भुपेन्द्र जिसी, काठमाडौं

नेपाली राष्ट्रिय क्रिकेट टोलीका कप्तान तथा प्रमुख स्पिनर सन्दीप लामिछाने यसै साता ओमानमा अन्तर्राष्ट्रिय टि२० खेलमा व्यस्त हुनेछन् । इन्डियन प्रिमियर लिग (आइपिएल) २०२२ को मेगा अक्सन फेब्रुअरी १२ र १३ मा बेंगलोरमा चल्नेछ । त्यससमय नेपाली समर्थक र शुभ चिन्तकको ध्यान ओमान र भारतको बेंगलोर दुवैमा हुनेछ ।

आइसिसी टि२० विश्वकप ग्लोबल छनोट ए को लागि नेपाली टोली मंगलबार ओमान प्रस्थान गर्नेछ । विश्वकप छनोट अघि चार देश सम्मिलित टि२० आई सिरिजमा नेपालले फेब्रुअरी ११ मा ओमान, फेब्रुअरी १२ मा युएई र फेब्रुअरी १४ मा आयरल्यान्डसँग खेल्नेछ । बलिया तीन टोलीसँग टि२० आई खेलपछि नेपालको विश्वकप छनोट तयारी पूरा हुनेछ । ओमानसँगको खेलको प्रदर्शनले सन्दीपलाई अक्सनमा थप फाइदा पुग्नसक्छ ।

सन् २०१८ मा तत्कालिन दिल्ली डेयर डेभिल्स (दिल्ली क्यापिटल्स) ले न्यूनतम मूल्य २० लाख भारु अक्सनमा किनेपछि सन्दीप आइपिएल खेल्ने पहिलो नेपाली खेलाडी बनेका थिए । २०२० सम्म दिल्लीमा रहेका सन्दीपले ९ खेल खेल्दै १३ विकेट लिएका थिए । २०२१ मा भने दिल्लीले सन्दीपलाई फुकुवा गरेको थियो । तर अक्सनमा सन्दीपलाई कुनै पनि टोलीले रुचि देखाएनन् ।

मेगा अक्सनमा सन्दीपले ४० लाख भारु अर्थात ६४ लाख नेपाली रुपैयाँ न्यूनतम मूल्य राखेका छन् । यस पटक सन्दीपले अइपिएलमा न्यूनतम मूल्य हुँदै करोड सम्म यात्रा गर्न सक्ने सम्भावना पनि रहन्छ । सन्दीप आइपिएल २०२२ को मेगा अक्सनमा बिक्ने पाँच आधार यस प्रकार छन् ।

५. आइपिएलमा दुई टोली थपिनु

यस सिजनदेखि आइपिएलमा १० टोलीले प्रतिस्पर्धा गर्नेछन् । लखनऊ सुपर जायन्ट र अहमदाबाद टाइटन्स थपिएका दुई नयाँ टोली हुन् । दुई नयाँ टोली थपिएसँगै सन्दीप लगायत अन्य विदेशी खेलाडीको सम्भावना पनि बढेको छ । हरेक फ्रेन्चाइज टोलीले ८ विदेशी खेलाडी राख्न पाउँछन् । दुई टोली थपिदा १६ थप विदेशी खेलाडीले मौका पाउनेछन् ।

दिल्लीमा रविचन्द्रन आश्विन, अमित मिश्रा र अक्षर पटेल हुँदा सन्दीप छायाँमा पर्नु परेको थियो । चार प्रमुख स्पिनर रहेपछि दिल्लीले फुकुवा गरेको थियो । सन्दीपलाई आइपिएलको अनुभव छ । त्यसैले फ्रेन्चाइज टोली सिधैं नयाँ भन्दापनि सन्दीपलाई अनुबन्ध गर्न रुचाउँछन् । सन्दीप टोलीलाई आवश्यक परेको जुनसुकै समयका लागि पनि तयार छन् । दुई नयाँ टोली थपिदा विदेशी खेलाडीको माग र आवश्यकता बढ्दा सन्दीपको सम्भावना छ ।

४. न्यूनतम मूल्य

सन्दीपले अक्सनमा कम्तिमा न्यूनतम मूल्यमा पाउने सम्भावना उच्च छ । मेगा अक्सनमा फ्रेन्चाइज टोलीले सिमित स्टार खेलाडीलाई किन्न करोडौं खर्चिने गर्दछन् । एक टोलीले अक्सनमा ९० करोड भारु मात्र खर्चिन पाउँछन् । त्यहिँ ९० करोडबाट एउटा पूरा टोली किन्नुपर्छ । सबै महँगा स्टार खेलाडी किन्न सम्भव हुँदैन । किनभने आफ्नो खर्च गर्न पाउने रकममा ध्यान दिनुपर्छ ।

करोड मात्र नभएर राम्रो प्रदर्शन गर्न सक्ने लाखका खेलाडी पनि किन्नुपर्छ । फ्रेन्चाइज टोली करोडको मूल्यमा म्याच विनर ब्याटर र तीव्र गतिका बलरलाई बढी प्राथमिकतामा राख्छन् । कम मूल्य पाउने र घरेलु खेलाडी टिम सन्तुलनको राम्रो आधार हुन् । जुन खेलाडीले स्टार सरह नतिजा दिनसक्छन् । नयाँ खेलाडी लिँदा नर्भस हुन सक्छन् । सन्दीप थोरै मूल्यमा उपलब्ध र अन्य स्टार स्पिनरले जस्तो नतिजा दिनसक्ने हुँदा सन्दीप फ्रेन्चाइज टोलीको नजरमा पर्ने सम्भावना छ ।

३. सन्दीपको ब्याटिङ सुधार

टि२० क्रिकेट धेरै आधुनिक भएको छ । टि२० फ्रेन्चाइज लिगमा टोली अलराउन्डरलाई प्राथमिकता राख्न थालेका छन् । सन्दीप गतवर्ष नबिक्नुको प्रमुख कारण पनि कमजोर ब्याटिङ र फिल्डिङ थियो । आइपिएलमा नबिकेपछि सन्दीपले ब्याटिङमा केहि सुधार गरेका छन् । काठमाडौं मेयर्स कपमा फागुनमा बागमती प्रदेशविरुद्ध २० बलमा ६ छक्कासहित ४२ रनको इनिङ खेलेका थिए ।

पुलिससँग सन्दीपले १७ बलमा ३ चौका र २ छक्कासहित २६ रन जोडेका थिए । असोजमा इपिएलमा काठमाडौं किंग्स इलेभेनबाट सन्दीपले पोखरा राइनोजविरुद्ध ११ बलमा २ चौका र ३ छक्कासहित ३१ रन जोडेका छन् । ब्याटिङ सुधारले सन्दीपको सम्भावना बढाएको छ ।

२. नेपाली समर्थकको क्रेज

फ्रेन्चाइज लिग वास्तवमा व्यावपार र मनोरञ्जन हो । फ्रेन्चाइज टोलीका मालिक उत्कृष्ट प्रदर्शनसँगै आफ्नो व्यापार विस्तार गर्न चाहन्छन् । २०१८ मा सन्दीपलाई किनेपछि दिल्लीको सामाजिक सञ्जालमा लोकप्रियता ह्वात्तै बढेको थियो । नेपाली क्रिकेटमा समर्थकको क्रेज लोभलाग्दो छ । नेपाल एसोसिएटकै सर्वाधिक समर्थक भएको देश हो ।

फ्रेन्चाइज टोली सन्दीपलाई अनुबन्ध गर्दै नेपालको क्रेज आर्कषित गर्न चाहन्छन् । सन्दीपलाई अनुबन्ध गर्दा नेपालको मात्र होईन एसोसिएट अन्य देशका समर्थक पनि आर्कषण हुनेछन् । एकै खेलाडीलाई १६ करोड खर्चिने फ्रेन्चाइजलाई ४० लाख खर्चिनु खासै ठूलो कुरो होईन । फ्रेन्चाइज टोली नेपाली समर्थक आर्कषण गर्नको लागि भएपनि न्युनतम मूल्यमा सन्दीपलाई किन्ने सम्भावना छ । समर्थक आर्कषणसँगै नेपालमा फ्रेन्चाइज टोली व्यापारको दायरा फराकिलो र राम्रो विज्ञापन गर्नसक्छन् ।

१. मेगा अक्सनमा नयाँ टिम निर्माण

मेगा अक्सनबाट नयाँ टिम निर्माण गर्नुपर्ने हुन्छ । गत वर्ष सबैको आफ्नो टिम थियो । आफूलाई आवश्यक पर्ने खेलाडी मात्र अक्सनबाट लिएका थिए । जसमा निकै कम खेलाडीले मात्र मौका पाउँछन् । किनभने सबै टोलीले प्रमुख खेलाडी टोलीमै राखेका हुन्छन् । आफ्नो कमजोरी सुधार गर्न सक्ने खेलाडीमात्र किन्छन् । तर यस पटक टोली शून्यबाट निर्माण गर्नुपर्ने हुन्छ । टोलीहरु दीर्घकालीन योजनाका साथ अघि बढ्नेछन् ।

अहिले एक टोलीमा बढीमा चार खेलाडी छन् । सबै टोलीले अक्सन मार्फत नयाँ टिम निर्माण गर्नुपर्ने हुन्छ । एक वर्ष मात्र नभएर तीन संस्करण खेल्ने टोली निर्माण गर्नुपर्छ । युवा खेलाडी पहिलो रोजाई हुन सक्छन् । सन्दीप गतवर्ष नबिक्नुमा फ्रेन्चाइज टोलीलाई विदेशी स्पिनर आवश्यक नहुनु थियो । दिल्लीले पनि अमित मिश्रा, रविचन्द्रन आश्विन र अक्षर पटेल भएपछि फुकुवा गरेको थियो । किनभने हरेक टोलीसँग प्रमुख स्पिनर थिए । तर सबै टोलीले यस पटक स्पिनर अनुबन्ध गर्नेछन् ।

दिल्ली, मुम्बई, पन्जाब, राजस्थान, रोयल च्यालेन्जर्स बेंगलोर र हैदराबादले रिटेन गरेका खेलाडीमा स्पिनरनै छैनन् । सबैलाई स्पिनरको आवश्यक छ । सन्दीपले आइपिएलसँगै बिग ब्याससम्मका फ्रेन्चाइज लिग खेलेको हुँदा पहिलो रोजाईमा पर्न सक्छन् । सन्दीपको प्रदर्शन र क्षमता सबै फ्रेन्चाइज टोलीलाई राम्रोसँग थाहा छ । सन्दीप लामो यात्रा गर्न सक्ने बलर हुन् । नयाँ टिम निर्माणमा सबै फ्रेन्चाइलाई स्पिनर आवश्यक हुँदा सन्दीपको सम्भावना बलियो नै देखिन्छ ।