काठमाडौं (हाम्रो खेलकुद) – नेपाल क्रिकेट संघ (क्यान) ले फ्रेन्चाईज लिग एभरेष्ट प्रिमियर लिग (इपिएल) को प्रेस विज्ञप्ती धम्कीपूर्ण रहेको बताएको छ ।

इपिएल आयोजक र सहभागी ६ टोलीका प्रतिनिधिले सोमबार संयुक्त रुपमा पत्रकार सम्मेलन गर्दै इएिएलले निरन्तरता पाउनुपर्ने माग राखेको थियो । पत्रकार सम्मेलनमा वितरण गरिएको प्रेस विज्ञप्तिमा इपिएल आयोजना गर्न नपाए आगामी दिनमा क्रिकेटलाई सहयोग नगर्ने जनाएको थियो ।

क्यानका कार्यवहाक सचिव प्रशान्त विक्रम मल्लले मंगलबार प्रेस विज्ञप्ति जारी गर्दै इपिएलको भनाई धम्कीपूर्ण रहेको बताएका छन् । विज्ञप्तीमा भनिएको छ, ‘इपिएल सञ्चालकले एक कार्यक्रम आयोजना गरि नेपाली क्रिकेटको सर्वोच्च निकाय नेपाल क्रिकेट संघविरुद्ध धम्कीपूर्ण शैलीमा सार्वजनिक रुपमा प्रेषित विज्ञप्ति प्रति संघको गम्भीर ध्यानाकर्षण भएको छ ।’

विज्ञप्तीमा अगाडि भनिएको छ, ‘उपरोक्त गैर जिम्मेवार, कपोकल्पित र भ्रामक प्रचारबाजीको संघले खेद प्रकट गर्दछ । यस प्रकारका भ्रामक समाचारप्रति समेत रहन सबै सरोकारवालाहरुलाई संघ हार्दिक अनुरोध गर्दछ ।’

गत साता क्यानले आफै नेपाल टि२० लिग घोषणा गर्दै अव देशमा एकमात्र लिग हुने बताएको थियो । त्यसक्रममा क्यानले आइसिसीले एक देशमा एक लिगमात्र हुने जनाएको थियो । त्यसपछि इपिएल र ६ फ्रेन्चाइज टोलीले सोमबार पत्रकार सम्मेलन गर्दै एपिएलले निरन्तरता पाउनु पर्ने माग राखेका थिए ।