काठमाडौं (हाम्रो खेलकुद) – नेपाल क्रिकेट संघ (क्यान) ले नेपाली महिला राष्ट्रिय क्रिकेट टोलीको उपकप्तानमा ब्याटर इन्दु वर्मालाई नियुक्त गरेको छ ।

सिता रानामगरको स्थानमा इन्दुलाई उपकप्तान नियुक्त गरिएको हो । सोमबारदेखि सुरु हुने युगान्डाविरुद्धको टि२० सिरिजका लागि घोषित टोलीमा रहेपनि सिता हाल दुबईमा जारी फेयरब्रेक आमन्त्रण प्रतियोगिता खेलिरहेकी छिन् । उनले टोलीका लागि प्रभावशाली प्रदर्शन गरिरहेकी छिन् ।

क्यानका कार्यवाहक सचिव प्रशान्तविक्रम मल्लले सिताको स्थानमा इन्दुलाई पूर्णकालिन उपकप्तानको जिम्मेवारी दिइएको बताए । यससँगै क्यानले महिला टोलीमा केन्द्रिय सम्झौता रहेका खेलाडीको पनि रकम बढाएको छ ।

सिता आज हुने फेयरब्रेक प्रतियोगिताको फाइनलमा टोर्नाडो टोलीका लागि खेल्ने कार्यक्रम रहेको छ । राष्ट्रिय टोलीकी कप्तान रुविना क्षेत्री भने युगान्डाविरूद सिरिजका लागि नेपाल आइसकेकी छिन् । उनी पनि फेयरब्रेकमा बार्मी आर्मीको टोलीमा रहेकी थिइन् । उनले कमै अवसर पाएकी थिइन् ।

नेपाल र युगान्डाबीच ५ खेलको टि२० अन्तर्राष्ट्रिय सिरिज हुँदैछ । नेपालले सिरिजका लागि १६ सदस्यीय अन्तिम टोली घोषणा गरिसकेको छ । दुबईमा रहेकी सिताले सुरुवाती खेल गुमाउनेछिन् ।

यो पनि : अस्मिना र हिरान्मायेलाई पहिलो पटक समेट्दै नेपालको टोली घोषणा