बास्केटबलमा आर्मी र पुलिसलाई स्वर्ण

दाङ (हाम्रो खेलकुद)– आठौं राष्ट्रिय खेलकुदअन्तर्गत बास्केटबलको उपाधि विभागिय टोलीले जितेका छन् । पुरुषतर्फ त्रिभुवन आर्मी क्लब र महिलातर्फको उपाधि अर्को विभागिय टोली नेपाल पुलिस क्लबले जितेको छ ।

दाङको घोराहीमा भएको प्रतियोगिताको पुरुषमा आर्मीले प्रदेश ३ लाई ७६–५८ ले पराजित गर्दै स्वर्ण जितेको हो । प्रतिस्पर्धात्मक बनेको पहिलो क्वाटरमा आर्मी १४–१२ ले अघि रहेको थियो ।

तर, दोस्रो र तेस्रो क्वारटमा आर्मीले २७–१२ र २२–१३ ले अघि बढेपछि सहज जित निकाल्यो । आर्मीको जितमा रामकृष्ण घतानेले सर्वाधिक २३ स्कोर गरे । पुलिसले कास्य पदक प्राप्त गर्यो ।
महिलातर्फको फाइनलमा अनुशा मल्लले सर्वाधिक १३ स्कोर गरेपछि पुलिसले प्रदेश ३ लाई ४५–२९ को स्कोरले हराउदै स्वर्ण पदक जितेको छ ।

पुलिसले पहिलो क्वाटर ९–४ को अग्रता बनाएको थियो । दोस्रोमा ५–८ ले पछि परेपनि पुलिसले तेस्रो १५–११ र चौथो क्वाटरमा १४–६ को अग्रता बनाएपछि ४५–२९ को सहज जित निकाल्न सफल भयो । आर्मीले कास्य पदक जित्यो ।