काठमाडौं (हाम्रो खेलकुद) – त्रिभुवन आर्मी क्लबले भैरहवामा जारी प्रो क्लब च्याम्पियनसिपमा ट्यालेन्ट हन्ट क्रिकेट एकेडेमीलाई ८ विकेटले हराउँदै लगातार दोस्रो जित हात पारेको छ ।

९७ रनको सामान्य लक्ष्य आर्मीले १४ ओभरमा २ विकेट गुमाउँदै पूरा गर्यो । आर्मीको जितमा रोहित पौडेल २६ बलमा ५ चौका र १ छक्कासहित ४१ रनमा अविजित रहे । भीम सार्की २२ बलमा १४ रनमा अविजित रहे । ओपनर हरि चौहान २२ बलमा ४ चौकासहित २४ र सन्तोष कार्की ५ रनमा आउट भए ।

एकेडेमीले सन्दीप कुमार र मोहम्मद उमरले १–१ विकेट लिए । त्यसअघि सिद्धार्थ रंगशाला भैरहवामा टस जितेर पहिला ब्याटिङ थालेको एकेडेमीले निर्धारित २० ओभरमा ८ विकेट गुमाउँदै ९६ रन बनायो । उत्तम मगरले ३१ बलमा १ चौकासहित १६ रन बनाए । उमर १३, आशिष रत्नम १० र मोहम्मद मोसहरार्फ १५ रन बनाए । अबिदुर कैफले १० बलमा २ चौका र २ छक्कासहित सर्वाधिक २३ रन बनाए ।

आर्मीका बायाँ हाते स्पिनर कुशल मल्लले ४ ओभरमा १६ रन खर्चेर ३ विकेट लिए । कुशल नै प्लेयर अफ द म्याच चुनिए । सुशान भारीले ४ ओभरमा ७ रन खर्चेर २ विकेट लिए । सोमपाल कामीले २ र साहब आलमले १ विकेट लिए ।

आर्मीले पहिलो खेलमा नेपाल एपिएफ क्लबलाई ५१ रनले हराएको थियो । एकेडेमी भने उत्तर प्रदेश क्लब–११ सँग ८ विकेटले पराजित भएको थियो । आर्मीले अव बुधबार उत्तर प्रदेशसँग खेल्नेछ । एकेडेमीले मंगलबार एपिएफसँग खेल्नेछ ।

पुलिसमाथि रुपन्देहीको सानदार जित