एजेन्सी – युवा ओपनर मयंक अग्रवालले इन्डियन प्रिमियर लिग (आइपिएल) २०२२ मा पन्जाब किंग्सको कप्तानी गर्ने भएका छन् । पन्जाबले सामाजिक सञ्जाल मार्फत अग्रवाललाई कप्तानमा नियुक्त गरेको जनाएको छ ।

पन्जाबले यस सिजनमा मयंक अग्रवाललाई १२ करोड भारुमा रिटेन गरेको थियो । नियमित कप्तान लोकेश राहुललाई फुकुवा गर्दा अग्रवाल र अर्शदीप सिंहलाई रिटेन गरेको थियो । अग्रवालले गत वर्ष राहुल एपेन्डिक्सको कारण उपलब्ध नहुँदा अग्रवालले नै कप्तानी गरेका थिए । अग्रवासँगै पन्जाबको कप्तानको दाबेदारमा भारतीय ओपनर शिखर धवन पनि थिए । धवनलाई अक्सनमा पन्जाबले ८ करोड २५ लाखमा अनुबन्ध गरेको थियो ।

२०११ मा आइपिएलमा डेब्यू गरेका अग्रवालले हालसम्म १ सय खेलमा १ शतक र ११ अर्धशतक सहित २ हजार १ सय ३५ रन बनाएका छन् । २०१८ देखि पन्जाबाट खेल्दै आएका अग्रवालले उच्च प्रदर्शन गर्दै आएका छन् । २०२१ मा राहुल हस्पिटल गएपछि दिल्ली विरुद्ध कप्तानी गर्दै ५८ बलमा ९९ रनको इनिङ खेलेका थिए । आइपिएलमा राहुल र अग्रवालले उत्कृष्ट साझेदारी गर्दै आएका थिए । यी दुई ब्याटर चलेपनि अन्य नचल्दा लगातार लिगबाट बाहिरिदै आएको थियो ।

यस पटक अक्सनमा पन्जाबले इंग्ल्यान्डका लियाम लिभिङस्टोन, जोनी बेयरस्टो, कागिसो रबाडा, ओडेन स्मिथ जस्ता विदेशी खेलाडी अक्सनमा किनेको थियो । शिखर धवन, राहुल चहर र शाहरुख खान लगायतका भारतीय खेलाडी छन् ।

पन्जाब आइपिएलको समूह बी मा छ । पन्जाब, चेन्नई सुपर किंग्स, सनराइजर्स हैदराबाद, रोयल च्यालेन्जर्स बेंगलोर र गुजरात टाइटन्स समूह बी मा छन् । समूह ए मा दिल्ली क्यापिटल्स, मुम्बई इन्डियन्स, कोलकाता नाइट राइडर्स, राजस्थान रोयल्स र लखनऊ सुपर जायन्ट छन् । आइपिएल आगमी मार्च २६ देखि २९ मे सम्म मुम्बई र पुणेमा हुनेछ ।