एजेन्सी – रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ मा पहिलो जित हात पारेको छ । कोलकाता नाइट राइडर्सलाई ३ विकेटले हराउँदै बेंगलोरले पहिलो जित निकालेको हो ।

१ सय २९ रनको विजयी लक्ष्य बेंगलोरले १९.२ ओभरमा ७ विकेट गुमाउँदै पूरा गर्यो । बेंगलोरको जितमा शेर्फान रदरफोर्डले ४० बलमा १ चौका र १ छक्कासहित सर्वाधिक २८ रनको योगदान दिए । शहबाद अहमदले २० बलमा ३ छक्कासहित २७ रन जोडे । हर्षल पटेल ६ बलमा २ चौकासहित १० रनमा अविजित रहे ।

दीनेश कार्तिक ७ बलमा १ चौका र १ छक्कासहित १४ रनमा अविजित रहे । अन्तिम ६ बलमा ७ रन चाहिँएको अवस्थामा दीनेशले आन्द्रे रसेललाई छक्का र चौका प्रहार गर्दै जित पक्का गराए । सुरुवात भने बेंगलोरको पनि हुन सकेन । ओपनर अनुज रावत शून्य र कप्तान फाफ डु प्लेसिस ५ रनमा आउट भएका थिए ।

पहिलो ओभरको तेस्रो बलमै अनुज रावत उमेश यादवको बलमा विकेटकिपर शेल्डन ज्याकसनबाट क्याच भए । टिम साउथीले अजिक्या रहाणेबाट डु प्लेसिसलाई क्याच गराए । विराट कोहली ७ बलमा २ चौकासहित १२ रनमा उमेश यादवको बलमा ज्याकसनबाट आउट हुँदा बेंगलोर २.१ ओभरमा १७–३ को अवस्थामा पुगेको थियो । डेविड विल्ली २८ बलमा ३ चौकासहित १८ रनमा क्याच आउट भए ।

बेंगलोरलाई १८ बलमा २४ रन जितको लागि चाहिँएको थियो । टिम साउथीले १८ औं ओभरको दोस्रो बलरमा रदरफोर्डलाई विकेटकिपरबाट उत्कृष्ट क्याच गराए । दुई बलपछि वानिन्दु हसरंगालाई मिडअफमा आन्द्रे रसेलबाट ४ रनमा क्याच गराएपछि खेल रोचक बनेको थियो ।
टिम साउथीले ४ ओभरमा २० रन खर्चेर ३ विकेट लिए । उमेद यादवले ४ ओभरमा १६ रन खर्चेर २ विकेट लिए । सुनिल नारायण र बरुणचक्रवर्तीको नाममा १-१ विकेट रह्यो ।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर ब्याटिङ थालेको कोलकाता १८.५ ओभरमा १ सय २८ रनमा अल आउट भएको थियो । कोलकाताका आन्द्रे रसेलले १८ बलमा १ चौका र ३ छक्कासहित सर्वाधिक २५ रन बनाए । अन्य कुनैपनि खेलाडीले राम्रो प्रदर्शन गर्न सकेनन् । ओपनर वेंकटेश ऐरलाई आकाश दीपले चौथो ओभरको पहिलो बलमा १० रनमा कट एण्ड बोल्ड आउट गरे ।

अर्को ओभरको अन्तिम बलमा ओपनर अजिक्या रहाणे ९ रनमा आउट भए । दीपले नितिश राणालाई १० रनमा क्याच गराएपछि कोलकाता समस्यामा परेको थियो । त्यसपछि वानिन्दुले कोलकाताको मध्यक्रम धरासय बनाए । कप्तान श्रेयस ऐरलाई सातौं ओभरको चौथो बलमा लङअनमा फाफ डु प्लेसिसबाट १३ रनमा क्याच गराए । नवौं ओभरको अन्तिम दुई बलमा हसरंगाले दुई विकेट लिए ।

उनले सुनिल नारायणलाई १२ र शेल्डन ज्याकसनलाई गोल्डेन डक आउट गराउँदा कोलकाता ६७–६ को कमजोर अवस्थामा पुगेको थियो । हर्षल पटेलले लगातार दुई ओभर विकेट मेडन राखे । उनले साम बिलिंग्सलाई १४ र आन्द्रे रसेललाई क्याच गराए । अन्तिम विकेटका लागि बरुण चक्रवर्ती र उमेश यादवले २७ रनको साझेदारी गरे ।

यादवले १२ बलमा २ चौका र १ छक्कासहित १८ रन रन बनाए । चक्रवर्ती १६ बलमा २ चौकासहित १० रनमा अविजित रहे । वानिन्दु हसरंगाले ४ ओभरमा २० रन खर्चेर ४ विकेट लिए । हर्षल पटेलले ४ ओभरमा २ मेडनसहित ११ रन खर्चेर २ विकेट लिए । आकाश दीपले ३.५ ओभरमा ४छ रन खर्चेर ३ विकेट लिए । मोहम्मद शिराजको नाममा १ विकेट रह्यो ।

बंगलोर पहिलो खेलमा पन्जाब किंग्ससँग ५ विकेटले पराजित भएको थियो । बेंगलोरले तेस्रो खेलमा मंगलबार राजस्थान रोयल्ससँग खेल्नेछ । कोलकाताले पहिलो खेलमा चेन्नई सुपर किंग्सलाई ६ विकेटले हराएको थियो । तेस्रो खेलमा शुक्रबार पन्जाब किंग्ससँग खेल्नेछ ।