एजेन्सी – सानदार ब्याटिङसँगै चेन्नई सुपर किंग्सले इन्डियन प्रिमियर लिग (आइपिएल) २०२२ मा लखनऊ सुपर जायन्ट्सलाई २ सय ११ रनको विशाल लक्ष्य दिएको छ । ब्रेबोर्नमा टस जितेर पहिला ब्याटिङ थालेको चेन्नईले निर्धारित २० ओभरमा ७ विकेट गुमाउँदै २ सय १० रन बनायो ।

चेन्नईका ओपनर रोबिन उथप्पा २७ बलमा ८ चौका र १ छक्कासहित ५० रनमा आउट भए । शिवम दुबेले ३० बलमा ५ चौका र २ छक्कासहित ४९ रनमा क्याच आउट भए । ओपनर ऋतुराज गायकवाड १ रनमा आउट हुँदा तेस्रो नम्बरका मोईन अली २२ बलमा ४ चौका र २ छक्कासहित ३५ रनमा आउट भए ।

अली आवेश खानको बलमा बोल्ड आउट भए । उथप्पालाई स्पिनर रवि विश्रोईले एलबीडब्लू आउट गरे । लखनऊले रिभ्यु लिँदै उथप्पालाई पेभेलिएन फर्काएको थियो । अम्बाति रायुडू २० बलमा २ चौका र २ छक्कासहित २७ रनमा विश्रोईको बलमा बोल्ड आउट भए । रविन्द्र जडेजा ९ बलमा ३ चौकासहित १७ रनमा आउट भए ।

धोनी ६ बलमा २ चौका र १ छक्कासहित १७ रनमा अविजित रहे । लखनऊका स्पिनर रवि बिश्रोईले ४ ओभरमा २४ रन खर्चेर २ विकेट लिए । आवेश खानले ४ ओभरमा ३८ रन खर्चेर २ विकेट लिए । एन्ड्रयु टाईले ४ ओभरमा ४१ रन खर्चेर २ विकेट लिए । पहिलो खेलमा चेन्नई कोलकातासँग ६ विकेटले पराजित भएको थियो । लखनऊ गुजरात टाइटन्ससँग ५ विकेटले पराजित भएको थियो । दुबै टोली पहिलो जितको सोचमा हुनेछन् ।