काठमाडौं(हाम्रो खेलकुद) – अघिल्लो साता घरेलु मैदान टियुमा मलेसिया र पपुवा न्युगिनीसँग त्रिकोणात्मक टि२० आई सिरिजमा विजेता नेपाली खेलाडीले जनही २ लाख पुरस्कार पाउने भएका छन् ।

बुधबार बसेको मन्त्रिपरिषदको बैठकले नेपाली राष्ट्रिय टिमका खेलाडीलाई जनही २ लाख रुपौयाँले पुरस्कृत गर्ने निर्णय गरेको हो । युवा तथा खेलकुद मन्त्रालयको प्रस्तावमा मन्त्रिपरिषदको बैठकले विजेता खेलाडी तथा प्रशिक्षकहरुलाई पुरस्कृत गर्ने निर्णय गरेको हो ।

निर्णय अनुसार १६ खेलाडीले २–२ लाख नगद पुरस्कार पाउनेछन् । मुख्य प्रशिक्षक पुबुदु दासानायकेले नगद १ लाख ५० हजार तथा अन्य अफिसियलले जनही १ लाख रुपैयाँ प्राप्त गर्ने छन् । नेपालले फाइनलमा पीएनजीलाई ५० रनले हराउँदै उपाधि जितेको थियो ।

नेपालले अपराजित रहँदै उपाधि जितेको थियो । फाइनलमा १ सय ६९ रनको विजयी लक्ष्य पछ्याएको पीएनजी १६.१ ओभरमा १ सय १८ रनले पराजित भएको थियो । लिगमा नेपालले पीएनजीलाई पहिलो टि२० आई खेलमा १५ रन र ३७ रनले हराएको थियो । मलेसियालाई पहिलो खेलमा ६ विकेट र दोस्रो खेलमा ८५ रनले हराएको थियो ।

नेपालले गत वर्ष वैशाखमा घरेलु मैदान टियु मै मलेसिया र नेदरल्यान्ड्ससँग त्रिकोणात्मक टि२० आई सिरिजको उपाधि जितेको थियो । सरकारले पुरस्कार भने दिएको थिएन । त्यसै समयमा थ्रि नेशन फुटबल टोलीलाई भने सरकारले जनही पाँच लाख रुपैयाँ प्रदान गरेको थियो । त्यसैले सरकारको केहि आलोचना पनि भएको थियो ।