एजेन्सी – इन्डियन प्रिमियर लिग (आइपिएल) विश्वकै सर्वाधिक लोकप्रिय र धनी फ्रेन्चाइज क्रिकेट लिग हो । आइपिएलमा खेलाडीले नाम र दाम निकै राम्रो पाउँछन् । त्यसैले आइपिएल खेल्ने धेरैको चाहना र सपना हुन्छ । एसोसिएट खेलाडीको लागि आइपिएल आफ्नो देशपछि सर्वाधिक ठूलो सपना रहने गर्दछ ।

पाकिस्तान बाहेक अन्य विश्वका स्टार खेलाडीको संगम आइपिएलमा हुने गर्दछ । आइपिएलले एक रातमै खेलाडीलाई करोडपति बनाएको उदाहरण छ । कुनैपनि टोलीको लागि आइपिएल मेगा अक्सन निकै महत्त्वपूर्ण हुन्छ । मेगा अक्सनको आधारमा रहेर खेलाडीले उक्त टोलीबाट कम्तिमा तीन संस्करण खेल्नुपर्ने हुन्छ ।

हरेक फ्रेन्चाइज टोली स्टार र म्याच विनर खेलाडी टोलीमा अनबुन्ध गर्न कडा प्रतिस्पर्धा गर्दछन् । तर स्टार खेलाडीलाई अनुबन्ध गरेर मात्र हुँदैन । टिम सन्तुलनको लागि हरेक पक्षमा ध्यान दिनुपर्ने हुन्छ । अक्सनमा लिने खेलाडीले फ्रेन्चाइज टोलीको उपाधि यात्रा निर्धारण गर्नसक्छ ।

नाम, क्षमता, प्रदर्शन, लय र युवा प्रतिभा हेरेर फ्रेन्चाइज टोली अक्सनमा खेलाडीमाथि बोली लगाउने गर्दछन् । पछिल्लो संस्करण, एक वर्षयता खेलाडीको लय र अन्तर्राष्ट्रिय प्रदर्शन महत्वपूर्ण हुन्छ । आइपिएल मेगा अक्सन फ्रेब्रुअरी १२ र १३ मा बेंगलोरमा हुँदैछ । आइपिएलमा यस सिजनदेखि १० फ्रेन्चाइज टोली हुनेछन् ।

सबै फ्रेन्चाइज टोलीले नयाँ टिम निर्माण गर्नु पर्ने हुँदा म्याच विनर स्टार खेलाडीलाई धेरै टोलीले भित्र्याउन खोज्नेछन् । तर एक टोलीले अक्सनमा ९० करोड भारु भन्दा खर्चिन पाउँदैन । त्यसैले आफ्नो बजेटलाई हेर्दै पूरा टिम निर्माण गर्नुपर्ने हुन्छ । एउटा टोलीले बढीमा २५ खेलाडी अनुबन्ध गर्न सक्छन् । ८ विदेशी खेलाडी एक टोलीमा रहनसक्छन् ।

आइपिएल २०२२ को मेगा अक्सनमा कुल ५ सय ९० खेलाडी सहभागी हुनेछन् । ३ सय ७० भारतीय र २ सय २० विदेशी खेलाडी अक्सनमा सहभागी हुनेछन् । अक्सनमा सबै स्टार खेलाडी महँगो मूल्यमा विक्छन् भन्ने हुँदैन । त्यो खेलाडी फ्रेन्चाइज टोलीको आवश्यकमा निर्भर हुनसक्छ । आइपिएल मेगा अक्सन २०२२ मा पैसाको वर्षा हुन सक्ने १० स्टार खेलाडी यस प्रकार छन् ।

१०. रविचन्द्रन आश्विन (भारत)

भारतीय सर्वाधिक अनुभवी स्पिनर रविचन्द्रन आश्विन महँगो मूल्यमा विक्न सक्ने सम्भावित खेलाडी हुन् । उनी स्पिनसँगै तल्लोक्रममा राम्रो ब्याटिङ गर्नेगर्दछन् । उनलाई दिल्ली क्यापिटल्सले फुकुवा गरेको थियो । उनीसँग दिल्ली, चेन्नई, पन्जाब र पुणेबाट खेलेको अनुभव छ ।
अनुभवी खेलाडी हुँदा पनि फ्रेन्चाइज टोली अनुबन्ध गर्न बढी रुचाउने गर्दछन् ।

दबाबमा अनुभव निर्णायक बन्नसक्छ । अर्कोतर्फ आश्विनले अन्तर्राष्ट्रिय र आइपिएल दुबैमा उत्कृष्ट प्रदर्शन गर्दै आएका छन् । आश्विनले १ सय ६७ आइपिएलमा १ सय ४५ विकेट लिएक छन् । आश्विन भारतीय स्पिन अलराउन्डरमा पहिलो रोजाईका अक्सनका खेलाडी हुँदा महँगो मूल्यमा विक्न सक्ने अनुमान गरिएको छ । आश्विनले अक्सनमा २ करोड न्यूनतम मूल्य तोकेका छन् ।

९. वानिन्दु हसरंगा (श्रीलंका)

श्रीलंका स्पिन अलराउन्डर वानिन्दु हसरंगा अक्सनमा उपलब्ध उत्कृष्ट म्याच विनर खेलाडी हुन् । वानिन्दु वर्तमान समयका उत्कृष्ट लेगस्पिनरमा पर्दछन् । तल्लोक्रममा त्यतिनै राम्रो ब्याटिङको क्षमता उनीमा छ । वानिन्दुले श्रीलंकाबाट निरन्तर सानदार प्रदर्शन गर्दै आएका छन् । वानिन्दु वर्तमान टि२० आइसिसी विश्व वरियता शीर्षस्थानका बलर हुन् । अलराउन्डरतर्फ चौथो स्थानमा छन् ।

वानिन्दुले अन्तर्राष्ट्रिय क्रिकेटमा लगातार म्याच विनिङ प्रदर्शन गर्दै आएका छन् । हरेक फ्रेन्चाइज टोली उनलाई अनुबन्ध गर्न खोज्ने देखिन्छ । भारतका अधिकाम्स पिचहरु स्पिनरलाई अत्याधिक फाइदा पुग्ने छन् । वानिन्दुले ८३ टि२० खेलमा तीन अर्धशतक सहित ९ सय ७९ रन बनाउनुको साथैं १ सय १० विकेट लिएका छन् ।

वानिन्दु गतवर्ष स्पिनर एडम जाम्पाको स्थानमा बंगलोरबाट दोस्रो सिजनको खेल खेलेका थिए । यस सिजनमा उनले महँगो मूल्य पाउने अनुमान गरिएको छ । उनले न्यूनतम मूल्य १ करोड राखेका छन् ।

८. मिचेल मार्श (अष्ट्रेलिया)

अष्ट्रेलियाले २०२१ मा टि२० विश्वकप जित्दा मार्श फाइनलका नायक थिए । टि२० क्रिकेटमा उनले प्रभावशाली प्रदर्शन गर्दै आएका छन् । उनी मध्यगतिका राम्रो बलर हुन् । मार्शले टि२० विश्वकप फाइनलमा न्युजिल्यान्डविरुद्ध ५० बलमा ७ चौका र ४ छक्कासहित ७७ रनको अविजित इनिङका साथ प्लेयर अफ द फाइनल चुनिएका थिए ।

यसै साता सम्पन्न बिग ब्यास लिगमा पर्थ स्कोचर्सलाई च्याम्पियन बनाउन उनको योगदान महत्वपूर्ण थियो । मार्शले होबार्ट हरिकेन्सविरुद्ध १ सय रनको अविजित इनिङ खेलेका थिए । उच्च लयमा रहेका मार्शले बिग ब्यासमा ८ खेलमा ३ सय ४७ रन बनाउनुको साथै ५ विकेट लिएका थिए । मार्शले सनराइजर्स हैदराबाद, राइजिङ पुणे सुपरजाइन्ट र डेक्कन चार्जसबाट आइपिएल खेलि सकेका छन् ।

शीर्षक्रमका भरपर्दा ब्याटर मार्श टिमको आवश्यक अनुसार आक्रामक र संयमित दुबै शैलीमा खेल्न सक्ने खेलाडी हुन् । उच्च लय, म्याच विनर अलराउन्डर र अनुभवी खेलाडी हुँदा अक्सनमा महँगो मूल्य पाउन सक्ने अनुमान गरिएको छ । मार्शले २ करोड आफ्नो न्यूनतम मूल्य तोकेका छन् ।

७. ईशान किशन (भारत)

विकेटकिपर ब्याटर ईशान किशन भारतका उत्कृष्ट आक्रामक ब्याटर हुन् । बायाँ हाते ब्याटर किशन ब्याटिङसँगै विकेटकिपर हुन् । फ्रेन्चाइज टोली किशनलाई दीर्घकालिन कप्तानको रुपमा सोच्न सक्छन् । पन्जाब किंग्स, कोलकता नाइट राइडर्स, रोयल च्यालेन्जर्स बेंगलोर कप्तानको खोजीमा छन् । चेन्नई पनि यससिजनपछि कप्तानको खोजिमा हुनेछ । धोनीपछि चेन्नई किशनलाई दीर्घकालिन कप्तान बनाउन सक्छ ।

किशन टि२० का भारतीय विशेष पर्दछन् । मुम्बईलाई २०२० को उपाधि जिताउन ईशानले १४ खेलमा ५ सय १६ रनका साथ उत्कृष्ट प्रदर्शन गरेका थिए । किशन ओपनिङ र मध्यक्रम दुबैमा राम्रो ब्याटिङ गर्नेगर्दछन् । आक्रामक र ठूला सटका लागि निकै माहिर छन् । किशनले टि२० आईमा इंग्ल्यान्ड र ओडिआईमा श्रीलंकाविरुद्ध डेब्यूमै अर्धशतक बनाएका थिए ।

किशन ओडिआई र टि२० आई डेब्यूमै अर्धशतक प्रहार गर्ने पहिलो भारतीय खेलाडी हुन् । किशनले १ सय १० टि२० खेलमा २ शतक र १५ अर्धशतक सहित २ हजार ७ सय २६ रन बनाएका छन् ।

२०१६ मा किशनको कप्तानीमा भारतले यू१९ विश्वकपमा फाइनल यात्रा गरेको थियो । किशन आक्रामक ब्याटर, विकेटकिपर, उत्कृष्ट लय र कप्तानको सम्भावना हुँदा महँगो मूल्य पाउन सक्छन् । किशनले २ करोड न्यूनतम मूल्य राखेका छन् ।

६. प्याट कमिन्स (अष्ट्रेलिया)

अष्ट्रलिया तीव्र गतिका बलर तथा टेस्ट कप्तान प्याट कमिन्सलाई कोलकता नाइट राइडर्सले फुकुवा गरेको थियो । २०२० को अक्सनमा कमिन्सलाई कोलकताले कीर्तिमानी मूल्य १५ करोड ५० लाख भारुमा अनुबन्ध गरेको थियो । त्यस समय लिलामीमा पाएको सर्वाधिक मूल्य थियो ।

तर २०२१ मा उक्त कीर्तिमान क्रिस मोरिसले १६ करोड २५ लाख भारुमा राजस्थान रोयल्समा अनुबन्ध भएको थियो । कमिन्सको अनुशान लाइन एण्ड लेन्थमा बलिङ गर्नुको साथै उनको बलमा स्विङ हुने गर्दछ । तल्लोक्रममा कमिन्सले ठूलो सटको क्षमता पनि राख्छन् । कमिन्सलाई यस सिजनमा पनि महँगो मूल्यमा अनुबन्ध गर्ने अनुमान गरिएको छ । २ करोड कमिन्सको अक्सनमा न्यूनतम मूल्यको रुपमा छ ।

५.युजभेन्द्र चहल (भारत)

भारतीय लेगस्पिनर युजभेन्द्र चहल आइपिएलमा महँगो मूल्यमा विक्न सक्ने खेलाडी हुन् । बेंगलोरले सबैलाई आश्चर्य पार्दै चहललाई फुकुवा गरेको थियो । चहल म्याच विनर स्पिनर हुन् । उनले मध्यक्रममा विकेट लिँदै विपक्षलाई धराशायी बनाउने गर्दछन् ।

२०१८ मा चहललाई किन्न पन्जाब, मुम्बई, राजस्थान हुँदै अन्तिममा बेंगलोरले ६ करोड भारुमा अनुबन्ध गरेको थियो । चहलले २०१३ मा मुम्बईबाट कोलकाताविरुद्ध डेब्यू गरेका थिए । चहलले आइपिएलमा हालसम्म १ सय १४ खेलमा १ सय ३९ विकेट लिएका छन् । चहलले अक्सनमा २ करोड भारु न्यूनतम मूल्य तोकेका छन् । महँगो मूल्यमा विक्ने अनुमान गरिएको छ ।

४. लियाम लिभिङस्टोन (इंग्ल्यान्ड)

इंग्ल्यान्डका शीर्षक्रमका ब्याटर लियाम लिभिङस्टोन आक्रामक ब्याटिङको लागि माहिर छन् । अग्ला कदका लिभिङस्टोन ठूला ठूलाको क्षमता राख्छन् । पार्टटाइम बलरमा उनले लेगस्पिनर र अफ स्पिन दुबै गर्दछन् ।

गत जुलाईमा उनले पाकिस्तानविरुद्ध पहिलो टि२० आई खेलमा पाँचौं नम्बरमा ब्याटिङ गर्दै ४३ बलमा ६ चौका र ९ छक्कासहित १ सय ३ रनको उत्कृष्ट इनिङ खेलेका थिए । टि२० विश्वकप सेमिफाइनलमा न्युजिल्यान्डविरुद्ध उत्कृष्ट प्रदर्शन गरेका थिए ।

उनी मध्यक्रमका भरपर्दा ब्याटर हुन् । विष्फोटक ब्याटिङ शैली र बलिङमा भेराइटी हँुदा उनलाई फ्रेन्चाइज लिगले पैसाको वर्षा गराउन सक्छन् । उनले १ करोड न्यूनतम मूल्य तोकेका छन् ।

३. श्रेयस ऐर (भारत)

श्रेयस ऐर भारतीय उत्कृष्ट मध्यक्रमका ब्याटर हुन् । ऐरले एक फ्रेन्चाइज टोलीको कप्तानी गर्ने उच्च सम्भावना छ । उनीसँग नेतृत्वको राम्रो अनुभव र क्षमता छ । ऐरको कप्तानीमा दिल्ली क्यापिटल्स २०२० मा पहिलो पटक फाइनलमा पुगेको थियो । २०१८ मा गौतम गम्भीरले कप्तानी छाडेपछि दिल्लीले ऐरलाई कप्तानी दिएको थियो ।

घरेलु क्रिकेटमा मुम्बईको नेतृत्व गर्ने गर्दछन् । ऐरले मध्यक्रममा जिम्मेवारीका साथ परिपक्क प्रदर्शन गर्दछन् । आफ्नो उत्कृष्ट प्रदर्शनमा टोलीलाई राम्रो योगफलमा पुर्याउन सक्छन् । २०२१ को सुरुवातमा चोटका कारण आइपिएल गुमाएपछि दिल्लीको नेतृत्व विकेटकिपर ऋषभ पन्तले गरेका थिए । १० टोलीलाईनै मध्यक्रमका एक भरपर्दो ब्याटर आवश्यक पर्दछ । सबै टोलीको नजर ऐरमाथि हुनेछ ।

पन्जाब, बेंगलोर र कोलकता कप्तानको रुपमा उनलाई भित्र्याउन चाहन्छन् । चेन्नईपनि धोनीपछिको कप्तानको रुपमा हेर्न सक्छ । मध्यक्रमका एक भरपर्दा ब्याटर र कप्तानी गुण हुँदा ऐर महँगो मूल्यमा विक्ने देखिन्छ । २०१५ देखि दिल्लीबाट अइपिएल खेल्दै आएका ऐरले ८७ खेलमा १६ अर्धशतक सहित २ हजार ३ सय ७५ रन बनाएका छन् । ऐरले न्यूनतम मूल्य २ करोड राखेका छन् ।

२. डेविड वार्नर (अष्ट्रेलिया)

अष्ट्रेलिया बायाँ हाते ओपनर डेविड वार्नर वर्तमान समयका एक उत्कृष्ट ओपनर हुन् । २००९ देखिनै आइपिएल खेल्दै आएका वार्नरले २०१५ देखि २०२१ सम्म सनराइजर्स हैदराबादको नेतृत्व गर्दै उत्कृष्ट प्रदर्शन गरेका थिए । वार्नरको कप्तानीमा २०१६ मा हैदराबादले उपाधि जितेको थियो । आइपिएलमा तीन ओरेन्ज क्याप जित्ने वार्नर एक्लो खेलाडी हुन् ।

वार्नरले २०१५, २०१७ र २०१९ मा सर्वाधिक रनका साथ ओरेन्ज क्याप जितेका थिए । वार्नर लयमा आएपछि विशाल इनिङ खेल्ने गर्दछन् । आक्रामक सुरुवाता दिलाउछन् । वार्नर एक्लै खेल जिताउन सक्ने आक्रामक ब्याटर हुन् । वार्नरले १ सय ५० आइपिएल खेलमा ४ शतक र ५० अर्धशतक सहित कुल ५ हजार ४ सय ४९ रन बनाएका छन् । आइपिएल इतिहासकै सर्वाधिक रन बनाउने ब्याटरमा पाँचौं स्थानमा छन् । विदेशीतर्फ शीर्षस्थानमा छन् ।

२०२१ मा वार्नरको प्रदर्शन सम्झन लायक रहेन । त्यसपछि वार्नरलाई हटाउँदै केन विलियम्सनलाई कप्तानी दिएको थियो । त्यसैको कारण वार्नरले हैदराबादसँगको यात्रा अन्त्य गर्दै नयाँ टोली जाने निर्णय लिएका हुन् । हैदराबादमा वार्नरले १२ करोड ५० लाख भारु पारिश्रमिक पाउँदै आएका थिए । वार्नर लयमा फर्किएका छन् ।

कमजोर मानिएको अष्ट्रेलियालाई टि२० विश्वकप २०२१ को उपाधि जिताउन वार्नरले प्लेयर अफ द टुनामेन्ट प्रदर्शन गरेक थिए । सबै फ्रेन्चाइज टोली वार्नरलाई भित्र्याउन चाहन्छन् । विशेषगरि कप्तानको खोजीमा रहेका फ्रेन्चाइज टोलीहरुमा वार्नर पहिलो रोजाईमा हुनेछन् । वार्नरले २ करोड भारु न्यूनतम मूल्य तोकेका छन् ।

१. कागिसो रबाडा (दक्षिण अफ्रिका)

दक्षिण अफ्रिका तीव्र गतिका कागिसो रबाडा आइपिल अक्सनमा सर्वाधिक महँगो मूल्यमा विक्न सक्ने सम्भावित खेलाडी हुन् । रबाडा तीव्र गति, योर्कर र म्याच विनर बलर हुन् । रबाडाले आइपिएलमा लगातार उत्कृष्ट प्रदर्शन गर्दै आएका छन् । दिल्लीले सबैलाई आश्चर्य पार्दै रबाडालाई फुकुवा गरेको थियो ।

रबाडा लगातार १ सय ५० प्रतिघण्टा किलोमिटरको रफ्तारमा बलिङ गर्नसक्ने खुबी भएका खेलाडी हुन् । रबाडा डेथ ओभरका विश्वकै घातक बलरमा पर्दछन् । डेथ ओभरमात्र होईन नयाँ बल र मध्यक्रममा पनि त्यतिनै उत्कृष्ट प्रदर्शन गर्दै आएका छन् । २०२० मा दिल्लीलाई पहिलो पटक फाइनलमा पुर्याउन रबाडाले १७ खेलमा ३० विकेट लिँदै पर्पल क्याप जितेका थिए ।

रबाडाले २०१९ मा १२ खेलमा २५ विकेट लिँदै सानदार प्रदर्शन गरे । दिल्लीले २०१८ मा ४ करोड २० लाखमा अनुबन्ध गरेको थियो । सबै फ्रेन्चाइज टोली रबाडालाई लिन खोज्नेछन् । किनभने उनी अक्सनमा उपलब्ध मध्यका सर्वोत्कृष्ट तीव्र गतिका बलर हुन् । तल्लोक्रममा ठूला सटको क्षमता पनि राख्छन् । तल्लोक्रममा ब्याटिङमा पनि योगदान दिनसक्छन् ।

रबाडा आफ्नो उत्कृष्ट बलिङमा जित सहज बनाउन सक्ने खुबी भएका खेलाडी हुन् । प्रतिस्पर्धा उच्च हुँदा मूल्य निकै महँगो पाउन सक्छन् । रबाडाले अक्सनमा आफ्नो न्यूनतम मूल्य २ करोड भारु राखेका छन् ।