एजेन्सी – पन्जाब किंग्सले सानदार ब्याटिङका साथ रोयल च्यालेन्जर्स बेंगलोरलाई ५ विकेटले हराउँदै इन्डियन प्रिमियर लिग (आइपिएल) २०२२ मा विजयी सुरुवात गरेको छ ।

२ सय ६ रनको विशाल विजयी लक्ष्य पछ्याएको पन्जाबले १९ ओभरमा ५ विकेट गुमाउँदै पूरा गर्यो । पन्जाबको जितमा डेब्यू खेल खेलेका विकेटकिपर भानुका राजपक्षेले २२ बलमा २ चौका र ४ छक्कासहित ४३ रनको आक्रामक इनिङ खेले । डेब्यू खेलनै खेलेका वेस्टइन्डिजका युवा अलराउन्डर ओडेन स्मिथ ८ बलमा १ चौका र ३ छक्कासहित २५ रनमा अविजित रहँदै पन्जाबको जित पक्का गराए ।

शाहरुख खान २० बलमा १ चौका र २ छक्कासहित २४ रनमा अविजित रहे । छैटौं विकेटका लागि शाहरुख र स्मिथले २५ बलमा ५२ रनको आक्रामक साझेदारीका साथ जित सहज बनाए । शाहरुख खानले हर्षल पटेललाई चौका प्रहार गर्दै खेल सकाए । पन्जाबलाई ओपनर शिखर धवन र मयंक अग्रवालले ७.१ ओभरमा ७१ रनको साझेदारी गर्दै उत्कृष्ट सुरुवात दिलाए ।

अग्रवाल २४ बलमा २ चौका र २ छक्कासहित ३२ रनमा क्याच भए । उनी स्पिनर वानिन्दु हसरंगाको बलमा शहबाज अहमदबाट क्याच हुन पुगेका थिए । धवन २९ बलमा ५ चौका र १ छक्कासहित ४३ रनमा आउट भए । लियाम लिभिङस्टोन १९ रन र डेब्यू खेल खेलेका यू१९ का अलराउन्डर राज बावा गोल्डेन डक आउट भए । बेंगलोरका मोहम्मद शिराजले ४ ओभरमा ५९ रन खर्चेर २ विकेट लिए । अक्षदीप, वानिन्दु हसरंगा र हर्षल पटेलले १–१ विकेट लिए ।

त्यसअघि डिवाई पटिल स्पोर्ट्स एकेडेमी मुम्बईमा टस हारेर पहिला ब्याटिङ थालेको बेंगलोरले निर्धारित २० ओभरमा २ विकेट गुमाउँदै २ सय ५ रन बनाएको थियो । बेंगलरका कप्तान फाफ डु प्लेसिसले ५७ बलमा ३ चौका र ७ छक्कासहित सर्वाधिक ८८ रनको इनिङ खेलेपनि जितको लागि पर्याप्त भएन ।

पहिलो पटक बेंगलोरको कप्तानी गरेका डु प्लेसिसले सुस्त गतिमा सुरुवात पनिपछि आक्रामक ब्याटिङ गरेका थिए । दीनेश कार्तिक १४ बलमा ३ चौका र ३ छक्कासहित ३२ रनमा अविजित रहँदै उत्कृष्ट अन्त्य गरे । विराट कोहली २९ बलमा १ चौका र २ छक्कासहित ४१ रनमा अविजित रहे । दोस्रो विकेटका लागि विराट र फाफ डु प्लेसिसले १ सय १८ रनको शतकीय साझेदारीका साथ विशाल योगफलमा पुर्याएका थिए ।

एक समय डु प्लेसिसले ३४ बलमा २३ मात्र बनाएका थिए । ११ ओभरपछि उनले खेल्ने गती बढाउँदै आक्रामक ब्याटिङ गरेका थिए । युवा तीव्र गतिका बलर अर्शदीप सिंहको बलमा शाहरुख खानबाट १८ औं ओभरको पहिलो बलमा क्याच भएपछि शतक बनाउन १२ रनले चुकेका थिए ।

बेंगलोरका ओपनर अनुज रावत २० बलमा २ चौका र १ छक्कासहित २१ रनमा राहुल चाहरको बलमा बोल्ड आउट भए । पन्जाबका अर्शदीप सिंह र राहुल चाहरले १–१ विकेट लिए ।

बेंगलोरले आफ्नो दोस्रो खेल बुधबार कोलकाता नाइट राइडर्ससँग खेल्नेछ । कोलकाताले पहिलो खेलमा चेन्नई सुपर किंग्सलाई ६ विकेटले हराउँदै विजयी सुरुवात गरेको थियो । पन्जाबले दोस्रो खेल शुक्रबार कोलकातासँगनै खेल्नेछ ।