एजेन्सी – तीव्र गतिका बलर उमेश यादवको उत्कृष्ट बलिङसँगै इन्डियन प्रिमियर लिग (आइपिएल) २०२२ मा पन्जाब किंग्सले कोलकाता नाइट राइडर्सलाई १ सय ३८ रनको सामान्य लक्ष्य दिएको छ ।

वानखडे स्टेडियम मुम्बईमा टस हारेर ब्याटिङ थालेको पन्जाब १८.२ ओभरमा १ सय ३७ रनमा अल आउट भयो । पन्जाबका विकेटकिपर भानुका राजपक्षेले ९ बलमा ३ चौका र ३ छक्कासहित सर्वाधिक ३१ रनको योगदान दिए ।

उमेशले पहिलो ओभरको अन्तिम बलमा कप्तान मयंक अग्रवाललाई १ रनमा एलबीडब्लू आउट गरे । शिखर धवन टिम साउथीको छैटौं ओभरको पाँचौं बलमा साम बिलिंग्सबाट १६ रनमा क्याच भए । १५ बल खेलेका धवनले १ चौका र १ छक्का प्रहार गरे । उमेशले पन्जाबका प्रमुख ब्याटर लियाम लिभिङस्टोनलाई साउथीबाट १९ रनमा क्याच गराएपछि पन्जाब ७८–४ को अवस्थामा पुगेको थियो ।

पन्जाबले बाँकी ६ रन जोड्दा राज बावा ११ रनमा सुनिल नारायणको बलमा बोल्ड आउट भए । साउथीले शाहरुख खानलाई शून्यमा क्याच गराएपछि पन्जाब संकटमा परेको थियो । उमेशले हरप्रीत बारहलाई १४ रनमा बोल्ड र राहुल चाहरलाई शून्यमा क्याच गराएपछि पन्जाब १४.४ ओभरमा १०२–८ को अवस्थामा पुगेको थियो । कागिसो रबाडा १६ बलमा ४ चौका र १ छक्कासहित २५ रनमा आउट भए । ओडेन स्मिथ ९ रनमा अविजित रहे ।

कोलकाताका उमेश यादवले ४ ओभरमा १ मेडनसहित २३ रन खर्चेर ४ विकेट लिए । टिम साउथीले ४ ओभरमा ३६ रन खर्चेर २ विकेट लिए । शिवम माभी, सुनिल नारायाण र आन्द्रे रसेलले १–१ विकेट लिए ।