एजेन्सी – दक्षिण अफ्रिका डेवाल्ड ब्रेभिसले (बेबी एबी) इन्डियन प्रिमियर लिग (आइपिएल) २०२२ मा मुम्बई इन्डियन्सबाट कोलकाता नाइट राइडर्सविरुद्ध डेब्यू गरेका छन् । महाराष्ट्र क्रिकेट एसोसियसन स्टेडियम पुणेमा कोलकाताका कप्तान श्रेयस ऐरले टस जितेर पहिला फिल्डिङ गर्ने निर्णय लिएका छन् ।

मुम्बईले टोलीमा दुई परिवर्तन गरेको छ । अनमोलप्रितसिंहको स्थानमा सूर्य कुमार यादव र टिम डेविडको स्थानमा डेवाल्ड ब्रेभिसलाई मैदान उतारेको छ । कोलकाताले पनि टोलीमा दुई परिवर्तन गरेको छ । टिम साउथीको स्थानमा प्याट कमिन्स र शिवम माभीको स्थानमा राशिख ईस्लामलाई मौका दिएको छ ।

मेगा अक्सनमा मुम्बईले ब्रेभिसलाई तीन करोड भारुमा अनुबन्ध गरेको थियो । अक्सनमा न्यूनतम मूल्य २० लाख रोखका ब्रेभिसलाई किन्न चेन्नई सुपर किंग्स, मुम्बई इन्डियन्स र पन्जाब किंग्सबीच प्रतिस्पर्धा भएको थियो । अन्तिममा मुम्बईल ३ करोड भारुमा किनेको थियो ।

दुई महिना अघि वेस्टइन्डिजमा सम्पन्न यू-१९ विश्वकप २०२२ को सर्वोत्कृष्ट खेलाडी (प्लेयर अफ द टुनामेन्ट) चुनिएका थिए । दक्षिण अफ्रिका क्वाटरफाइनलबाट बाहिरिएपनि ब्रेभिसले पूर्व दक्षिण अफ्रिकी ब्याटर एवी डेभिलियर्सको शैलीमा ब्याटिङ गर्दै दुई शतकका साथ कीर्तिमानी रन बनाएका थिए ।

ब्रेभिस प्रतियोगितामा ६ खेलमा २ शतक ३ अर्धशतक सहित कुल ५ सय ६ रनका साथ शीर्षस्थानमा थिए । ब्रेभिस एकै यू१९ विश्वकप इतिहासमा सर्वाधिक रन बनाउने ब्याटर हुन् । उनले भारतीय ब्याटर शिखर धवनले २००४ को यू–१९ विश्वकपमा तीन शतकसहित बनाएको ५ सय ५ रनको कीर्तिमान तोडेका हुन् ।

ब्रेभिसले बंगलादेशविरुद्ध १ सय ३० बलमा ११ चौका र ७ छक्कासहित १ सय ३८ रनको उत्कृष्ट शतकीय इनिङ खेलेका थिए । श्रीलंकासँग भने उनी ६ रनमा आउट भएका थिए । उनी अर्धशतक नबनाई आउट भएको यो मात्र एक खेल हो ।

क्वाटरफाइनलमा इंग्ल्यान्डविरुद्ध उनले ८८ बलमा ९ चौका र ४ छक्कासहित ९७ रनको इनिङ खेलेपनि ६ विकेटले पराजित हुँदै बाहिरिएको थियो । उनले आयरल्यान्डसँग ९६, युगान्डाविरुद्ध १ सय ४ र भारतविरुद्ध ६५ रनको इनिङ खेल्दै उत्कृष्ट ब्याटिङ गरेका थिए ।

एवि डिभिलियर्सको खेल्ने शैली र ब्रेभिसको हाउभाउ सबै एउटै छ । त्यसैले उनलाई बेबी एवि भनिएको हो । यू–१९ विश्वकपमा सानदार प्रदर्शनसँगै उनलाई दक्षिण अफ्रिका भविष्यको रुपमा हेरिएको छ । दिल्लीसँग १२ र राजस्थानसँग १ रनमा आउट भएका टिम डेविडको स्थानमा मुम्बईले आजको खेलमा डेवाल्ड ब्रेभिसलाई डेब्यू दिने निर्णय लिएको हो ।

रोहित शर्माको कप्तानीमा रहेको मुम्बई यस सिजनमा पहिलो जित निकाल्ने सोचमा हुनेछ । मुम्बई पहिलो खेलमा दिल्ली क्यापिटल्ससँग ४ विकेट र दोस्रो खेलमा राजस्थान रोयल्ससँग २३ रनले पराजित भएको थियो ।

श्रेयस ऐरको कप्तानीमा रहेको कोलकाता भने तेस्रो जितका साथ शीर्ष स्थानमा उक्लिने सोचमा हुनेछ । कोलकाताले चेन्नई सुपर किंग्स र पन्जाब किंग्सलाई समान ६ विकेटले हराएको थियो । रोयल च्यालेन्जर्स बेंगलोरसँग ३ विकेटले पराजित भएको थियो ।

ब्रेभिसको क्रिकेट जीवनी : डेवाल्ड ब्रेभिस : बेबी एवि उर्फ दोस्रो डि भिलियर्स