काठमाडौं (हाम्रो खेलकुद) – शीर्षक्रमकी ब्याटर इन्दु बर्माले कतारसँगको पहिलो टि२० आई खेलमा नेपालको लागि ऐतिहासिक अर्धशतक प्रहार गरेकी छिन् । कतारको दोहारमा रहेको वेस्ट इन्ड इन्टरनेशल क्रिकेट स्टेडियममा टस हारेर ब्याटिङको निम्तो पाएको नेपालले १७ ओभरमा ३ विकेट गुमाउँदै १ सय ३० रन बनाएको छ ।

इन्दु बर्मा ४७ बलमा ५ चौका सहित ५५ रनमा अविजित छिन् । इन्दुले ४५ बलमा अर्धशतक पूरा गर्दै नेपालका लागि डब्लूटि२० आईमा पहिलो अर्धशतक प्रहार गर्ने कीर्तिमान राखेकी हुन् । यसअघि डब्लूटि२० आई मा नेपाली महिला टोलीबाट उच्च प्रदर्शन सीता राना मगरको नाममा इन्डोनेसियाविरुद्ध २०१९ मा ४८ रन थियो । सीता आजको खेलमा ३३ बलमा ५ चौका सहित ३९ रनमा आउट भइन् ।

दोस्रो विकेटका लागि इन्दु बर्मा र सीताले ८८ रनको कीर्तिमानी साझेदारी गरेका थिए । यो नेपाली महिला टि२० आई खेलमा बनेको हालसम्मकै उच्च साझेदारी हो । यसअघि इन्दु र सीतालेनै दोस्रो विकेटका लागि इन्डोनेसियाविरुद्ध गरेको ७० रनको साझेदारी उच्च थियो । सबिजा प्रनाायनको १२ औं चौथो बलमा विकेटकिपर रिज्फा बानोबाट स्टम्पिङ आउट भएपछि सीता अर्धशतक बनाउन चुकेकी थिइन् । दुई बलपछि कप्तान रुविना क्षेत्री बेलबास शून्यमा रन आउट भएकी थिइन् ।

नेपालले ओपनर काजल श्रेष्ठलाई दोस्रो ओभरको पाँचौं बलमा ब्यक्तिगत ३ रनमा गुमाएको थियो । एन्जेलिन मारेको बलमा काजल कटएण्ड बोल्ड आउट भएकी थिइन् । सरिता मगर १६ रनमा अविजित छिन्।

अपडेट : इन्दुको अर्धशतकमा नेपालको कतारलाई कीर्तिमानी लक्ष्य