काठमाडौं (हाम्रो खेलकुद) – नेपाली राष्ट्रिय महिला क्रिकेट टोलीले दोस्रो महिला टि२० आई खेलमा आज युगान्डासँग खेल्दैछ । खेल दिउँसो १ बजे टियु मैदानमा सुरुहुनेछ । पाँच महिला टि२० आई खेलमा युगान्डाले १–० को अग्रता लिएको छ ।

पहिलो खेलमा नेपाल १२ रनले पराजित भएको थियो । जितको लागि १ सय ३ रनको मध्यम विजयी लक्ष्य पछ्याएको नेपालले ९ विकेट गुमाउँदै ९० रन जोड्न सकेको थियो । नेपालले आजको खेलमा ब्याटिङमा केहि परिवर्तन गर्नेछ । प्रमुख अलराउन्डर सीता रानामगर दोस्रो खेलमा उपलब्ध हुने हुँदा नेपालको टोली थप मजबुत बन्नेछ ।

बायाँ हाते सीता फेयर ब्रेक इन्भिटेसनल खेलेर सोमबार नेपाल फर्केको हुँदा खेलको लागि उपलब्ध हुनेछिन् । सीता उपलब्ध हुँदा बायाँ हाते ओपनर विन्दु रावल टोली बाहिर हुनेछन् । सीता ओपनिङसँगै बलिङ र उत्कृष्ट फिल्डर समेत हुन् । फेयर ब्रेकमा उत्कृष्ट प्रदर्शनका साथ उच्च मनोबलका साथ स्वदेश फर्केकी उनको प्रदर्शन धेरै महत्वपूर्ण हुनेछ ।

विकेटकिपर ज्योति पाण्डे र उपकप्तान इन्दु बर्माको प्रदर्शन महत्वपूर्ण हुनसक्छ । रुविनाले पाँचौं र अप्सरी बेगमले चौथो नम्बरमा ब्याटिङ गर्न सक्छन् । अप्सरीको स्थानमा स्पिनर संगिता राई र हिरान्माये रोय मध्य एकलाई मौका दिनसक्छ । तीव्र गतिका बलरमा कविता कुँवर, सबनम राई र अस्मिना कर्माचार्य हुनेछन् ।

नेपालले पहिलो खेलमा तीन प्रमुख ब्याटर रन आउटको रुपमा गुमाएको थियो । फिटनेश र फिल्डिङ नेपालको निकै कमजोर देखिएको थियो । आजको खेलमा फिल्डिङमा सुधार विना जित कठिन देखिन्छ ।

युगान्डाकी रिता मुसामाली टोलीकी प्रमुख ब्याटर हुन् । उनको प्रदर्शन महत्वपूर्ण हुनेछ । जेनेत म्वाबाजी र रिता न्यागेन्डोले पनि पहिलो खेलमा राम्रो ब्याटिङको सम्भावना देखाएका थिए । सोमबार साँझ भारी वर्षाले भिजेको आउटफिल्डले खेल समयमै सुरु हुने सम्भावना कम छ । आज पुन पानी परेको खण्डमा भने खेल हुने सम्भावना कम रहन्छ ।