काठमाडौं (हाम्रो खेलकुद) – रोजगारीका लागि विदेशिने खेलाडीको सुचिमा एथलेटिक्सकी कीर्तिमानी खेलाडी केशरी चौधरीको नाम पनि थपिएको छ । केशरी रोजगारीका लागि बुधबार संयुक्त अरब इमिरेट्स (युएई) को दुबई तर्फ लागेकी छिन् । त्यसतर्फ जानुअघि उनले नेपाल प्रहरीको जागिरबाट राजीनामा दिएको बताइएको छ ।

उनी दुबई पुलिसमा आबद्ध हुने बताइएको छ । अब उनले नेपाललाई प्रतिनिधित्व गर्ने सम्भावना कम रहेको छ । २६ वर्षे केशरीले आफ्नो नाममा रहेको राष्ट्रिय कीर्तिमानलाई दसौं पटक सम्म तोडेकी थिइन् । उनले सन् २००९ मा बर्लिनमा भएको विश्व च्याम्पियनसिपमा सय मिटर दौडमा पनि भाग लिएकी थिइन् । उनी महिला राष्ट्रिय क्रिकेट टोलीकी पूर्व सदस्य समेत हुन् ।

२००८ मा एसिसी युथ–१९ महिला च्याम्पियनसिपको उपाधि जित्दा उनी अलराउन्डरको भूमिकामा थिइन् । २०६७ सालदेखि नेपाल प्रहरीमा आबद्ध केशरीको नाममा अहिले पनि हाइजम्प, लङजम्प, ट्रिपल जम्प र सय मिटर हडल्र्समा गरी ४ राष्ट्रिय कीर्तिमान छन् । केशरीले बंगलादेशको ढाकामा भएको ११ औं  दक्षिण एसियाली खेलकुद (साग) मा देशको प्रतिनिधित्व गरेकी थिइन् ।

त्यस्तै भारतमा दुई वर्षअघि भएको १२ औं सागमा पनि चुनौति पेश गरेकी थिइन् । उनले पूर्वाञ्चलमा भएको सातौ राष्ट्रिय खेलकुदमा पनि ३ स्वर्ण र एक कास्य पदक जितेकी थिइन् । नेपाली एथलेटिक्सका प्रशिक्षक चन्द्र गुरुङले केशरी विदेशीदा ट्रयाक एन्ड फिल्डमा ठूलो क्षति पुग्ने बताए ।

‘उनी नेपाली एथलेटिक्सको प्रतिभाशाली खेलाडी हुन् । उनी विदेश गएपछि यसको असर नेपाली खेलकुदमा प्रष्ट देखिनेछ ’ सानै उमेरदेखि केशरीलाई प्रशिक्षण दिएका गुरुङले भने, ‘उनी नेपाल आएको बेलामा राष्ट्रिय तथा अन्तर्राष्ट्रिय खेल आयोजना नहुन सक्छ । केशरी पलायन पलाउन हुनु नेपाली एथलेटिक्सको लागि ठुलो घाटा हो ।’

उनलाई नजिकबाट चिन्ने खेलाडी अनुसार झन्डै ८ वर्ष पुलिसको जागिरे हुँदा पनि बढुवा नभएपछि उनी निरास भएर जागिर छाडेर विदेशिन परेको बताउँछन् ।