काठमाडौं (हाम्रो खेलकुद) – नेपाली राष्ट्रिय बास्केटबल टोली फाइभ नेसन्स कप बास्केटबल च्याम्पियनसिपको पहिलो खेलमा भुटानसँग पराजित भएको छ ।

माल्दिभ्समा आजदेखि सुरु भएको प्रतियोगिताको पहिलो खेलमा नै नेपाल भुटानसँग स्तब्ध भएको हो । भुटानले नेपाललाई ६१-५५ को अन्तरले पराजित गरेको हो । पहिलो क्वाटरमा पछि परेको नेपालले त्यसपछि खेलमा फर्कने प्रयास गरेपनि भुटानको अग्रता उल्टाउन सकेन ।

पहिलो क्वाटरमा भुटान २१-१३ को अग्रतामा थियो । त्यसपछि नेपालले दोस्रो सेटमा राम्रो चुनौती पेस गरेपनि स्कोर ३६-२९ को स्थितिमा रहयो । तेस्रो सेटको अन्त्यमा भुटान ४८-४२ को अग्रतामा रहेको थियो । अन्तिम क्वाटरमा भुटानले आफ्नो अग्रता जोगाउँदै ६१-५५ को जित दर्ता गर्यो ।

हारपछि टोलीका प्रशिक्षक नृपेश श्रेष्ठले भुटानविरुद्ध राम्रो प्रदर्शन गर्न नसकेको स्वीकारे । उनले नेपालले आउने खेलमा राम्रो नतिजा ल्याउँदै अर्को चरणमा प्रवेश गर्न प्रतिस्पर्धा गर्ने बताए ।

आज हुने दोस्रो खेलमा बंगलादेश र माल्दिभ्सले खेल्नेछन् । नेपालले अब दोस्रो खेलमा विहीबार पाकिस्तानसँग खेल्नेछ । त्यसपछि नेपालले शनिबार बंगलादेश र आइतबार आयोजक माल्दिभ्सको सामना गर्नेछ ।

लिग चरणको शीर्ष ४ टोलीले मंगलबार सेमिफाइनलमा खेल्नेछन् । विहीबार फाइनल खेल हुनेछ ।