काठमाडौं (हाम्रो खेलकुद) – युगान्डाले दोस्रो महिला टि२० आई खेलमा घरेलु टोली नेपालमाथि एक विकेटको रोमान्चक जित हात पारेको छ । योसँगै युगान्डाले पाँच महिला टि२० आई खेलको सिरिजमा २–० को अग्रता लिएको छ ।

जितको लागि १ सय २ रनको विजयी लक्ष्य पछ्याएको युगान्डाले १९.५ ओभरमा ९ विकेट गुमाउँदै पूरा गर्यो । युगान्डाको जितमा रिता मुसामालीले ३४ बलमा ३ चौकासहित सर्वाधिक ३० रन बनाइन् । फ्रेन्कलिन नाजुम्बा २८ बलमा १ चौकासहित महत्वपूर्ण १९ रन जोडिन् ।

युगान्डालाई जितको लागि अन्तिम १२ बलमा जितको लागि १० रन चाहिँएको थियो । सबनम राइले १९ औं ओभरको अन्तिम दुई बलमा दुई विकेट लिँदै चार रन खर्चेपछि नेपालको झिनो आशा बचेको थियो । अन्तिम ओभरको पहिलो बल कविताले वाइड फ्याँलिन् । पहिलो बलमा नजुम्बा स्क्वायर लेगमा विन्दु रावलबाट क्याच भएपछि जितको आशा पलाएको थियो ।

दोस्रो बलमा दुई रन लिनेक्रममा सारा एविको रन आउट भइन् । तेस्रो बलमा एक र चौथो बलमा फिल्डिङ मिसका साथ दुई रन खर्चेपछि दुई बलमा एक रन चाहिँएको थियो । पाँचौं बलमा एक रन बटुल्दै जित पक्का गरिन् ।

पहिलो ओभरको चौथो बलमै कविता कुँवरले ओपनर केभिन एविनोलाई ४ रनमा इन्दु बर्माबाट क्याच गराइन् । पाँचौं ओभरको पाँचौं बलमा सीता रानामगरले जेनेत म्बावाजीलाई १६ रनमा कट एण्ड बोल्ड आउट गरिन् । १६ बल खेलेकी उनले ३ चौका प्रहार गरिन् । लेयोना बबिरे ९ रनमा आउट भइन्।

नेपालको सबनम राइले ४ ओभरमा २३ रन खर्चेर २ विकेट लिइन् । कविता कुँवरले ३.५ ओभरमा १८ रन खर्चेर २ विकेट लिइन् । सीता रानामगर र रुविना क्षेत्री बेलबासेले १–१ विकेट लिए।

त्यसअघि टियु क्रिकेट मैदानमा टस हारेर ब्याटिङ निम्तो पाएको नेपालले निर्धारित २० ओभरमा ७ विकेट गुमाउँदै १ सय १ रन बनाएको थियो । नेपालकी ओपनर विन्दु रावलले ३६ बलमा २ चौकासहित सर्वाधिक २६ रन बनाइन् । सरिता मगरले २७ बलमा २ चौकासहित २२ रन आउट भइन् ।

नेपालले अन्तिम ओभरमा जेनेत म्वाबाजीलाई १५ रन प्रहार गर्दै एक सय रन कटाएको थियो । डली भट्टले पहिलो बलमा छक्का र रुविना क्षेत्री बेलबासले चौथो बलमा चौका प्रहार गरेका थिए । ओपनर इन्दु बर्मा १३ बलमा ५ रन बनाउँदै बोल्ड भइन् । अप्सरी बेगमलाई जेनेत म्वाबाजीले ३ रनमा बोल्ड गरिन् ।

अप्सरीले १२ बल खेलेकी थिइन् । १३ औं ओभरको चौथो बलमा ओपनर विन्दु रावल रिता मुसामालीको बलमा २६ रनमा कटएण्ड बोल्ड भइन् । तेसो विकेटका लागि विन्दु र सरिता मगरले २१ रनको साझेदारी गरेका थिए ।

चौथो विकेटका लागि सीता र सरिताले १० बलमा १६ रन जोड्दै रनको गति बढाए । सीता ९ बलमा ६ रनमा आउट भइन् । दुई रन लिनेक्रममा सीता रन आउट हुन पुगेकी थिइन् । हिटर कविता जोशी कोन्सी एविकोको बलमा शून्यमा बोल्ड भइन् ।

डली भट्ट ७ बलमा १ छक्कासहित ९ रनमा अविजित रहिन् । रुविना क्षेत्री १५ बलमा २ चौकासहित १७ रन जोड्दै अन्तिम बलमा रन आउट भइन् । नेपालले पावर प्लेको ३६ बल मध्य २३ बल डट खेल्दै निकै सुस्त सुरुवात गरेको थियो । युगान्डाकी जेनेत म्वाबाजीले ४ ओभरमा २६ रन खर्चेर २ विकेट लिइन् । एभलिन एनपो, कोन्सी एविको र रिता मुसामालीले १-१ विकेट लिए ।

नेपालले कमजोर फिल्डिङलाई दोस्रो खेलमा पनि निरन्तरता दिएको थियो । नेपाल पहिलो खेलमा १२ रनले पराजित भएको थियो । तेस्रो खेल बिहीबार हुनेछ ।