काठमाडौं (हाम्रो खेलकुद) – युवा ब्याटर रोहित कुमार पौडेलको अर्धशतकको सहयोगमा नेपालले आइसिसी विश्वकप लिग–२ त्रिकोणात्मक ओडिआई सिरिजमा पपुवा न्युगिनीलाई पराजित गरेको छ । नेपालले पपुवा न्युगिनीलाई २ विकेटले हराउँदै अंक तालिकामा दुई महत्वपूर्ण अंक थपेको हो ।

२ सय ५ रनको मध्यम विजयी लक्ष्य पछ्याएको नेपालले ४९.२ ओभरमा ८ विकेट गुमाउँदै पूरा गर्यो । नेपालको जितमा रोहित कुमार पौडेलले ८३ बलमा ४ चौकासहित सर्वाधिक ६० रनको योगदान दिए । आरिफ शेख ८३ बलमा १ चौकासहित ४९ रनमा आउट भए ।

नेपाललाई अन्तिम ६ बलमा जितको लागि ७ रन चाहिँएको थियो । पहिलो बलमा लेग वाइको रुपमा चौका प्राप्त गर्यो । दोस्रो बलमा करण केसीले छक्का प्रहार गर्दै नेपालको जित पक्का गराए । करण केसी २५ बलमा १ चौका र २ छक्कासहित २९ रनमा अविजित रहे ।

पाँचौं विकेटका लागि आरिफ र रोहितले १ सय रनको कीर्तिमानी साझेदारी गरेका थिए । आरिफ र रोहित ओडिआईमा शतकीय साझेदारी गर्ने पहिलो जोडी बनेका छन् । यसअघि ओडिआईमा सर्वाधिक ठूलो साझेदारी आसिफ शेख र ज्ञानेन्द्र मल्लले गत असोजमा ओमानविरुद्ध दोस्रो विकेटका लागि ९५ रनको गरेका थिए ।

नेपालले ओपनर कुशल भुर्तेललाई दोस्रो ओभरको पहिलो बलमा १ रनमा गुमाएको थियो । तेस्रो ओभरको चौथो बलमा नर्मन भानुआले ज्ञानेन्द्र मल्ललाई ४ रनमा एलबीडब्लू आउट गरे । नेपालका मध्यक्रमका प्रमुख ब्याटर दीपेन्द्रसिंह ऐरीलाई राइली हेकुरेले ८ रनमा क्याच गराएपछि २४–३ को अवस्थामा पुगेको थियो । असाद भालाको १५ औं ओभरको अन्तिम बलमा आसिफ शेख अघि बढेर सट खेल्नेक्रममा १६ रनमा स्टम्पिङ आउट भए । उनले ४० बलमा १ चौका प्रहार गरे ।

एक समय ४२–४ को अवस्थामा पुगेको नेपाललाई आरिफ र रोहितको शतकीय साझेदारीले उकासेको थियो । विनोद भण्डारी २५ बलमा १२ रनमा एलबीडब्लू आउट भए । सोमपाल कामी ७ बलमा ७ रनमा क्याच भए । पपुवा न्युगिनीका नर्मन भानुवा, राइली हेकुरे र एली नाओले २–२ विकेट लिए । असाद भाला र चाद सोपरले १–१ विकेट लिए ।

त्यसअघि शारजाह क्रिकेट स्टेडियममा टस जितेर पहिला ब्याटिङ रोजेको पपुवा न्युगिनीले निर्धारित ५० ओभरमा ८ विकेट गुमाउँदै २ सय ४ रन बनाएको थियो । पपुवा न्युगिनीका चाल्र्स अमिनीले ८२ बलमा ७ चौकासहित सर्वाधिक ५९ रनको योगदान दिए । चाद सोपरले ७४ बल खेल्दै २ चौकासहित ३५ रनमा सोमपाल कामीको बलमा बोल्ड भए ।

एक समय २४.४ ओभरमा ९१-४ को कमजोर अवस्थामा पुगेको पपुवा न्युगिनीलाई पाँचौं विकेटका लागि अमिनी र चाद सोपरले ७५ रनको महत्वपूर्ण साझेदरी गरेका थिए । तल्लोक्रमका नर्मन भानुवा १२ बलमा चौका र १ छक्कासहित २३ रनमा रन आउट भए । पपुवा न्युगिनीलाई ओपनर टोनी उरा र लेगा सिकायाले पहिलो विकेटका लागि ९.४ ओभरमा ५१ रनको साझेदारी गर्दै राम्रो सुरुवात दिलाए ।

तर त्यसपछि प्रमुख ब्याटरले अघि बढाउन सकेनन् । मध्य गतिका बलर आरिफ शेखको आउट साइड अफ बलमा एज लाग्दै उरा विकेटकिपर विनोद भण्डारीबाट २७ रनमा क्याच भए । उराले ३४ बलमा ५ चौका प्रहार गरे ।

१३ औं ओभरको अन्तिम बलमा सन्दीप लामिछानेले अर्का ओपनर लेगा सियाकालाई २५ रनमा बोल्ड गरे । उनले ३३ बलमा २ चौका प्रहार गरे । ज्ञानेन्द्रले २४ औं ओभरको अन्तिम बलमा पपुवा न्युगिनीका प्रमुख ब्याटर तथा कप्तान असाद भालालाई १९ रनमा कुशल भुर्तेलबाट क्याच गराए । ठूलो सट खेलेका भाला मिडअनमा क्याच हुन पुगे । उनले ५२ बलमा १ चौका प्रहार गरे ।

ज्ञानेन्द्रको ओडिआईमा यो पहिलो विकेट हो । हिरी हरी शून्यमा रन आउट भए । रिली हेकुरे ७ बलमा १ चौकासहित ९ रनमा अविजित रहे । नेपालका लागि तीव्र गतिका बलर सोमपाल कामीले १० ओभरमा ४८ रन खर्चेर ३ विकेट लिए । स्पिनर सन्दीप लामिछानेले १० ओभरमा ३० रन खर्चेर १ विकेट लिए । आरिफ शेखले ६ ओभरमा १६ रन खर्चेर १ विकेट लिए । ज्ञानेन्द्र मल्लले २ ओभरमा ६ रन खर्चेर १ विकेट लिए । नेपालले दोस्रो खेल घरेलु टोली ओमानसँग शुक्रबार खेल्नेछ ।

अंक तालिका

ओमान २७ खेलमा १७ मा जित र ८ मा हार सहित ३६ अंक जोड्दै शीर्षस्थानमा छ । युएई १५ खेलमा ८ मा जित र ५ मा हार सहित १८ अंकका साथ दोस्रो स्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ तेस्रो स्थानमा छ ।

अमेरिका १६ खेलमा ७ मा जित र ९ मा हार सहित १४ अंक भएपनि नेटरनरेटका कारण चौथो स्थानमा छ । नामिबिया १३ खेलमा ६ मा जित र ७ मा हार सहित १२ अंकका साथ पाँचौं स्थानमा छ । नेपाल ९ खेलमा ५ मा जित र ४ मा हारसहित १० अंकका साथ छैटौं स्थानमा छ । पपुवा न्युगिनी १४ खेलमा १४ मानै हारका साथ पुछारमा छ ।

नेपालको तालिका

१८ मार्च नेपालविरुद्ध युएई, दुबई इन्टरनेशल क्रिकेट स्टेडियम

२१ मार्च नेपालविरुद्ध युएई, दुबई

२२ मार्च नेपालविरुद्ध पपुवा न्युगिनी, दुबई