प्रकाश तिमल्सिना

काठमाडौं– यो बर्ष आठ वटा उपाधि जिति सकेकी कान्छिमाया कोजुले ताइपे म्याराथनको महिलातर्फ ११ औं स्थान हासिल गरेकी छिन् । आइतबार भएको म्याराथनमा नेपाल एपिएफ क्लबकी कान्छिमायाले २ घन्टा ५९ मिनेट ३७ सेकेन्ड दौड पुरा गरेकी थिइन् । 

सन् १९७३ देखि १९८२ सम्म जन्मेका खेलाडीमध्ये भने उनी पहिलो स्थान हासिल गर्न सफल भएकी उनका प्रशिक्षक सुशीलनर सिंह राणाले जानकारी दिएका छन् । कान्छिमायाले ४ हजार ताइवान डलर प्राप्त गरेकी छिन् । खराब मौसमका कारण दौडन केही कठिनाई भएकाले कान्छिमायाले आफ्नै राष्ट्रिय कीर्तिमान भंग गर्न असफल भएको प्रशिक्षक राणाको विश्वास छ । उनको नाममा २ घन्टा ५५ मिनेट ५७ सेकेन्डको राष्ट्रिय कीर्तिमान छ ।

झन्डै १५ हजारले भाग लिएको दौडको महिलातर्फ ११ औं स्थान प्राप्त गर्न सकेकोमा कान्छिमायाले खुसी व्यक्त गरेका छन् । ‘यहाँ विश्वभरबाट राम्रा धावकले पनि भाग लिएका छन्’ उनले भनिन्,‘हाम्रो छिमेकी देश भारत, श्रीलंकाका खेलाडी पनि सहभागि छन् । यस्तो ठूलो दौडमा भाग लिएर यो स्थान सन्तोषजक मानेकी छु ।’ स्वदेशमा भने यो बर्ष कान्छिमायालाई हराउने अर्को कुनै खेलाडी निस्केको छैन । स्वदेश र विदेशमा गरेर आठ प्रतियोगितामा भाग लिदाँ ताइपे म्याराथनमा मात्र उनी सहभागीका रुपमा फर्कदै छिन्, बाँकी सबैमा उनले स्वर्ण पदक जितेकी थिइन् । उनले यो बर्ष आठ वटा उपाधि जितिसकेकी छिन् ।

लगातार दौडमा भाग लिदा थकाई लाग्दैन भन्ने हाम्रो खेलकुदको प्रश्नमा टेलिफोनमार्फत कान्छिमायाको जवाफ थियो, ‘थकाई त लाग्छ नी । देश भित्रको दौडमा त मलाई खासै गाह्रो लाग्दैन । विदेशमा प्रतिस्पर्धा अलि कठिन हुन्छ । लगातारको अभ्यासले सफलता पनि मिल्छ । यो बर्ष निकै राम्रो प्रदर्शन भइरहेको छ । त्यसले मनोबलका साथ दौडिरहेकी छु । ’

धनगढीमा भारत र नेपालका शसस्त्र प्रहरीबीचको म्याराथनमा स्वर्ण पदक जित्दै यो बर्ष सुरु भएको उनको उपाधि यात्रा गत महिना काठमाडौंमा भएको पिंकाथन हाफ म्याराथनसम्म जारी थियो । उनले यसबीचमा काठमाडौं म्याराथनमा स्वर्ण पदकमात्र जितिनन्, २ घन्टा ५५ मिनेट ५७ सेकेन्डको राष्ट्रि कीर्तिमान नै बनाइन् । मंसिरमा नेपालगञ्जमा पिस म्याराथनको हाफ म्याराथन जितेकी उनले पुसमा पूर्वाञ्चलमा सम्पन्न सातौं राष्ट्रिय खेलकुदमा ५ किलोमिटर र १० किलोमिटरमा स्वर्ण जितेकी थिइन् ।

त्यसको लगत्तै भारतको दाजर्लिङ पुगेर उनले हाफ म्याराथन जितेकी थिइन् । उनले गत महिना कान्तिपुर हिरो होन्डा हाफ म्याराथन र पिंकाथन हाफ म्याराथनको उपाधि जितेकी थिइन् । कान्तिपुर हाफ म्याराथनमा उनले १ घन्टा १८ मिनेट १० सेकेन्डमा   पुरा गर्दै हाफ म्याराथनमा पनि राष्ट्रिय कीर्तिमान बनाएकी थिइन् ।  कान्छिमाया र उनका प्रशिक्षण राणा सोमबार स्वदेश फर्कनेछन् ।