एजेन्सी – ओपनर तथा विकेटकिपर जस बटलरको शतकको सहयोगमा राजस्थान रोयल्सले इन्डियन प्रिमियर लिग (आइपिएल) २०२२ मा मुम्बई इन्डियन्सलाई २३ रनले पराजित गरेको छ ।

१ सय ९४ रनको विशाल विजयी लक्ष्य पछ्याएको मुम्बईले निर्धारित २० ओभरमा ८ विकेट गुमाउँदै १ सय ७० रन बनायो । मुम्बईका युवा ब्याटर तिलक बर्माले ३३ बलमा ३ चौका र ५ छक्कासहित सर्वाधिक ६१ रनको योगदान दिए । ओपनर ईशान किशन ४३ बलमा ५ चौका र १ छक्कासहित ५४ रनमा क्याच भए ।

तीव्र गतिका बलर प्रसिद्ध कृष्णले दोस्रो ओभरको पाँचौं बलमा कप्तान रोहित शर्मालाई १० रनमा रियान परागबाट क्याच गराए । नवदीप सैनीको बलमा अनोमलप्रीत सिंह ५ रनमा आउट भए । तेस्रो विकेटका लागि किशन र बर्माले ८१ रनको साझेदारी गर्दै जितको सम्भावना कायमै राखेका थिए ।

किशन ट्रेन्ट बोल्टको १३ औं ओभरको अन्तिम बलमा सैनीबाट क्याच भएपछि मुम्बईलाई जितको लागि अन्तिम ४२ बलमा ७३ रन चाहिँएको थियो । १५ औं ओभरको दोस्रो बलमा स्पिनर रविचन्द्रन आश्विनले बर्मालाई बोल्ड आउट गरे । १६ औं ओभरको सुरुवाती दुई बलमा युजभेन्द्र चहलले टिम डेविडलाई १ र ड्यानियल साम्सलाई डक आउट गरेपछि राजस्थान जिततर्फ अघि बढेको थियो ।

काइरन पोलार्डले २४ बलमा ३ चौका र १ छक्कासहित २२ रनमा आउट भए । राजस्थानका युजभेन्द्र चहलले ४ ओभरमा २६ रन खर्चेर २ विकेट लिए । नवदिप सैनीले ३ ओभरमा ३६ रन खर्चेर २ विकेट लिए । ट्रेन्ट बोल्ट, प्रसिद्ध कृष्ण र रविचन्द्रन आश्विनले १–१ विकेट लिए ।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर पहिला ब्याटिङको निम्तो पाएको राजस्थानले निर्धारित २० ओभरमा ८ विकेट गुमाउँदै १ सय ९३ रन बनाएको थियो । राजस्थानका ओपनर तथा विकेटकिपर जस बटलरले ६८ बलमा ११ चौका र ५ छक्कासहित १ सय रनको शतकीय इनिङ खेले । बटलरले ६६ बलमा शतक पूरा गरेका थिए । आइपिएलमा बटलरको दोस्रो शतक हो ।

यसअघि बटलरले २०२१ मा बटलरले सनराइजर्स हैदराबादविरुद्ध ६४ बलमा ११ चौका र ८ छक्कासहित १ सय २४ रनको सानदार इनिङ खेलेका थिए । राजस्थानले ओपनर यशस्वी जैसवाल १ र देवदत्त पाडिक्कललाई ७ रनमा गुमाएको थियो। तेस्रो विकेटका लागि कप्तान सन्जु स्यामसन र बटलरले ८२ रनको साझेदारी गर्दै इनिङ उकासेका थिए ।

स्यामसन २१ बलमा १ चौका र ३ छक्कासहित ३० रनमा क्याच आउट भए । उनी पोलार्डको बलमा तिलक बर्माबाट क्याच भए । शिम्रन हेटमायरले १४ बलमा ३ चौका र ३ छक्कासहित ३५ रनको विष्फोटक इनिङ खेल्दै विशाल योगफलमा पुर्याए । हेटमायर जस्प्रित बुमराहको बलमा तिलक बर्माबाट क्याच भए । बटलरलाई बुमराहले १९ औं ओभरको तेस्रो बलमा बोल्ड आउट गरे ।

मुम्बईका जस्प्रित बुमराहले ४ ओभरमा १७ रन खर्चेर ३ विकेट लिए । टाइमल मिल्सले ४ ओभरमा ३५ रन खर्चेर ३ विकेट लिए । राजस्थानले पहिलो खेलमा हैदराबादलाई ६१ रनले हराएको थियो । अव राजस्थानले मंगलबार रोयल च्यालेन्जर्स बेंगलोरसँग खेल्नेछ । मुम्बई पहिलो खेलमा दिल्ली क्यापिटल्ससँग ४ विकेटले पराजित भएको थियो । तेस्रो खेलमा बुधबार कोलकाता नाइट राइडर्ससँग खेल्नेछ । आजको दोस्रो खेलमा गुजरात टाइटन्स र दिल्लीबीच प्रतिस्पर्धा हुनेछ ।