काठमाडौं (हाम्रो खेलकुद) – चौथो संस्करणको लुम्बिनी शान्ति म्याराथन प्रतियोगिता फागुन तेस्रो साता हुने भएको छ ।आयोजक लुम्बिनी पिस म्याराथनले काठमाडौंमा सोमबार पत्रकार सम्मेलन गरी फागुन १७ गते फागुपूर्णिमाको दिन लुम्बिनीमा चौथो लुम्बिनी शान्ति म्याराथन हुने जानकारी गराएको हो ।

प्रसिद्ध धार्मिकस्थल लुम्बिनीमा हुने चौथो संस्करणको प्रतियोगितामा ३ विधामा प्रतिस्पर्धा हुनेछ । म्याराथन (४२.१९५ किलोमिटर), हाफ म्याराथन र ५ किलोमिटर विधा रहेको छ । म्याराथनको विजेताले १ लाख रुपैयाँ प्राप्त गरेका छन् । प्रथम पुरस्कार ‘लुम्बिनी अशोक पिस पुरस्कार’ को नाममा राखिएको छ ।

दोस्रो हुनेले ७५ हजार नगदसहित मेडल हात पार्नेछन् । यो पुरस्कारको नाम ‘कपिलवस्तु हुएन सान पुरस्कार’ राखिएको छ । त्यस्तै, तेस्रो हुनेले ५० हजार रुपैयाँ पाउनेछन । यो पुरस्कारको नाम ‘मायादेवी गार्डेन उल्थान पुरस्कार’ राखिएको छ । फुल म्याराथनमा महिलाको सहभागिता सङ्ख्या कम भएकाले महिला पुरुष एकै विधामा राखिएको म्याराथन निर्देशक बैकुण्ठ मानन्धरले जानकारी गराए ।

हाफ म्याराथनतर्फको विजेताले ५० हजार, दोस्रोले ३५ हजार र तेस्रो हुनेले २५ हजार नगदसहित मेडल पाउनेछन् ।म्याराथन प्रतियोगितामा स्वदेशी तथा विदेशी गरी करिब २ सय ५० जना खेलाडीले भाग लिने आयोजकले दावी गरेको छ । प्रतियोगितामा नेपाल, भारत, चीन, अष्ट्रेलिया, कोरिया र बेलायत लगायतका राष्ट्रका खेलाडीले भाग लिनेछन् ।

म्याराथन प्रतियोगिता सिद्धार्थ गौतम बुद्धको रुपमा आफ्नो जन्मभूमि फर्केर बाबु राजा शुद्धोधनलाई भेटेको स्थान कुदानबाट सुरु भई गोटिहवा, कपिलवस्तु, बाणगंगा, तिलौराकोट, निग्लिहवा, अरोरकोट र दोहनी हुँदै लुम्बिनीमा टुंगिनेछ ।