एजेन्सी – कप्तान बाबर आजमको शतक र उत्कृष्ट बलिङसँगै पाकिस्तानले अष्ट्रेलियासँगको तीन ओडिआई खेलको सिरिज २–१ ले जितेको छ । पाकिस्तानले तेस्रो तथा अन्तिम ओडिआई खेलमा अष्ट्रेलियामाथि ९ विकेटको सानदार जितका सिरिज जितेको हो ।

२ सय ११ रनको मध्यम विजयी लक्ष्य पाकिस्तानले ३७.५ ओभरमा १ विकेट गुमाउँदै पूरा गर्यो । पाकिस्तानको जितमा कप्तान बाबर आजम १ सय १५ बलमा १२ चौकासहित १ सय ५ रनमा अविजित रहे । बाबरको यो ओडिआई करिअरको १६ औं शतक हो । अष्ट्रेलियाविरुद्ध लगातार दुई शतक प्रहार गरेका हुन् । बाबरनै खेलको प्लेयर अफ द म्याच र सिरिज दुबै चुनिए ।

ओपनर इमाम उल हक १ सय बलमा ६ चौका र १ छक्कासहित ८९ रनमा अविजित रहे । उनले पहिलो र दोस्रो ओडिआई खेलमा भने लगातार शतक प्रहार गरेका थिए । दोस्रो विकेटका लागि इमाम र बाबरले १ सय ९० रनको उत्कृष्ट अविजित शतकीय साझेदारी गर्दै जित पक्का गराए । फखार जमान १२ बलमा ३ चौकासहित १७ रनमा आउट भए ।

त्यसअघि गद्दाफी स्टेडियम लाहोरमा टस हारेर पहिला ब्याटिङ थालेको अष्ट्रेलिया ४१.५ ओभरमा २ सय १० रनमा अल आउट भयो । अष्ट्रेलिया विकेटकिपर एलेक्स केरीले ६१ बलमा ६ चौका र १ छक्कासहित सर्वाधिक ५६ रनको योगदान दिए । शेन एबोटले ४० बलमा ६ चौका र १ छक्कासहित ४९ रनमा आउट भए ।

ओपनर ट्रविस हेड र कप्तान अरोन फिन्च दुबै डक (शून्य) भएका थिए । बेन म्याकडेर्मोट ३६, मार्नस लाबुसेन ४, मार्कस स्टोइनिस १९ र क्यामरन ग्रिन ३४ रनमा आउट भए । पाकिस्तानका हरिस रौफले ८.५ ओभरमा १ मेडनसहित ३९ रन खर्चेर ३ विकेट लिए । मोहम्मद वासिमले १० ओभरमा १ मेडनसहित ४० रन खर्चेर ३ विकेट लिए ।

शाहिन शाह अफ्रिदीले २, जहिद मोहम्मद र इफ्तिखर अहमदले १–१ विकेट लिए । पहिलो खेलमा अष्ट्रेलिया ८८ रनले विजयी हुँदा दोस्रो खेलमा ६ विकेटले पराजित भएको थियो । अव यी दुई देशबीच एक मात्र टि२० आई खेल मंगलबार हुनेछ । तीन टेस्ट खेलको सिरिज भने अष्ट्रेलियाले १–० ले जितेको थियो ।

यो पनि : विश्व क्रिकेटका वादशाह बाबर