार सुवेदीले गरेका छ् । त्यसैगरी कुमारशमसेर थापालाई सदस्यसचिवको जिम्मेवारी दिएको छ । रेस डाइरेक्टरमा पुर्व मुख्य प्रशिक्षक चन्द्रबहादुर गुरुङलाई नियुक्त गरिएको छ ।

नेपालगन्ज म्याराथन आयोजना एवं व्यवस्थापन गर्दै आएको क्रियटिभ गन्ज मिडिया एण्ड इभेन्ट म्यानेजमेन्टले दौड संस्कृतिको प्रवद्र्धन गर्दै प्रतिभाशाली खेलाडी खोज अभियान अन्तर्गत कर्णाली हाफ म्याराथन गर्न लागेको जनाएको छ ।

कर्णाली प्रदेश खेलकुद विकास परिषदसँगको आर्थिक सहयोग साझेदारी तथा अन्य स्थानीय पालिका एवं नीजि क्षेत्रको सहयोगमा कर्णाली हाफ म्याराथन हुन लागेको रेस नेपालका अध्यक्ष टीएस ठकुरीले बताएका छन् ।