काठमाडौं (हाम्रो खेलकुद)– नेपाली खेलाडीको सहयोगका लागि स्थापना भएको शीरिष फाउन्डेसनले अल्ट्रा धाविका मिरा राईलाई फिटनेसका लागि सहयोग गर्न सुरु गरेको छ । एन्टिरियर क्रुसिएल लिगामेन्ट (एसिएल) को शल्यक्रिया गरेकी मिरा पुनः दौडमा फर्कनका लागि प्रयासरत छिन् । त्यसका लागि उनले थेरापी गराइरहेकी छिन् ।

गत बर्ष इटालीको भेरोना अस्पतालमा घुँडाको शल्यक्रिया गराएयता उनले कुनै पनि प्रतिस्पर्धामा भाग लिएकी छैनन् । फ्रान्समा अगस्टमा हुने युटिएमबीको सिसिसी रेसमा भाग लिने योजनामा रहेकी मिरालाई अहिले थेरापीमा जुटेकी छिन् ।मिरा छिट्टै खेलमा फर्कन सकुन भन्ने उद्देश्यका साथ उनलाई पौडी पोखरीमा गरिने अक्वा थेरापी सुरु गरिएको बताइएको छ ।

शीरिष फाउन्डेसनका अध्यक्ष ओलम्पियन शीरिष गुरुङ,‘एसिएलको शल्यक्रियापछि उहाँ रिकभरीका लागि प्रयारत हुनुहुन्छ । पौडीबाट छिटो रिकभरी हुन्छ भन्ने जानकारी भएपछि डाक्टरसँग सल्लाह गरे’ शीरिषले भने,‘डाक्टरले पनि त्यसले रिकभरीमा मद्दत गर्ने बताइएपछि हामीले उहाँलाई सहयोग गर्न लागेका हौं ।’

सोमबार धन्वन्तरी पौडी पोखरीमा मिराको थेरापी सुरु गरिएको छ । उनको थेरापी फाउन्डेसनका सदस्य डाक्टर प्रयुस न्यौपानेले गरेका थिए । पौडी पोखरीको एक्वा थेरापीमा शीरिषले पनि सहयोग गरेका थिए । शीरिष आफै एमबिबिएस प्रवेश परिक्षाको तयारीमा छन् ।

मिराले पनि रिकभरीका लागि पानीमा गरिने थेरापी राम्रो भएको थाहा पाएर शीरिष फाउन्डेसनको सहयोग लिएको बताइन् । उनले सरकारले सम्मानका लागि बोलाएकाले गत साता स्वदेश फर्केको जनाइन् । डाक्टर न्यौपानेले मिरालाई एक्वा थेरापीसँगै रिएक्टिभ न्यूरोमस्कुलर तालिम पनि दिइने बताए ।

न्यौपानेले हावामा भन्दा पानीमा गरिने अभ्यास प्रभावकारी र चोटको सम्भावना कम हुने बताए । मिराको रिकभरीमा सहयोग गर्नका लागि केही सामानको पनि आवश्यकता रहेको र त्यो झिकाउने प्रक्रियामा रहेको फाउन्डेसनका सदस्य जगतमान श्रेष्ठले जानकारी दिए ।
फाउन्डेसनले उसुमा १२ औं दक्षिण एसियाली खेलकुद (साग) मा स्वर्ण पदक जितेकी नीमा घर्तीमगरलाई छात्रबृति दिइरहेको छ ।