एजेन्सी – इन्डियन प्रिमियर लिग (आइपिएल) २०२२ को मेगा अक्सन फेब्रुअरी १२ र १३ मा बेंगलोरमा हुँदैछ । विश्वभरका ५ सय ९० खेलाडीबाट १० फ्रेन्चाइज टोलीले आफ्नो पूर्ण टोली निर्माण गर्ने छन् । ३ सय ७० भारतीय र २ सय २० विदेशी खेलाडी छन् ।

एसोसिएट देशबाट ७ खेलाडीले मेगा अक्सनको लागि छनोट भएका छन् । एक फ्रेन्चाइज टोलीमा बढीमा २५ खेलाडी राख्न पाइन्छ । त्यसमा ८ भन्दा बढी विदेशी खेलाडी राख्न पाइदैन । एसोसिएट खेलाडीलाई आइपिएल खेल्नु सबैभन्दा ठूलो सपना हो । नेपाली क्रिकेट टोलीका कप्तान सन्दीप लामिछाने सहित ४ एसोसिएट देशबाट ७ खेलाडी अक्सनका लागि छनोट भएका छन् । ७ मध्य दुई खेलाडीले आइपिएल खेलिसकेका छन् । चार खेलाडी पहिलो पटक आइपिएलको हिस्सा हुन खोज्नेछन् ।

यसअघि एसोसिएटबाट कुल ४१ खेलाडीले नाम दर्ता गराएपनि ७ खेलाडीमात्र सर्ट लिष्टमा परेका हुन् । नाम दर्ता नेपालबाट १५, अमेरिकाबाट १४, नामिबियाबाट ५, ओमानबाट ३, भुटान, नेदरल्यान्ड्स, स्कटल्यान्ड र युएईबाट १–१ खेलाडीले नाम दर्ता गराएका थिए । सर्टलिष्टमा भने स्कटल्यान्डबाट दुई खेलाडी अटाएका छन् । दुई मध्य एक खेलाडी फ्रेन्चाइज टोलीको आग्रहमा राखिएको हो ।

नाम दर्ता गराउँदा छुटेका खेलाडी फ्रेन्चाइज टोली लिन चाहेको खण्डमा आग्रहमा राख्न सक्छन् । २०१८ मा सन्दीपलाई पनि दिल्लीको आग्रहमा पछि राखिएको थियो । त्यसैले दुई मध्य एक बिक्ने सम्भावना छ । अक्टोबर नोभेम्बरमा युएईमा भएको टि२० विश्वकपमा सानदार प्रदर्शन गर्ने स्कटल्यान्डबाट दुई र नामिबियाबाट तीन खेलाडी छन् ।

नेपाल र अमेरिकाबाट एक एक खेलाडी छन् । एसोसिएटबाट स्पिनरको रुपमा स्थान बनाउने सन्दीप मात्र हुन् । चार प्रमुख तीन गतिका बलर र दुई अलराउन्डरको रुपमा छन् । आइपिएल अक्सन २०२२ को मेगा अक्सनमा परेका ७ एसोसिएट खेलाडी र उनको बारे जानकारी यस प्रकार छ ।

७. सफ्यान शरिफ (स्कटल्यान्ड)

स्कटल्यान्डका तीव्र गतिका बलर सफ्यान शरिफले आइपिएलमा न्यूनतम मूल्य २० लाखमा राखेका छन् । ३० वर्षिय शरिफले टि२० विश्वकपमा स्कटल्यान्डलाई सुपर १२ सम्म पुर्याउन महत्त्वपूर्ण प्रदर्शन गरेका थिए ।

अनुशासित लाइन एण्ड लेन्थ उनको प्रमुख खुबी हो । योर्करसँगै तल्लोक्रममा ब्याटिङको क्षमता पनि राख्छन् । पहिलो चरणमा उनले ओमान र अफगानिस्तानविरुद्ध २–२ विकेट लिएका थिए । नामिबियाविरुद्ध १ विकेट लिए । टि२० विश्वकपको फाइनलसम्म पुगेको न्युजिल्यान्डविरुद्ध शरिफले सुपर १२ चरणमा ४ ओभरमा २८ रन खर्चेर २ विकेट लिएका थिए ।

स्कटल्यान्डलाई उत्कृष्ट सुरुवात दिलाउनेक्रममा उनले डर्याल मिचेललाई १३ रनमा एलबीडब्लू र कप्तान केन विलियम्सनलाई शून्यमा क्याच गराउँदै उत्कृष्ट प्रभाव छाडेका थिए । उनले स्कटल्यान्डबाट ४८ ओडिआई खेलमा ६८ र ५३ टि२० आईमा ६१ विकेट लिएका थिए । शरिफ तल्लोक्रममा राम्रो ब्याटिङको क्षमता पनि राख्छन् ।

२०१८ को एकदिवसिय विश्वकप छनोटमा स्कटल्यान्डले वेस्टइन्डिजलाई १ सय ९८ रनमा अल आउट गर्न शरिफले ९ ओभरमा १ मेडन सहित २७ रन खर्चेर ३ विकेट लिएका थिए । उनले विश्व क्रिकेटका विष्फोटक ब्याटर क्रिस गेललाई गोल्डेन डक, शाई होपलाई डक र रोभम्यान पावेललाई १५ रनमा बोल्ड गर्दै प्लेयर अफ द म्याच चुनिएका थिए ।

६. जेजे स्मिट (नामिबिया)

अलराउन्डर स्मिट नामिबियाका प्रमुख खेलाडी हुन् । नामिबियालाई पहिलो पटक टि२० विश्वकपमा पुर्याउन स्मिटले उत्कृष्ट अलराउन्ड योगदान दिएका थिए । स्मिटले मध्यगतिमा बलिङ गर्नुको साथै तल्लोक्रममा आक्रामक सट र राम्रो ब्याटिङको क्षमता राख्छन् ।

स्मिटले अक्सनमा २० लाख भारु न्यूनतम मूल्य अक्सनमा राखेका छन् । गत नोभेम्बरमा युएईसँगको पहिलो ओडिआई खेलमा स्मिटले कप्तानी गर्दै ५६ रन बनाउनुको साथै ५ विकेट लिएका थिए । स्मिटसँग ग्लोबल टि२० क्यानडा खेलेको अनुभव छ । उनी विदेशी टि२० फ्रेन्चाइज लिग खेल्ने पहिलो नामिबिया खेलाडी समेत हुन् ।

५. रुबेन ट्रम्पलम्यान (नामिबिया)

नामिबियाले टि२० विश्वकप २०२१ मा सानदार प्रदर्शन गर्दा बायाँ हाते तीव्र गतिका बलर रुबेन ट्रम्पलम्यानको प्रदर्शन र योगदान निकै महत्वपूर्ण थियो । २४ वर्षिय रुबेनको गति र स्विङका लागि माहिर युवा बलर हुन् । उनले प्रतिघण्टा १ सय ४० माथिको तीव्र गतिमा बलिङ गर्न सक्छन् । पावर प्लेमा नयाँ बलका साथ स्विङका साथ विकेट लिने गर्दछन् ।

रुबेनले टि२० विश्वकपमा स्टकल्यान्डविरुद्ध पहिलो ओभरमै तीन विकेट लिँदै विश्व कीर्तिमान राखेका थिए । टि२० आईको पहिलो ओभरमै तीन विकेट लिने उनी पहिलो खेलाडी हुन् । उनले आफ्नो स्विङ र गतिमा विपक्ष ब्याटरलाई धरासयी बनाउने गर्दछन् । नामिबियाले स्कटल्यान्डलाई हराउन उनले ४ ओभरमा १७ रन खर्चेर ३ विकेट लिँदै प्लेयर अफ द म्याच चुनिएका थिए ।

विश्वस्तरिय ब्याटरले भरिभराउ भारत, पाकिस्तान र न्युजिल्यान्डविरुद्ध विकेटलिन नसकेपनि उनले पावर प्लेमा गरेको उत्कृष्ट प्रदर्शन तारिफ योग्य थियो । ओमानविरुद्ध गत नोभेम्बरमा दोस्रो ओडिआईमा ५ विकेट लिएका थिए । पावर प्लेमा उत्कृष्ट बलिङ गर्ने खुबी राख्ने उनलाई मूल्य लाग्न सक्ने सम्भावना छ ।

४. ब्राड ह्वील (स्कटल्यान्ड)

तीव्र गतिका बलर ब्राड ह्वीलको उत्कृष्ट बलिङको सहयोगमा स्कटल्यान्डले टि२० विश्वकपमा बंगलादेशलाई ६ रनले हराउँदै सुपर १२ को यात्रा सहज बनाएको थियो । ह्वीलले पावर प्ले र डेथ ओभर दुबैमा उत्कृष्ट प्रदर्शन गर्दछन् ।

२५ वर्षिय ह्वील सटिक योर्करका लागि माहिर छन् । बंगलादेशविरुद्ध उनले ४ ओभरमा २४ रन खर्चेर ३ विकेट लिएका थिए । न्युजिल्यान्ड र भारतविरुद्ध पनि राम्रो प्रभाव छाडेका थिए । उनले इंग्ल्यान्डको चर्चित घरेलु प्रतियोगिता काउन्टी र द हन्ड्रेड क्रिकेट लिग खेलिसकेका छन् । ह्वीलले अक्सनमा आफ्नो न्यूनतम मूल्य ५० लाख भारु तोकेका छन् । ह्वील र शरिफ मध्य एक अक्सनमा विक्ने सम्भावना उच्च देखिन्छ ।

३. अलि खान (अमेरिका)

अमेरिका तीव्र गतिका बलर अलि खान आइपिएल बाहेक अन्य ठूला फ्रेन्चाइज लिग खेलिसकेका छन् । खानले अक्सनमा ४० लाख भारु न्यूनतम मूल्य तोकेका छन् । अलिले क्यारेवियन प्रिमियर लिग, ग्लोबल टि२० क्यानडा, टि१० लिग, पाकिस्तान प्रिमियर लिग, बंगलादेश प्रिमियर लिग ठूला लिग खेलिसकेका छन् ।

२०२० मा कोलकता नाइट राइर्डसले ह्यारी गर्नी चोटका कारण बाहिरिएपछि अलि खानलाई उनको स्थानमा अनुबन्ध गरेको थियो । तर खेल्ने मौका भने पाएनन् । अलि डेथ ओभर बलरको रुपमा चिनिन्छन् ।

२. सन्दीप लामिछाने (नेपाल)

नेपाली क्रिकेट टोलीका कप्तान सन्दीप लामिछानेलाई २०१८ मा दिल्ली डेयर डेभिल्स (दिल्ली क्यापिटल्स) ले न्यूनतम मूल्य २० लाख भारुमा अनुबन्ध गरेको थियो । तीन सिजन दिल्लीमा रहँदै सन्दीपले ९ खेलमा १३ विकेट लिएका थिए । सन्दीपले २०१८ मा तीन खेलमा ५ र २०१९ मा ६ खेलमा ८ विकेट लिएका थिए ।

२०२० मा पुरै बेन्चमा बसेका सन्दीपलाई २०२१ मा दिल्लीले फुकुवा गरेको थियो । २०२१ मा न्यूनतम ४० लाख राखेपनि कुनैपनि टोलीले किनेनन् । अहिले पनि सन्दीपले ४० लाख भारु न्यूनतम मूल्य राखेका छन् । सन्दीपले आइपिएल देखि बिग ब्यास लिग सम्म खेलेका छन् । सन्दीपको सबै फ्रेन्चाइज लिगमा प्रदर्शन औसत छ । लेगस्पिन र गुगली सन्दीपको प्रमुख बलिङ हतियार हो । सन्दीपले नेपालबाट १६ ओेडिआईमा ४१ र २६ टि२० आई खेलमा ४७ विकेट लिएका छन् ।

१. डेविड विसे (नामिबिया)

२०२१ मा नामिबियाले डेब्यू टि२० विश्वकपमा सानदार प्रदर्शन गर्दा त्यसका नायक डेविड विसे थिए । दक्षिण अफ्रिका पूर्व अलराउन्डर समेत रहेका उनले उत्कृष्ट अलराउन्ड प्रदर्शन गरे । उनी तीव्र गति र तल्लोक्रममा राम्रो ब्याटिङको क्षमता राख्छन् । दक्षिण अफ्रिका छाडेर यो वर्षदेखि नामिबियाबाट विश्वकप खेलेका डेविडले आइपिएल खेलिसकेका छन् । अन्य फ्रेन्चाइज लिगमा निरन्तर उत्कृष्ट प्रदर्शन गर्दै आएका छन् ।

उनले न्यूनतम मूल्य ५० लाख भारु राखेका छन् । ३६ वर्षिय अग्ला कदका डेविडले २०१५ मा बेंगलोरबाट मुम्बईविरुद्ध डेब्यू खेलमै ४ विकेट लिँदै सनसनी मच्चाएका थिए । ब्याटिङमा उनले २५ बलमा ६ चौका र २ छक्कासहित ४७ रन जोडेपनि बेंगलोर १८ रनले पराजित भएको थियो । १५ आइपिएल खेलमा १६ विकेट लिएका छन् । २०१६ पछि भने उनी आइपिएल खेलेका छैनन् ।

आयरल्यान्डलाई ८ विकेटले हराउँदै सुपर १२ मा स्थान बनाउन उनले २ विकेट लिनुको साथै १४ बलमा १ चौका र २ छक्कासहित २८ रन जोडेका थिए । नेदरल्यान्ड्सविरुद्ध ६६ रनको अविजित इनिङ खेल्नुको साथै १ विकेटका साथ प्लेयर अफ द म्याच चुनिए । पाकिस्तानविरुद्ध उनले ४३ रनको अविजित इनिङ खेलेका थिए ।

आइसिसीको टि२० विश्वकपको उत्कृष्ट ११ खेलाडीमा डेविड विसे थिए । उनले विश्वकपमा ८ खेलमा २ सय २७ रन बनाउनुको साथै ६ विकेट लिएका थिए । विसेले हाल लाहोर कलन्दर्सबाट पिएसएल खेलि राखेका छन् । अनुभवी र राम्रो लयमा रहेका विसेले आइपिएलमा पाँच वर्षपछि विक्न सक्छन् ।