एजेन्सी – कोलकाता नाइट राइडर्सले इन्डियन प्रिमियर लिग (आइपिएल) २०२२ को ४७ औं खेलमा राजस्थान रोयल्सलाई ७ विकेटले पराजित गरेको छ । योसँगै कोलकाताले लगातार पाँच खेलमा हारको यात्रा अन्त्य गर्दै प्ले अफको अंक गणीतिय सम्भावना कायमै राखेको छ ।

जितको लागि १ सय ५३ रनको विजयी लक्ष्य पछ्याएको कोलकाताले १९.१ ओभरमा ३ विकेट गुमाउँदै पूरा गर्यो । कोलाकाताका रिन्कु सिंह २३ बलमा ६ चौका र १ छक्कासहित ४२ रनमा अविजित रहे । नितिश राणा ३७ बलमा ३ चौका र २ छक्कासहित ४८ रनमा अविजित रहे ।

ओपनर आरोन फिन्च ४ र बाबा इन्द्रजित १५ रनमा आउट भए । कप्तान श्रेयस ऐरले ३२ बलमा ३ चौका र १ छक्कासहित ३४ रनमा आउट भए । राजस्थानका टे«न्ट बोल्ट, प्रसिद्ध कृष्ण र कुलदीप सेनले १–१ विकेट लिए ।

त्यसअघि वानखडे स्टेडियम मुम्बईमा टस हारेर ब्याटिङको निम्तो पाएको राजस्थानले निर्धारित २० ओभरमा ५ विकेट गुमाउँदै १ सय ५२ रन बनाएको थियो । राजस्थानका कप्तान सञ्जु स्यामसनले ४९ बलमा ७ चौका र १ छक्कासहित सर्वाधिक ५४ रनको योगदान दिए । शिम्रन हेटमायरले १३ बलमा १ चौका र २ छक्कासहित २७ रनमा अविजित रहे ।

ओपनर जस बटलर २२, देवदत्त पाडिक्कल २, करुण नायर १३ र रियान पराग १९ रनमा आउट भए । कोलकाताका टिम साउथीले ४ ओभरमा ४६ रन खर्चेर २ विकेट लिए । शिवम माभी, उमेश यादव र अनुकोल रोयले १–१ विकेट लिए ।

कोलकातालाई प्लेअफमा पुग्न बाँकी चार खेलमा जित निकाल्नुको साथै अन्य टोलीको नतिजामा भर पर्नुपर्ने हुन्छ । कोलकाताले शनिबार लखनऊ सुपर जायन्ट्ससँग खेल्नेछ । राजस्थानको भने प्लेअफ सम्भावना बलियो छ । राजस्थानले पनि शनिबार नै पन्जाब किंग्ससँग खेल्नेछ ।

अंक तालिका

गुजरात ९ खेलमा ८ मा जित र १ मा हारका १६ अंक जोड्दै शीर्ष स्थानमा छ । लखनऊ १० खेलमा ७ मा जित र ३ मा हार सहित १४ अंक जोड्दै दोस्रो स्थानमा छ । राजस्थान रोयल्स १० खेलमा ६ मा जित र ४ मा हार सहित १२ अंकका साथ तेस्रो स्थानमा छ । हैदराबाद ९ खेलमा ५ मा जित र ४ मा हार सहित चौथो स्थानमा छ ।

बेंगलोर १० खेलमा ५ मा जित र ५ मा हार सहित १० अंकका साथ पाँचौं स्थानमा छ । दिल्ली ९ खेलमा ४ मा जित र ५ मा हार सहित छैटौं स्थानमा छ । कोलकाता नाइट राइडर्स १० खेलमा ४ मा जित र ६ खेलमा हार सहित सातौं स्थानमा छ । पन्जाब ९ खेलमा ४ मा जित र ५ मा हार सहित आठौं स्थानमा छ ।

चेन्नई ९ खेलमा ३ मा जित र ६ मा हार सहित नवौं स्थानमा छ । मुम्बई ९ खेलमा १ मा जित र ८ मा हार सहित पुछारमा छ ।