काठमाडौं (हाम्रो खेलकुद)– गोसाईकुण्ड लाङटाङ म्याराथनको दोस्रो सस्करण अर्को महिना आयोजना हुने भएको छ । आयोजक ट्रेकिङ एजेन्सी एसोसिएसन अफ नेपाल (टान) ले शुक्रबार राजधानीमा पत्रकार सम्मेलनमार्फत भूकम्प गएको दिन (बैशाख १२ गते) आयोजना गर्ने जानकारी दिएको छ । विनाशकारी भूकम्प २०७२ को वैशाख १२ गते भएको थियो ।
भुकम्पपछि लाङटाङ गोसाईकुण्डको पर्यटकीय गतिविधिलाई पूनर्जिवित गर्नुका साथै नेपालमा पनि अन्तराष्ट्रिय स्तरको खेलकुद पर्यटन विकास गर्न प्रतियोगिता आयोजना गर्न लागिएको टानका महासचिव कर्ण बहादुर लामाले बताए । प्रतियोगिता खुला पुरुष र महिला दुवैमा हुनेछ । प्रतियोगिताको दुवै समुहको विजेताले समान १ लाख रुपैयाँ प्राप्त गर्नेछन् ।
यस्तै दोस्रो हुनेले ७५ हजार, तेस्रो हुनेले ५० हजार प्राप्त गर्नेछ । प्रतियोगितामा नेपाली धावकको लागि १७ सय रुपैयाँ र विदेशी धावकहरुको लागि ५० अमेरिकी डलर दर्ता शुल्क तोकिएको छ । म्याराथन लाङटाङ राष्ट्रिय निकुञ्जकाे क्यान्जिङ गुम्वाबाट शुरु भई लाङटाङ गाउँ- थाङस्याप- घाडा, तवेला – लामा हाेटल-रिम्चे – शेपागाउ- खान्जिम-ब्रिदिम- लिङिलङ हुँदै स्याफ्रुबेशीमा सकिनेछ ।
टानले यसपटक करिव २० देशका धावकले सहभागिता जनाउने बताएको छ । टानले आगामी ५ वर्षमा २ सय भन्दा बढी अन्तराष्ट्रिय धावकहरुले सहभागिता जनाउन सक्ने अनुमान गरिएको छ । प्रतियोगता सञ्चालन गर्न करिब ४२ लाख रुपैयाँ खर्च हुने अनुमान आयोजकले गरेको छ । टानले अघिल्लो बर्ष हाफ म्याराथन आयोजना गरेको थियो ।
