काठमाडौं (हाम्रो खेलकुद)- काभा मेन्स भलिबल क्लब च्याम्पियनसिपमा आज लिग चरणका अन्तिम दुई खेल हुनेछ।

पहिलो खेलमा शीर्षस्थानको लागि घरेलु टोली टिप टप हेल्प नेपाल स्पोर्टस क्लब र इरान यु-१८ टोलीबीच प्रतिस्पर्धा हुँदैछ। त्रिपुरेश्वरस्थित राष्ट्रिय खेलकुद परिषद्को‌ कर्भड हलमा खेल दिउँसो १ बजे सुरु हुनेछ।

लिगको सबैभन्दा रोमाञ्चक खेलको रूपमा यो खेललाई हेरिएको छ। किनकी दुवै टोली अपराजित रहेका छन। दुवै टिमले यसअघि लगातार तीन जित सहित एक खेल अगाडि नै सेमिफाइनलमा स्थान सुरक्षित समेत गरिसकेका छन्।

आजको खेलले लिग चरणको विजेताको टुङ्गो लाग्नेछ। अंक तालिकामा भने टिपटप ८ अंकका साथ शीर्षस्थानमा रहेको छ। इरान यु-१८ टोली ७ अंक सहित दोस्रो स्थानमा रहेको छ।

आज हुने लिग चरणकै अन्तिम खेलमा भने भारतको क्यालीकट र नेपालको गण्डकी प्रदेश भलिबल संघबीच प्रतिस्पर्धा हुनेछ। लिग चरणमा दुई खेल हारेपनि क्यालिकटले पनि एक खेल अगाडि नै सेमिफाइनलमा स्थान भने बनाइसकेको छ।

क्यालिकट पहिलो खेलमा टिपटप हेल्प नेपालसँग हारेको थियो। दोस्रो खेलमा माल्दिभ्सको क्लब एचडिसीलाई सोझो सेटमा हराउँदा इरानसँग सोझो सेटमा पराजित भएको थियो। उसले ३ खेलबाट मात्र ४ अंक बनाएको छ।

गण्डकीलाई भने सेमिफाइनल संभावनाको लागि सोझो सेटको जितको विकल्प छैन। सोझो सेटको जितले मात्र उसले सेमिफाइनलको यात्रा तय गर्नेछ। त्यसैले यो खेलमा गण्डकी दबाबमा रहनेछ। यो खेल साँझ ३ बजे हुनेछ।

आजको दुई खेलपछि सेमिफाइनल समिकरण पूरा हुनेछ। लिगको शीर्षस्थानमा रहने टिमले तेस्रो स्थानमा रहने टिमसँग सेमिफाइनल खेल्नेछ। यस्तै अर्को सेमिफाइनलमा दोस्रो हुने टिमको सामना चौथो स्थानमा रहेको टिमले गर्नेछ।

दुवै सेमिफाइनल शुक्रवार हुनेछन्। प्रतियोगिताको हाम्रो खेलकुद र कान्तिपुर म्याक्स एचडीले प्रत्यक्ष प्रसारण गर्नेछ।