खेलाडीको क्षमताको असली परिक्षा कठिन समयमा मैदानमा देखाउने प्रदर्शन, धैर्यता र हाउभाउले बताउँछ । निराश अनुहारमा मुस्कान कमैले फर्काउन सक्छन् । हारको मुखबाट कमै खेलाडीले जोगाउन सक्छन् । पाकिस्तानका कप्तान बाबर आजम त्यसका एक उदाहरण हुन् । कभर ड्राइभका लागि विश्व प्रसिद्ध बाबरले पछिल्लो समय अन्तर्राष्ट्रिय क्रिकेटको तीनै शैलीमा उत्कृष्ट प्रदर्शन गर्दै आएका छन् ।

विहीबार बाबरले अष्ट्रेलियाविरुद्ध पाकिस्तानलाई कीर्तिमानी जित दिलाए । जितका लागि ३ सय ४९ रनको विशाल लक्ष्य पछ्याएको पाकिस्तानले ४९ ओभरमा ४ विकेट गुमाउँदै पूरा गर्यो । यो पाकिस्तानले ओडिआई इतिहासमा पूरा गरेको सर्वाधिक ठूलो योगफल थियो । जसका नायक बाबर नै थिए ।

बाबरले ८३ बलमा ११ चौका र १ छक्कासहित १ सय १४ रनको सानदार शतकीय इनिङ खेले । ओपनर इमाम उल हकले ९७ बलमा ६ चौका र ३ छक्कासहित १ सय ६ रन र फखार जमानले ६७ रन जोडेपछि पाकिस्तानले सिरिज १-१ को बराबरीमा पुर्याएको थियो ।

बाबर अष्ट्रेलियाविरुद्ध पाकिस्तानबाट कप्तानको रुपमा सबैभन्दा धेरै रन बनाउने ब्याटर पनि बने । यसअघि इमरान खानले सन् १९९० मा ८२ रन सर्वाधिक थियो । बाबरले पहिलो पटक यस्तो प्रदर्शन गरेका भने होईनन् । पाकिस्तानको जितमा लगातार नायक बन्दै आएका छन् ।

खेल्ने शैली, सटको क्लास, मैदानमा देखाउने धैर्यता, क्षमता र जिम्मेवारी प्रदर्शन बाबरको खुबी हो । ७ वर्षको अन्तर्राष्ट्रिय करिअरमा यस्तै प्रदर्शन र संकट टार्दै बाबरले थुप्रै पटक जित दिलाएका छन् । टेस्ट भन्दा सिमित ओभरमा बाबरको छवी झनै उत्कृष्ट छ ।

केहि साताअघि अष्ट्रेलियाविरुद्ध दोस्रो टेस्ट खेलमा उनले एक यादगार र करिअरको उत्कृष्ट प्रदर्शन गरे । ५ सय ६ रनको विशाल विजयी लक्ष्य पछ्याएको पाकिस्तानले बाबरको सानदार ब्याटिङमा खेल ड्र गर्न सफल भयो । पहिलो इनिङमा ४ सय ८ रनले पछि पर्दै हारको मुखमा पुगेको अवस्थाबाट ड्र रोक्न सफल भयो ।

टेस्टमा पाँचौं दिन ब्याटिङ निकै कठिन पर्छ । तर बाबरले सानदार प्रदर्शन गरे । अझ पहिलो इनिङमा पाकिस्तान १ सय ४८ रनमा अल आउट भएको थियो । अष्ट्रेलियाले चाहेको भए पाकिस्तानलाई फलोअनमा पुन: ब्याटिङ गर्न बोलाउन सक्थ्यो । तर दोस्रो इनिङमा थप ९७ रन जोडेर विजयी लक्ष्य दिएको थियो ।

खेल सकिन झण्डै दुई दिन बाँकी थियो । विश्व स्तरिय तीव्र गतिका बलर प्याट कमिन्स, मिचेल स्टार्क र स्पिनर नाथन लायन जस्ता बलरको सामना गर्न पाकिस्तानलाई सहज थिएन । ओपनर इमाम उल हक १ र अजहर अलीलाई ६ रनमा आउट भए । अघिल्लो खेलमा दुवै इनिङमा शतक प्रहार गरेका इमामको विकेटपछि अष्ट्रेलिया झनै उत्साहित बन्यो ।

तर तेस्रो विकेट लिन लामो समय पर्खनु पर्यो । बाबरले २२ वर्षीय अब्दुल्लाह शफिकसँग मिलेर तेस्रो विकेटका लागि २ सय २८ रनको दोहोरो शतकीय साझेदारीका साथ खेललाई मोड्न सफल भए ।

शफिक प्याट कमिन्सको बलमा फस्ट स्लिपमा स्टिभ स्मिथबाट ९६ रनमा हुँदै दोस्रो शतक बनाउन चुके । बाबरले पाँचौं विकेटका लागि मोहम्मद रिजवानसँग मिलेर १ सय १५ रनको साझेदारी गर्दै एक समय जितको आशा पनि देखाए । बाबरले अष्ट्रेलिया विश्वस्तरिय स्पिन आक्रामण सामु डटेर लडे ।

अघिल्लो महिना एसेज सिरिजमा इंग्ल्यान्डलाई निरिह बनाएको बलिङ आक्रामण पाकिस्तानी ब्याटरसँग कमजोर सावित भए । बाबर करिअरको पहिलो दोहोरो शतक नजिक पुगे । तर स्पिनर नाथन लायनको बलमा मार्नस लाबुसेनबाट १ सय ९६ रनमा क्याच हुन पुगे । बाबरले दोस्रो कुल ४ सय २५ बल खेले । बाबर आउट भएपछि उनको प्रदर्शनलाई लिएर अष्ट्रेलिया सबै खेलाडीले तालिले सम्मान गरेका थिए ।

विपक्षीको सम्मानले उनको प्रदर्शनको महत्व प्रस्टाउँछ । ड्रेसिङ रुममा खेलाडी, प्रशिक्षक र खेल हेर्न कराँची स्टेडियम पुगेका समर्थक सुरुमा स्तब्ध थिए । तर पछि सबैले सम्मान गरे । सामाजिक सञ्जालमा चौतर्फी प्रशंसा भएको छ ।

बाबरले ६ सय ३ मिनेट अर्थात १० घण्टा मैदानमा बिताए । ७१ ओभरको सामना गरे । चौथो इनिङमा यस प्रदर्शन आफैंमा अद्भुत हो ।

बाबर कप्तानको रुपमा तीनै शैलीमा शतक प्रहार विश्व क्रिकेटमा तेस्रो खेलाडी हुन् । यसअघि श्रीलंका पूर्व कप्तान तिलकरत्ने दिलशान र दक्षिण अफ्रिका फाफ डु प्लेसिसले मात्र तीनै शैलीमा कप्तानको रुपमा शतक प्रहार गरेका थिए ।

बाबर टेस्ट इतिहासमा चौथो इनिङमा कप्तानको रुपमा सर्वाधिक ठूलो इनिङ खेल्ने ब्याटर बने । बाबरले इंग्ल्यान्डका पूर्व कप्तान एथर्टन सन् १९९५ मा दक्षिण अफ्रिकाविरुद्ध खेलेको १ सय ८५ रनको कीर्तिमान तोडेका हुन् ।

‘मेरो काम खेलाडी र ड्रेसिङ रुम सकरात्मक राख्ने थियो । टेस्ट क्रिकेटमा तलमाथि हुन्छ नै । जति धेरै सेसन खेलिन्छ । त्यतिनै धेरै फाइदा हुन्छ भन्ने सोच थियो । हाम्रा ब्याटरलाई मैले धेरै आत्माविश्वास दिलाउनु थियो । यो इनिङ पाकिस्तानलाई आवश्यक थियो’, बाबरले भने ।

सन् २०१५ देखि पाकिस्तानको टोलीबाट खेल्न थालेका बाबरले त्यसपछि फर्केर हेर्नु परेको छैन । बाबरको आगमनले पाकिस्तान धेरै फेरिएको छ । पाकिस्तानमा पछिल्लो दुई वर्षमा मोहम्मद रिजवान र बाबरको जोडी मज्जाले जमेको छ । यस खेल बचाउन १ सय ४ रनको अविजित शतकीय इनिङ खेले । बाबर आउट भएपछि त्यो जिम्मेवारी रिजवानले उठाए ।

टि२० मा भने ओपनर जोडी हुन् । यी दुईको प्रदर्शन लोभलाग्दो र उदाहरणीय छ । गत वर्ष टि२० विश्वकपमा पाकिस्तानलाई अपराजित रहँदै सेमिफाइनलमा बाबर र रिजवान नायक बनेका थिए । विश्वकप इतिहासमा पाकिस्तानले पहिलो पटक भारतलाई हराउन सफल भयो ।

‘हेर्नुस् बाबरको विश्व क्लास सबैलाई थाहा छ । बाबर विश्वको नम्बर वान् खेलाडी हुन् । यसमा कुनै कुराको आवश्यक छैन । यस बारे पाकिस्तान र विश्व सबैलाई थाहा छ’, रिजवानले भने ।

पाकिस्तानका पूर्व विश्व प्रसिद्ध तीव्र गतिका बलर शोएब अख्तरले बाबरलाई देखेर युवा खेलाडी क्रिकेटमा लाग्ने बताउँछन् । ‘बाबर त्यो सुपर म्यान खेलाडी हुन् । जसलाई देखेर बच्चा क्रिकेट खेल्न थाल्ने छन् । नयाँ बच्चा बाबर बन्न प्रयास गर्नेछन् । मलाई यस कुरामा धेरै खुसी छ’, अख्तरले भनेका छन् ।

ओडिआई र टि२० आई को विश्व वरियतामा बाबर शीर्षस्थानमा छन् । टेस्टमा पाँचौ स्थानमा छन् । बाबरले ८५ ओडिआई १५ शतक र १८ अर्धशतक सहित कुल ४ हजार १ सय ५६ रन बनाएका छन् । टि२० आईमा ७३ खेलमा १ शतक र २५ अर्धशतकका साथ २ हजार ६ सय २० रन जोडेका छन् । बाबरले २०१६ देखि टि२० क्रिकेटमा निरन्तर राज गर्दै आएका छन् ।

शान्त स्वभावका उनले आफ्नो क्षमता र जिम्मेवारीमा बढी विश्वास राख्छन् । बाबर अन्तिम समय सम्म हार मान्दैनन् । कठिन समयमा पनि डटेर सामना गर्ददछन् । गतवर्ष दक्षिण अफ्रिकालाई घरेलु मैदानमा तेस्रो टि२० आई खेलमा ९ विकेटले हराउन बाबरले १ सय २२ रनको शतकीय इनिङ खेले । बाबरको शतकमा पाकिस्तानले २ सय ४ रनको विशाल लक्ष्य १८ ओभरमै पूरा गरेको थियो ।

२०१९ मा पाकिस्तानले एकदिवसिय विश्वकपमा खराब प्रदर्शन गरेपछि बाबरले कप्तानको जिम्मेवारी पाएका थिए । त्यसपछि पाकिस्तान धेरै फेरिएको छ । रिजवानलाई बाबरले नै ओपनरमा ल्याएका थिए । त्यसपछि रिजवानको प्रदर्शन आकाश पातलको फरक छ । बाबरले उमेर समूह देखिनै क्लासिक र मैदानमा परिपक्क प्रदर्शन गर्दै आएका छन् ।

२०१२ को यू१९ विश्वकपमा ६ खेलमा २ सय ८७ रनका साथ दोस्रो स्थानमा थिए । २०१९ को एकदिवसिय विश्वकपमा बाबरले ८ खेलमा ४ सय ७४ रन जोडे । उक्त विश्वकपमा न्युजिल्यान्डलाई ६ विकेटले हराउन १ सय १ रनको अविजित शतकीय इनिङ खेलेका थिए । गत जुलाईमा इंग्ल्यान्डविरुद्ध तेस्रो ओडिआई खेलमा १ सय ५८ रनको शतकीय इनिङ खेलेका थिए ।

बाबरले घरेलु र विदेशी दुवै भूमिमा लगातार तीनै शैलीमा उत्कृष्ट प्रदर्शन गर्दै आएका छन् । फर्म्याट र ठाउँ फेरिन्छ । तर उनले रन बनाउने तरिका र प्रदर्शन भने फेरिएको छैन । भारत, अष्ट्रेलिया र इंग्ल्यान्ड जस्ता देशमा जस्तै टोली धेरै ब्याटरमा निर्भर हुँदैन । पाकिस्तानबाट ब्याटिङमा धेरै जिम्मेवारी बाबरको काँधमा हुने गर्दछ । पछिल्लो समय रिजवानले उत्कृष्ट साथ दिँदै आएका छन् ।

विश्व क्रिकेटमा फ्याब ४ (विश्वका चार फेबरेट खेलाडी) मा भारतका विराट कोहली, न्युजिल्यान्डका केन विलियम्सन, इंग्ल्यान्डका जो रुट र अष्ट्रेलिया स्टिभ स्मिथको नाम लिइन्छ । बाबर अब त्यस सुचिमा प्रवेश गर्ने दाबेदार हुन् । बाबर उमेरले बल्ल २७ वर्षको हुँदा लामो समय क्रिकेट खेल्ने अनुमान गर्न सकिन्छ । त्यस समयमा उनले तीनै शैलीमा लामो समय विश्वमा राज गर्ने संकेत देखाएका छन् ।

बाबर २०२१ मा आइसिसीको टि२० आई र ओडिआई दुवै टोलीको कप्तान पनि हुन् । २०२१ को उत्कृष्ट ओडिआई खेलाडीको अवार्ड जितेका थिए । २०२१ को टि२० विश्व कपमा बाबरले ६ खेलमा ४ अर्धशतक सहित ३ सय ३ रन बनाएका थिए । बाबर अब विश्व क्रिकेटका नयाँ वादशाह हुन् भन्दा कुनै फरक नपर्ला । उनी हरेक विपक्षी टोलीलाई लामो समय सम्म तगारो बन्नेछन् । उनको प्रदर्शन र कप्तानीमा पाकिस्तानको भाग्य धेरै फेरिनेछ ।

अन्तर्राष्ट्रिय क्रिकेटमा बाबरको ब्याटबाट उत्कृष्ट प्रदर्शन निस्किन बाँकी नै छ । यो त उनको सुरुवात मात्रै हो । अष्ट्रेलियाले २४ वर्षपछि पाकिस्तान भ्रमण गरेको हो । बाबर, रिजवान र तीव्र गतिका बलर शाहिन शाह अफ्रिदी जस्ता खेलाडीले पाकिस्तान भ्रमणमा अझ बढी इच्छुक भएको हो ।

अहिलेको प्रदर्शन र टोलीले थप ठूला टोली पाकिस्तानमा गएर खेल्न इच्छा देखाउने छन् । शक्तिशाली टोली भन्नेलाई पाकिस्तानमा गएर खेल्न चुनौती पनि हो । बाबरको प्रदर्शन र कप्तानी त्यसको एक कारण हो । बाबरले आफ्नो कप्तानी र प्रदर्शनमा पाकिस्तानलाई अर्को स्तरमा पुर्याउनेमा भने कुनै शंका छैन । तीनै शैलीमा राज गरेका हुँदा अव विश्व क्रिकेटका बादसाह पनि बाबरनै देखिन्छन् ।

यो पनि : विराट उत्कृष्ट कि बाबर ?

रिजवान : आइसियुबाट उठेर मैदानमा प्रदर्शन