काठमाडौं (हाम्रो खेलकु) – नेपाल क्रिकेट संघ (क्यान) को सचिव पदमा उठ्न राष्ट्रिय क्रिकेट टोलीको छनोट समितिका संयोजक उत्तम कर्माचार्यले पदबाट राजीनामा दिएका छन् ।

नेपाली क्रिकेट टोलीका पहिलो कप्तान समेत रहेका उनले क्यानको आगमी वार्षिक साधरण सभालाई मध्यनजर गर्दै राजीनामा दिएको हाम्रो खेलकुदलाई जानकारी दिए ।

क्यानले उनलाई गतवर्ष मंसिरमा छनोट समितिको संयोजक तोकेको थियो । गत असोजमा सचिव अशोकनाथ प्याकुरेलले पदबाट राजीनामा दिएका थिए । सचिवसँगै उपाध्यक्ष राजुबाबु श्रेष्ठले पदबाट राजीनामा दिएका थिए ।

क्यानले कार्यवाहक सचिवको जिम्मेवारी प्रशान्त विक्रम मल्ललाई दिएको थियो । क्यानको मंसिर १४ र १५ गते धनगढीमा हुने वार्षिक साधरण सभामा सचिव पदमा उत्तम र प्रशान्त चुनावमा उठ्ने छन् ।

समितिलाई पूर्णता भने दिइएको छैन । क्रिकेट समिति र छनोट समितिका अन्य सदस्यहरु संघको आगमी बैठकबाट थप गरिने जनाएको छ । क्यान निलम्बनसँगै राष्ट्रिय क्रिकेट टोलीको छनोट कप्तान, प्रशिक्षक र आइसीसीका प्रतिनिधित्वले गर्दै आएका थिए ।

सन् १९९६ मा मलेसियामा भएको प्रथम एसिसी ट्रफि इलेट कप नेपालले पहिलो अन्तर्राष्ट्रिय खेलबाट औपचारिक सुरुवात गर्दा नेपाली क्रिकेट टोलीको कप्तानी गरेका थिए।