काठमाडौं (हाम्रो खेलकुद) – कंगारु एजुकेसन फाउन्डेसनले नेपाल बास्केटबल लिगसँग साझेदारी गर्ने भएको छ । प्ले फर डिप्राइभ्ड चिल्ड्रेन नेपाल (पिडिसिएन) को आयोजनमा वैशाख ७ देखि शुरु हुन गइरहेको लिगका लागि कंगारु शैक्षिक साझेदारको रुपमा भित्रिएको हो ।
नेपालकै सर्वाधिक ठूलो बास्केटबल प्रतियोगितामा ८ टिमको सहभागिता रहनेछ । डबल राउण्ड रोबिन लिगका आधारमा होम एण्ड अवे आधारमा खेलाइने लिगको यो दोस्रो संस्करण हो । पिडिसिएनका प्रतिनिधि नमितबहादुर थापा र फाउन्डेसनका प्रमुख कार्यकारी अधिकृत महेश बाबु तिमिल्सिनाले शुक्रबार एक कार्यक्रममाझ सम्झौता पत्रमा हस्ताक्षर गरे ।
सम्झौताअनुसार फाउन्डेसनले लिगको प्रथम स्थान हात पार्ने टोलीको पुरस्कार राशीको प्रायोजन गर्नेछ । प्रतियोगिताको पुरस्कार राशी भने खुल्न अझै बाँकी रहेको छ । यस्तै लिगको तथ्यांक संकलनका लागि पनि फाउण्डेसनले सहयोग गर्नेछ । पिडिएसन नेपाल सरकार र समाज कल्याण परिषद अन्तर्गत रहेर काम गर्दै आइरहेको एउटा गैरसरकारी संस्था हो । प्रतियोगिताको पहिलो संस्करण क्विक्स बास्केटबल लिगको नाममा आयोजना गरिएको थियो ।
राष्ट्रिय बास्केटबल टोली तथा त्रिभुवन आर्मी क्लबका कप्तान सदिश प्रधानले फाउन्डेसनले दिएको सहयोगका लागि धन्यबाद दिए । यस्तै फाउन्डेसनका तिमल्सिनाले घरेलु बास्केटबलकै ठूलो प्रतियोगिता गर्न सफल पिडिसिएनको सराहना गरे । ‘ यस प्रतियोगिताले नेपाली बास्केटबललाई नयाँ दिन सक्छ । आशा गरौं यो अझ ठूलो र उत्कृष्ट बन्दै जानेछ,’ उनले भने ।
प्रतियोगिताको पहिलो संस्करणमा गोल्डेन गेट इन्टरनेशनल कलेजले आर्मीलाई पराजित गर्दै उपाधि जितेको थियो । दोश्रो संस्करणको थप जानकारी चाडै नै सार्वजनिक गर्ने आयोजकले जनाएको छ ।
