काठमाडौं (हाम्रो खेलकुद) – अन्तिम ओभरमा १५ रन बनाउँदा घरेलु टोली नेपालले दोस्रो महिला टि२० आई खेलमा युगान्डालाई १ सय २ रनको मध्यम लक्ष्य दिएको छ । टियु क्रिकेट मैदानमा टस हारेर ब्याटिङ निम्तो पाएको नेपालले निर्धारित २० ओभरमा ७ विकेट गुमाउँदै १ सय १ रन बनायो ।

नेपालकी ओपनर विन्दु रावलले ३६ बलमा २ चौकासहित सर्वाधिक २६ रन बनाइन् । सरिता मगरले २७ बलमा २ चौकासहित २२ रन आउट भइन् । नेपालले अन्तिम ओभरमा जेनेत म्वाबाजीलाई १५ रन प्रहार गर्दै एक सय रन कटाएको थियो । डली भट्टले पहिलो बलमा छक्का र रुविना क्षेत्री बेलबासले चौथो बलमा चौका प्रहार गरेका थिए ।

ओपनर इन्दु बर्मा १३ बलमा ५ रन बनाउँदै बोल्ड भइन् । अप्सरी बेगमलाई जेनेत म्वाबाजीले ३ रनमा बोल्ड गरिन् । अप्सरीले १२ बल खेलेकी थिइन् । १३ औं ओभरको चौथो बलमा ओपनर विन्दु रावल रिता मुसामालीको बलमा २६ रनमा कटएण्ड बोल्ड भइन् । तेसो विकेटका लागि विन्दु र सरिता मगरले २१ रनको साझेदारी गरेका थिए ।

चौथो विकेटका लागि सीता र सरिताले १० बलमा १६ रन जोड्दै रनको गति बढाए । सीता ९ बलमा ६ रनमा आउट भइन् । दुई रन लिनेक्रममा सीता रन आउट हुन पुगेकी थिइन् । हिटर कविता जोशी कोन्सी एविकोको बलमा शून्यमा बोल्ड भइन् ।

डली भट्ट ७ बलमा १ छक्कासहित ९ रनमा अविजित रहिन् । रुविना क्षेत्री १५ बलमा २ चौकासहित १७ रन जोड्दै अन्तिम बलमा रन आउट भइन् । नेपालले पावर प्लेको ३६ बल मध्य २३ बल डट खेल्दै निकै सुस्त सुरुवात गरेको थियो ।

युगान्डाकी जेनेत म्वाबाजीले ४ ओभरमा २६ रन खर्चेर २ विकेट लिइन् । एभलिन एनपो, कोन्सी एविको र रिता मुसामालीले १-१ विकेट लिए ।