काठमाडौं (हाम्रो खेलकुद)– नेपाली टोलीले हङकङमा हरेक वर्ष आयोजना हुने चर्चित ‘ओक्सफाम ट्रेलवाकर’ दौड यस पटक पनि जितेको छ ।  नेपाली सेनाका समिर तामाङ, तीर्थ तामाङ, वेदबहादुर सुनुवार र पूर्ण तामाङ सम्मिलित नेपाली टोलीले अन्य ५ हजार धावकहरुलाई पछि पारेका हुन् ।

अघिल्लो वर्ष नेपाली टोलीले कीर्तिमानी समयमा दौड पुरा गर्न केहि समयले चुकेकाले यस वर्ष पनि नेपाललाई उपाधिको दाबेदार मानिएको थियो । तर दौड अघि नेपाली टोलीले उपाधि नै प्राथमिकता रहेको र कीर्तिमान भने पछिको सोचाई रहेको बताएका थिए । दिनको तापक्रम ३० डिग्री(सेल्सियस अघिल्लो केहि वर्षभन्दा अधिक) थियो ।

त्यसैले नेपाली टोलीले कीर्तिमानतिर ध्यान नदिई दौड जित्नुलाई नै प्राथमिकता दिएको बताइएको छ । १ सय किलोमिटरको यस दौडमा नेपाली टोली ३० किलोमिटरमै अरु प्रतिद्वन्दिहरुभन्दा ३० मिनेटले अघि रहेको थियो । नेपालले आफ्नो दौड १२ घण्टा १ मिनेटमा पूरा गरेको हो ।

‘आज निकै गर्मी थियो । चेक पोइन्ट ८ पुग्न लाग्दा निकै उकालो थियो र हामीलाई गाह्रो पनि भइरहेको थियो’, नेपाली टोलीका तीर्थले बताए । यस ट्रेलवाकर दौड विश्वभरि नै सो विधाका धावकहरुका लागि निकै प्रख्यात र महत्त्वपूर्ण मानिन्छ । देश-विदेशबाट हजारौंको संख्यामा धावकहरु यस दौडमा सहभागी हुन आउने गर्छन् ।