काठमाडौं (हाम्रो खेलकुद) – इन्डियन प्रिमियर लिग (आइपिएल) २०२२ को मेगा अक्सन अघि न्युजिल्यान्डका कप्तान केन विलियम्सनको सनराइजर्स हैदराबादमा तलब १४ करोड भारु हुने भएको छ ।

हैदराबादले केन विलियम्सनसँगै अब्दुल सामद र उमर मलिकलाई टोलीमा राखेको छ । हैदराबादले पूर्व कप्तान तथा अष्ट्रेलिया ओपनर डेविड वार्नर, इंल्यान्डका जोनी बेयरस्टो र अफगानिस्तानका स्टार लेग स्पिनर राशिद खान लगायतका खेलाडीलाई फुकुवा गरेको छ । विलियम्सनको मूल्य एक सिजनको १४ करोड रहने छ । यसअघि हैदराबादमै विलियम्सनको पारिश्रमिक ३ करोड भारु थियो । अब्दुल सामदको तलब पनि २० लाखबाट बढेर ४ करोड पुगेको छ । भारतकै सर्वाधिक गतिका युवा बलर उमर मलिकले ४ करोड पाउने छन् ।

कोलकताले वेस्टइन्डिजका स्टार अलराउन्डर आन्द्रे रसेल, स्पिनर सुनिल नारायण, भारतीय स्पिनर बरुण चक्रवर्ती र वेंकटेश ऐरलाई अनुबन्ध गर्ने भएको छ । रसेलको तलब १२ करोड, नारायणको ६ करोड, ऐर र चक्रवर्तीलाई ८–८ करोड भारु हुनेछ । रसेलको यसअघि कोलकतामा तलब ८ करोड ५० लाख भारु थियो । विष्फोटक ब्याटर रसेलले यस पटक महँगो मूल्य पाएका हुन् ।

अलराउन्डर सुनिल नारायणको भने १२ करोड ५० लाखबाट ६ करोड भारुमा झरेको छ । साविक उपविजेता कोलकताले ओपनर सुभमन गिल, कप्तान ओईन मोर्गन, प्याट कमिन्स लगायतका खेलाडीलाई फकुवा गरेको छ । २०२० को अक्सनमा कमिन्सलाई कोलकताले १५ करोड ५० लाख भारुमा अनुबन्ध गरेको थियो ।

राजस्थान रोयल्सले इंग्ल्यान्डका बेन स्टोक्स र जोफ्रा आर्चरलाई फुकुवा गरेको छ । इंग्ल्यान्डका विकेटकिपर जस बटलरलाई १० करोड भारुमा टोलीमै राखेको छ । बटलरको राजस्थानमा यस ४ करोड ४० लाख भारु तलब थियो । कप्तान सन्जु स्यामसनको तलब १४ करोड पुगेको छ । सन्जुको पारिश्रमिक ८ करोडबाट १४ पुगेको हो । युवा ओपनर यशस्वी जैशवाललाई राजस्थानले ४ करोडमा अनुबन्ध गरेको छ ।