काठमाडौं (हाम्रो खेलकुद)– थाइल्यान्डमा जारी एसिसी महिला एसिया कप टि ट्वान्टी क्रिकेट प्रतियोगितामा नेपालको खराब प्रदर्शन तेस्रो खेलमा पनि रोकिएन । पाकिस्तान ९ र श्रीलंकासँग ८ विकेटले पराजित नेपाल मंगलबारको खेलमा बंगलादेशसँग ९२ रनले गुमाएको छ । १ सय ३४ रन लक्ष्य पछ्याएको नेपाल १७.३ ओभरमा ४१ रनमा अलआउट भएको थियो ।
सीता मगरले १५ रन बनाउनु बाहेक नेपाली टोलीका लागि कुनै पनि खेलाडीले दोहोरो अंकमा जोड्न सकेनन् । नेरी थापा, रोशनी बोहरा, सरस्वती कुमारी र शबनम राईले खाता पनि खोल्न सकेनन् । ओपनर ज्योति पाण्डले १ र नेरी राजोपाध्यायले २ रन जोडे । कप्तान रुविना क्षेत्रीले ७, इन्दु बर्माले ९, करुणा भण्डारीले १ र संगिता राईले ४ रन बनाइन् ।
बंगलादेशका लागि फाहिमा खातुनले ४ र नाहिदा अख्तरले २ विकेट लिए । सुराया अजमिन, रुमान अहमद, जाहानारा आलम र पन्ना घोषले समान १ विकेट लिए ।
त्यसअघि टस जितेर ब्याटिङ गरेको बंगलादेशले २० ओभरमा ४ विकेट गुमाएर १ सय ३३ रन बनाएको थियो । बंगलादेशका लागि ओपेनर सन्जिदाले ३५ र सुल्तनाले ३९ रन बनाइन् । रुमनाले ९ बलमा १७ रनको बनाएकी थिइन् । नेपालका लागि संिगता राईले २ तथा रुबिना क्षेत्रि र सिता मगरले समान १ विकेट लिएका थिए ।
