एजेन्सी – इन्डियन प्रिमियर लिग (आइपिएल) २०२२ को मेगा अक्सनमा भारतीय युवा ब्याटर श्रेयस ऐर र दक्षिण अफ्रिका तीव्र गतिका बलर कागिसो रबाडामाथि पैसाको वर्षा भएको छ । ऐरलाई कोलकता नाइट राइडर्सले १२ करोड २५ लाख भारुपमा अक्सनबाट किनेको छ ।

बेंगलोरमा जारी अक्सनमा ऐरलाई किन्न दिल्ली क्यापिटल्स, लखनऊ सुपर जायन्ट, कोलकता नाइट राइडर्सबीच अक्सनमा कडा प्रतिस्पधा भएको थियो । अन्तिममा कोलकताले अनुबन्ध गरेको हो ।

ऐरको कप्तानीमा दिल्ली क्यापिटल्स २०२० मा पहिलो पटक फाइनलमा पुगेको थियो । २०१८ मा गौतम गम्भीरले कप्तानी छाडेपछि दिल्लीले ऐरलाई कप्तानी दिएको थियो । २०१५ देखि दिल्लीबाट अइपिएल खेल्दै आएका ऐरले ८७ खेलमा १६ अर्धशतक सहित २ हजार ३ सय ७५ रन बनाएका छन् । ऐरले न्यूनतम मूल्य २ करोड राखेका थिए । उनले दिल्लीमा ७ करोड भारु मूल्य पाएका थिए ।

वार्नरलाई दिल्ली क्यापिटल्सले ६ करोड २५ लाख भारुमा अनुबन्ध गरेको छ । २००९ देखिनै आइपिएल खेल्दै आएका वार्नरले २०१५ देखि २०२१ सम्म सनराइजर्स हैदराबादको नेतृत्व गर्दै उत्कृष्ट प्रदर्शन गरेका थिए । वार्नरको कप्तानीमा २०१६ मा हैदराबादले उपाधि जितेको थियो । आइपिएलमा तीन ओरेन्ज क्याप जित्ने वार्नर एक्लो खेलाडी हुन् ।

वार्नरले २०१५, २०१७ र २०१९ मा सर्वाधिक रनका साथ ओरेन्ज क्याप जितेका थिए । हदराबादमा वार्नरले १२ करोड ५० लाख भारु पारिश्रमिक पाउँदै आएका थिए । तर वार्नर आधार सस्तो मूल्यमा विकेका छन् । त्यस्तै त्यस्तै दक्षिण अफ्रिका पूर्व तीव्र गतिका बलर कागिसो रबाडालाई पन्जाब किंग्सले ९ करोड २५ लाखमा किनेको छ ।

रबाडा लगातार १ सय ५० प्रतिघण्टा किलोमिटरको रफ्तारमा बलिङ गर्नसक्ने खुबी भएका खेलाडी हुन् । रबाडा डेथ ओभरका विश्वकै घातक बलरमा पर्दछन् । २०२० मा दिल्लीलाई पहिलो पटक फाइनलमा पुर्याउन रबाडाले १७ खेलमा ३० विकेट लिँदै पर्पल क्याप जितेका थिए । रबाडाले २०१९ मा १२ खेलमा २५ विकेट लिँदै सानदार प्रदर्शन गरे । दिल्लीले २०१८ मा ४ करोड २० लाखमा अनुबन्ध गरेको थियो ।
शिखर धवनलाई पन्जाब किंग्सले ८ करोड २५ लाखमा किनेको छ ।

धवन राम्रो लयमा छन् । पछिल्ला दुई संस्करणमा दिल्लीले लगातार फाइनल यात्रा तय गर्दा धवनको योगदान महत्वपूर्ण थियो । गत सिजनमा लगातार दुई शतक प्रहार गरेका थिए । न्युजिल्यान्डका टे«ेन्ट बोल्टलाई राजस्थान रोयल्सले ८ करोड भारुमा अनुबन्ध गरेको छ । कोलकताले प्याट कमिन्सलाई ७ करोड २५ लाखमा किनेको छ । जुन यसअघिको सिजन भन्दा आधा कम मूल्य हो । २०२० को अक्सनमा कमिन्सलाई कोलकताले कीर्तिमानी मूल्य १५ करोड ५० लाख भारुमा अनुबन्ध गरेको थियो ।

राजस्थानले रविचन्द्रन आश्विनलाई ५ करोडमा अनुबन्ध गरेको छ । गुजरात टाइटन्सले मोहम्मद शामीलाई ६ करोड २५ लाख भारुमा किनेको छ । रोयल च्यालेन्जर्स बेंगलोरले फाफ डु प्लेसिसलाई ७ करोड भारुमा किनेछ । गत वर्ष चेन्नईलाई उपाधि दिलाउन फाफ डु प्लेसिसले उत्कृष्ट प्रदर्शन गरेका थिए ।