काठमाडौं (हाम्रो खेलकुद) – भैरहवामा जारी प्रो क्लब च्याम्पियनसिपमा शुक्रबार नेपाल एपिएफ क्लब र उत्तर प्रदेश क्लब–११ ले जितका साथ अन्त्य गरेका छन् । त्रिभुवन आर्मी क्लबका कुशल मल्लले युपीविरुद्ध पाँच वाइड सहित कुल एकै ओभरम ३१ रन बनाए । नेपाल एपिएफ क्लबका कप्तान प्रदीप ऐरी पुश स्पोर्ट्स दिल्लीविरुद्ध एक बल पनि नखेली आउट भए ।

तेस्रो स्थानको लागि भएको खेलमा युपीले आर्मीलाई ३० रनले हरायो । जितका लागि १ सय ४० रनको विजयी लक्ष्य पछ्याएको आर्मी १८ ओभरमा १ सय ९ रनमा अल आउट भयो । आर्मीका बायाँ हाते ओपनर कुशल मल्लले १९ बलमा ३ चौका र ३ छक्कासहित सर्वाधिक ३५ रन बनाए । सन्तोष कार्की १०, भीम सार्की ११, रोहित पौडेल ३, विनोद भण्डारी ९ र सोमपाल कामी १ रनमा आउट भए ।

कुशलले ओपनिङ गर्दै एकै चौथो ओभरमा प्रिन्स शाहीलाई पाँच वाइड सहित कुल ३१ रन बटुलेका थिए । कुशलले पहिलो र दोस्रो बलमा लगातार छक्का प्रहार गरे । त्यसपछि तेस्रो र चौथो बलमा लगातार चौका प्रहार गरे । प्रिन्सले पाँचौं बल वाइड को रुपमा पाँच रन खर्चिए । अर्को बल डट खादा अन्तिम बलमा छक्का प्रहार गरे ।

युपीका विपिन चन्द्र र तेजास सिंह ३–३ विकेट लिए । दिव्या सिंहले २ विकेट लिए । त्यसअघि सिद्धार्थ रंगशाला भैरहवामा टस जितेर ब्याटिङ थालेको युपीले २० ओभरमा ८ विकेट गुमाउँदै १ सय ३९ रन बनायो । युपीका ओपनर सन्दीप मित्तलले ३७ बलमा ५ चौका र २ छक्कासहित सर्वाधिक ४३ रन बनाए । सनि सिंह २६ रनमा आउट भए ।

आर्मीका सोमपाल कामीले ३, साहब आलम र सुशान भारीले २–२ विकेट लिए । पाँचौं स्थानको लागि भएको खेलमा एपिएफले पुश स्पोर्ट्स दिल्लीलाई ६ विकेटले हरायो । ६३ रनको लक्ष्य एपिएफले १२.२ ओभरमा ४ विकेट गुमाउँदै पूरा गर्यो । एपिएफका आयुषमान बमले २१, लोकेश बम ६, सन्दीप जोरा १२, सुमित महर्जन ११, अनिन्दो नहारेले २ विकेट लिए ।

कप्तान प्रदीप ऐरी वाइड बलमा स्टम्पिङ आउट भए । पहिलो ओभरको पहिलो बल नै हर्षवर्धन फागेट बल वाइड भएपनि प्रदीप ऐरी विकेटकिपर मृगान पाठकबाट स्टम्पिङ आउट भएपछि बल नै नखेली रोयल डक आउट हुन पुगे। त्यसअघि टस जितेर ब्याटिङ थालेको दिल्ली १७.५ ओभरमा ६२ रनमा अल आउट भयो ।

दिल्लीका ओपनर आदित्य जैन २६ बलमा ५ चौका र १ छक्कासहित ३३ रनमा आउट भए । एपिएफका भुवन कार्कीले ४ ओभरमा २३ रन खर्चेर ४ विकेट लिए । विपिन खत्रीले २, अमर सिंह राउटेला र नन्दन यादवले १–१ विकेट लिए । फाइनलमा मलेसिया–११ र रुपन्देही–११ बीच शनिबार प्रतिस्पर्धा हुनेछ ।

बिहीबार रुपन्देहीले सिनियर टोलीका खेलाडीको बाहुल्यता भएको आर्मीलाई ६ विकेट र मलेसियाले उत्तर प्रदेश–११ क्लबलाई १४ रनले हराउँदै फाइनलमा स्थान बनाएको थियो । समूह चरणमा मलेसिया सिनियर टोलीलाई रुपन्देहीले ६ विकेटले हराएको थियो ।