ललितपुर (हाम्रो खेलकुद)- त्रिभुवन आर्मी क्लब
की पुर्णलक्ष्मी न्यौपाने र मुकेशबहादुर पाल खुला ५ किलोमिटर दौडमा शुक्रवार विजयी भएका छन् ।

एथलेटिक्स परिवार, नेपालको प्राविधिक सहयोग तथा व्यवस्थापनमा भएको दौडमा पुर्णलक्ष्मीले १८ मिनेट १८.३८ सेकेन्डमा दूरी तय गरिन् ।

निर्मला केसी १८ मिनेट २०.६४ सेकेन्ड समयमा दोश्रो तथा सिर्जना पाण्डे १८ मिनेट २९.४५ सेकेन्ड समयमा तेश्रो भइन् । शीर्ष तीनका खेलाडी त्रिभुवन आर्मी क्लबका हुन् ।

नेपाल पुलिस क्लबकी सुमित्रा चौधरी चौथो, एपिएफकी आशा रावत पाँचौं, सोलुखुम्बुकी सुशान्त कार्की छैटौं, स्वयम्भूकी सोनु घटानी सातौं, निला जिमी आठौं, ललितपुरकी मन्जु सुनुवार नवौं र सुन्दरीजलकी सम्झना राई दसौं भइन् ।

विश्व पर्यटन दिवसका अवसरमा रोटरी क्लब अफे यल, पाटनद्वारा आयोजित दौडमा मुकेशले निर्धारित दूरी १५ मिनेट १२.७५ सेकेन्डमा पूरा गरे ।

१५ मिनेट १५.०२ सेकेन्ड समयमा सञ्जय श्रेष्ठ दोश्रो तथा १५ मिनेट ३०.८७ सेकेन्ड समयमा सन्जिव नेपाली तेश्रो भए ।

रत्नबहादुर खत्री चौथो, मिङमारसिंह तामाङ पाँचौं, धीरबहादुर बुढा छैटौं, सागर बुढाथोकी सातौं, सञ्जय राई आठौं, रणबहादुर रोका मगर नवौं र कर्णबहादुर रोका मगर दसौं भए । सन्जिव एपिएफ र मिङमार सिन्धुपाल्चोकका हुन् भने बाँकी सबै आर्मीका खेलाडी हुन् ।

महिला/ पुरुष दुवैका विजेताले १२, दोस्रोले ८ , तेस्रोले ५ र चौथोले २ हजार रुपैयाँ पुरस्कार पाए । पाँचौंदेखि दसौं स्थान आउनेले समान १ हजार रुपैयाँ प्राप्त गरे ।

विजेतालाई रोटरी ३२९२ का डिस्ट्रिक्ट गभर्नर राजेन्द्रमान शेरचन, आयोजक रोटरी क्लब अफ यल, पाटनका अध्यक्ष धर्मेन्द्रराज शाक्य, ललितपुर पर्यटन बोर्डका अध्यक्ष दिलेन्द्रराज श्रेष्ठ, ललितपुर महानगरपालिका वडा १६ का अध्यक्ष निर्मलरत्न शाक्य, पूर्व खेलाडीद्वय विष्णु कार्की र वीरेन्द्रलाल श्रेष्ठलगायतले पुरस्कृत गरे ।

त्यसअघि दौडको ललितपुर महानगरपालिकाका मेयर चिरीबाबु महर्जन र दक्षिण एसियाली खेलकुदका कीर्तिमानी धावक वैकुण्ठ मानन्धरले संयुक्त रुपमा उद्घाटन गरेका थिए ।

पाटन दरबार स्क्वायरबाट सुरु भइ पुनः त्यही पुगेर टुंगिएको दौडमा विदेशीसहित पुरुषमा २ सय १० तथा महिलामा ४० गरी २ सय ५० खेलाडीले प्रतिस्पर्धा गरेको एथलेटिक्स परिवार नेपालका अध्यक्ष राजन खत्रीले जनाएका छन् ।