काठमाडौं (हाम्रो खेलकुद) – नेपाली महिला क्रिकेट टोलीकी शीर्षक्रमकी ब्याटर इन्दु बर्मा कतारसँगको पहिलो डब्लूटि२० आई खेलमा प्लेयर अफ द म्याच चुनिएकी छिन् । नेपाललाई सानदार जित दिलाउन इन्दुले कीर्तिमानी अर्धशतक प्रहार गरेकी थिइन् ।

मंगलबार नेपालले पहिलो खेलमा कतारलाई १ सय १९ रनको फराकिलो अन्तरले हराएको छ । इन्दुले ४७ बलमा ५ चौका सहित ५५ रनको अविजित इनिङ खेल्दै रिटायर्ट हर्ट भएकी थिइन् । इन्दुको अर्धशतकमा दोहामा रहेको वेस्ट इन्ड इन्टरनेशल क्रिकेट स्टेडियममा टस हारेर पहिला ब्याटिङ थालेको नेपालले निर्धारित २० ओभरमा ४ विकेट गुमाउँदै १ सय ४६ रन बनाएको थियो । इन्दु बाहेक नेपालबाट सीता रानामगरले ३३ बलमा ५ चौका सहित ३९ र सरिता मगरले २१ बलमा २ चौका सहित २१ रन बनाएका थिए ।

जितको लागि १ सय ४७ रनको विजयी लक्ष्य पछ्याएको कतार ११.५ ओभरमा २७ रनमा अल आउट भयो । कतारकी खादिजा इम्तियाज र एन्जेलिन मारेले सर्वाधिक ८(८ रन बनाए । नेपालको उत्कृष्ट बलिङ सामु घरेलु टोली कतारका ७ खेलाडीले खाता नखोली आउट भएका थिए । नेपालको घातक बलिङ सामु कतारका कुनै पनि ब्याटरले दोहोरो अंकमा रन बनाउन सकेनन् ।

नेपालकी कप्तान रुविना क्षेत्री बेलबासेले १.५ ओभरमा १ रन खर्चेर ३ विकेट लिइन् । सीता रानामगरले २ ओभरमा १ मेडन सहित ३ रन खर्चेर २ विकेट लिइन् । कविता कुँवरले २ ओभरमा ६ रन खर्चेर २ विकेट लिइन् । करुणा भण्डारीको नाममा १ विकेट रह्यो ।

इन्दु नेपालका लागि डब्लूटि२० आईमा अर्धशतक प्रहार गर्ने पहिलो खेलाडी बनेकी छिन् । इन्दु अघि नेपाली महिला टोलीको टि२० आईमा उच्च प्रदर्शन सीता राना मगरको नाममा सन् २०१९ मा इन्डोनेसियाविरुद्ध ४८ रन थियो । तीन डब्लूटि२० आई सिरिजमा नेपालले १–० को अग्रता लिएको छ । नेपालले कतारसँग दोस्रो खेल बुधबार र तेस्रो खेल बिहीबार खेल्नेछ । नेपालले आइसिसी वुमन्स टि२० एसिया छनोट अघि तयारीको लागि कतारसँग तीन टि२० आई सिरिज सिरिज खेलेको हो ।

यो पनि : कतारमाथि नेपालको सानदार जित