काठमाडौं (हाम्रो खेलकुद)– थाइल्यान्डमा जारी एसिसी महिला एसिया कप टि ट्वान्टीको पहिलो खेलमा शनिबार नेपाल ९ विकेटले पराजित भएको छ । ४८ रनको झिनो लक्ष्य पछ्याएको पाकिस्तानले १० ओभरमा १ विकेट गुमाउँदै जित हासिल गरेको थियो ।
पाकिस्तानका लागि रनआउट हुनुअघि ओपनर आयशा जाफरले २६ रन बनाइकी थिइन् । अर्की ओपनर जाभिरिया वाडुडले अविजित १६ र नैन अविदीले अविजित ३ रन बनाइन् ।
त्यसअघि टस जितेर पहिले ब्याटिङ गरेको नेपालले १८.१ ओभर ४७ रन मात्र बनाउन सक्यो । नेपाली टोलीका लागि सबैभन्दा बढी कप्तान रुविना क्षेत्रीले ११ रन बनाइन् । अन्य कुनै पनि खेलाडीले दोहोरो अंकमा रन जोड्न सकेनन् । ओपनर ज्योति पाण्डे र इन्दु बर्माले समान ८ रन बनाए । करुणा भण्डारीले १ चौकासहित ६ रन बनाइन् । अर्की ओपनर काजल श्रेष्ठले १, नीरा राजोपाध्यायले २, सरिता मगरले १ रन बनाइन् । सिता मगर,नेरी थापा,सरस्वती कुमारी र सवनम कुमारी खाता पनि खोल्न सकेनन् ।
पाकिस्तानका लागि अमन अमिन, साना मिर र सादिया युसुफले समान २, इस्माभिया इक्वाल र विस्मा मारुफले समान १ विकेट लिए । नेपालले अर्को खेल सोमबार श्रीलंकासँग खेल्नेछ ।
